ரிஷி சிந்தனை - 03

துன்பத்தை விஞ்சிய வாழ்க்கை பற்றிய தத்துவம் எமக்கு தெளிவானதாக இல்லை. அப்படி ஒன்று இருந்தாலும் அதை மனதில் உள்வாங்கி உருவகித்து உணர்வது இயலாத காரியம்.  நாம் அதன் முழுமையான தன்மை பற்றி புரிந்து கொள்ள மாட்டோம். ஏனெனில், நாம் அதை அனுபவபூர்வமாக எம்மிலோ எம்மைச்சுற்றியோ அனுபவித்து அறிந்ததில்லை.

எப்போதாவது எம்மிலோ, எம்மைச் சூழவோ, சமூகத்திலோ இத்தகைய துன்பத்தை விஞ்சிய இன்ப வாழ்க்கை நிகழ்ந்திருந்தால் மட்டுமே, எம்மால் அதன் பலனை கற்பனை செய்ய முடியும். அப்படி ஒரு சந்தர்ப்பம் நிகழ்ந்திருந்தால் அந்த நிலையின் நிபந்தனைகளை மக்கள் அறிந்து கொண்டு அதற்கேற்றாற்போல் தமது வாழ்வின் நிபந்தனைகளை மாற்றிக்கோண்டு எது அமைதியான, ஆனந்தமான, எளிய வாழ்க்கை என்பதை புரிந்துகொண்டு துன்பகரமான வாழ்க்கையில் இருந்து மீண்டு உயர்ந்த தத்துவமுடைய வாழ்க்கைக்கு வர முடியும்.

இத்தகைய உயர்ந்த தெய்வீக எண்ணங்கள் உலகை வழி நடாத்தும் நாள் கட்டாயம் வரும் அல்லது அது வருவதற்குரிய சூழ் நிலைகள் கட்டாயம் வலிந்து ஏற்படுத்தப்படும்.

மக்கள் அத்தகைய ஆனந்தமயமான உயர்ந்த எண்ணங்களையும் அதன் சக்திகளும் செயற்படுவதை, தத்தம் சொந்த அனுபவத்தால் உணரும்போது அவற்றை முழுமையான இதயத்துடன் தழுவிக்கொள்வார்கள். அப்போது முழுமையான மாறுதலடைந்த யுகம் உதயமாகும்.

இப்படி புது யுகம் உதயமாகும் போது செயிண்ட் எமர்சன் கூறியதுபோல் போர்கள் அற்ற மனித சமுதாயம் உருவாகும். அது மட்டுமல்ல எல்லா நோய்களும், துன்பங்களும், பாவங்களும், பற்றாக்குறைகளும், அதிருப்திகளும் இல்லாமல் போகும்.

முழுமையான நன்றியுள்ள வாழ்க்கை கொண்டவனும், உற்சாகமான முழுமனதுடன் ஒப்புதலுமுடையவனுமாக மனிதன் உருவாகுவான். அந்த நிலையில் மனிதன் தேவன் எனவும் சமூகமும் இந்த பூமியும் சொர்க்கம் எனவும் அழைக்கப்படும்.

(தொடரும்…..)