ரிஷி சிந்தனை - 06

தெய்வ உபாசனையின் அடையாளமாக புறப் பூஜையில் பல சடங்குமுறைகள் வழக்கத்தில் உள்ளன. தீர்த்த யாத்திரை, கோயில் தரிசனம், தோத்திர பாராயணம், சோடச உபசாரம், விரதம், பிரதட்சணம், அபிஷேகம், திருவிழா , இரவு கண்விழித்தல், விரதம் என இந்துமதத்தை சார்ந்த ஒவ்வொரு சமூகமும் தமது வழக்கத்திற்கு ஏற்ற வகையில் கடைப்பிடித்து வருகின்றனர். இவை அடிப்படையில் மனிதர்களுக்கு பண்பையும், நல்ல குணத்தை கூட்டு சமூகமாக வளர்ப்பதற்காக ஏற்படுத்தப்பட்டவை. இதைத்தாண்டி உணர்வு, மனம் என்பவற்றை பயன்படுத்தி சாதனை செய்யும் உயர்மட்ட சாதனைகளும் இருக்கச் செய்கின்றன.

உயர் மட்ட சாதனையில் இரண்டு முக்கிய சாதனைகள் 1) ஜபம் 2) தியானம். இந்திய பாரம்பரியத்தில் மட்டும் இல்லாமல் உலகின் எந்த ஒரு ஆன்மீக பயிற்சிகளிலும் இந்த இரண்டு அமிசங்கள் இல்லாமல் இருக்க முடியாது. மற்ற எந்தப் பயிற்சிகளும் இந்த இரண்டினது ஏதோ ஒரு அங்கமாகத்தான் இருக்க முடியும்.

ஜபத்தின் மூலமாகத்தான் இறை சக்தியை எம்முள் ஈர்க்க முடியும். ரத்தினம் இல்லாத நாகம் தனது சக்தியை இழந்து விரக்தி அடைவதுபோல் நாம் தெய்வ சக்தியுடனான தொடர்பினை இழந்து அறியாமையிலும் பயத்திலும் காலத்தை வீணாக்குகிறோம். இறை ஞானம் ஜெபத்தின் மூலம் ஒருவனில் செயற்படும். தனது பெயரைச் சொல்வதால் மகிழ்ந்து இறைவன் நன்மை செய்கிறான் என்று நாம் அறியாமையில் எண்ணக்கூடாது. அந்தளவிற்கு கீழ்த்தரமானவன் அல்ல இறைவன். அதே வேளை எம்மைப் படைத்துவிட்டதால் எல்லாப்பொறுப்பையும் ஏற்றுக்கொள்ளும் வேலைக்காரனும் அல்ல. எல்லாவற்றிற்கும் மூலமாக இருக்கும் அந்தப்பரம்பொருளின் ஒளி எல்லாவற்றிலும் உறைந்திருந்தாலும் மனதின் சலனத்தால் தன்னை அறியமுடியாமல் இருக்கின்றது. இந்த சலனத்தை அடக்கி இறையின் ஒளியை அனுபவத்தில் அடையும் செயல்தான் ஜபசாதனை.

இறைவன் மனிதனிடமிருந்து ஒழுங்கு, மற்றும் தனக்கு ஒப்படைக்கப்பட்ட கடமைகளைத்தான் எதிர்பார்க்கிறான். ஓருவர் ஜெப சாதனையை செய்து கொண்டு தனது கடமையை, வாழ்க்கை ஒழுங்கை கடைப்பிடிக்காமல் எந்தப்பலனும் பெறமுடியாது.

மின்சக்தியை சரியான ஒழுங்குடன் பயன்படுத்தினால் ஒளி, வெப்பம், காற்று என பலன்களைப்பெறலாம். நமக்கு ஒளிதரும் மின்சாரம்தானே என்று கைகளை வைத்து விளையாடப்பார்த்தால் மரணத்தையே தரும். இதைப்போல் இறையும் ஓர் உயர்ந்த சக்தி, இதை ஒழுங்குடன் சாதனை செய்பவன் வாழ்க்கையில் எல்லாவித பேறுகளும் பெற்று இன்பமயமான வாழ்க்கை பெறுவான்.

இப்படி ஒளிமயமான புத்தியை பெறுவதற்கு வழிகாட்டுவதே காயத்ரி மகா மந்திரமாகும். இதை குரு மந்திரம் என்று சொல்லுவது சாலப்பொருந்து. அக ஞானத்தை சீராக்குவதில் காயத்ரி ஜெபம் பெரும் உதவி செய்யும்.

(தொடரும்…..)