பலர் தலைப்பைப் பார்த்து விட்டு ஏதோ காமாந்தமாக மாணிக்கவாசகர் கூறியுள்ளார். அதை இவர் விளக்கப் போகிறார் என்று எண்ணினால் அதற்கு நாம் எந்த விதத்திலும் பொறுப்பாக மாட்டோம். எழுதுவதை ஆழ்ந்து பொறுமையாகப்படித்து, சிந்தித்து உரையாடுபவர்கள் மட்டுமே சரியாகப் புரிந்து கொள்ள முடியும்.
ஏன் இந்தத் தலைப்பு? புணர்ச்சிப் பத்து என்ற இந்த தொகுதியில் இறைவனுடன் சேருதலினை இலட்சியமாகவும் அதற்கு தடையானவற்றை தனது மனதிற்கு தெளிவிப்பதற்கான ஆய்வினையும் மாணிக்கவாசகர் செய்துள்ளார்.
இறைவன் அல்லது சிவம் எங்குள்ளார் என்றால் மதவாதிகள் கைலாயத்தில் இருக்கிறார் என்று மலையைக் கை காட்டுவார்கள். ஆனால் உணர்ந்த ஞானிகள் சொல்லித் தந்தது உனக்குள்ளே இருக்கிறார், உனக்குள் இருக்கும் இறைவன் மட்டுமே நீ இலகுவாக அறியப்படக்கூடிய வகையில் இருக்கிறார் என்று.
உனக்குள் இருக்கிறார் என்பதை உணர்ந்து மாணிக்கவாசகரின் புணர்ச்சிப்பத்தைப் படிக்கத் தொடங்கினால் அது முழுமையாக யோக சாதனைக்குரிய ஒரு வழிகாட்டல் என்பது புரியத் தொடங்கும்.
சம்போகமே பெரும் இன்பம் என்று இருந்த மனம் சமாதி இன்பத்தின் அனுபவத்திற்கு அலைபாயத்தொடங்கும்.
ஆக மாணிக்கவாசகர் ஒரு மனிதன் தான் அனுபவிக்கக் கூடிய அற்ப இன்பத்தில் அதிஉயர் இன்பமாகிய சம்போகத்திலிருந்து அதைவிட மிக உயர்ந்த சமாதி இன்பத்திற்கு இந்த சமாதி அனுபவங்களில் ஒன்று ஒளியைக் காணல், கலத்தல்!
இதற்கு அவர் புணர்ச்சிப்பத்தில் தேர்ந்தெடுத்த வார்த்தை பொல்லா மணியைப் புணர்ந்தே என்பது!
எல்லாப் பாடல்களும் பொல்லா மணியைப் புணர்ந்தே என்றே முடிவுறும்.
பொல்லா மணி என்ற பெயர் ஏன்? இதற்கு பொருள் பொதுவாக செதுக்கப்படாத மணி என்று கூறப்பட்டுள்ளது. அது பொருந்தாது என்பது என்வாதம்! இதற்கு பொருள் கொள்ள வழக்கில் உள்ள பொல்லா நிலம் என்பதை எடுத்தால் அதன் பொருள் மயானம் என்று வரும். பொல்லா நிலத்தில் வசிப்பவன் சிவன், மயானத்தில் இருக்கிறான் என்றால் அதன் பொருள் சூன்ய நிலை அனுபவத்தில் உணரப்படக் கூடியவன்.
ஆக பொல்லாமணி என்பது எண்ணங்கள் அற்ற சூன்ய நிலையில் பெறும் சமாதி அனுபவத்தைக் குறிக்கும்.
ஆக மாணிக்கவாசகர் தன் சாதனையில் தான் அடையக் கூடிய அதியுயர் சமாதி நிலையினை அடைவதற்கு எப்படியெல்லாம் தடை ஏற்படுமோ அந்த அனுபவத்தைப் பாடியுள்ளார். அடிப்படையில் இந்தப் பாடல்களுக்கு பொருள் கொள்ள முடியும் !
விமர்சனங்கள், கருத்துக்கள், உரையாடல்கள் வரவேற்கப்படுகின்றது.
No comments:
Post a Comment
எமது பதிவுகளை FaceBook இல் பகிர விரும்புவவர்கள் தகுந்த இணைப்புடன் பகிரவும். தமது தனிப்பட்ட வலைத்தளங்களில் பகிர விரும்புவபர்கள் தனிப்பட்ட மின்னஞ்சல் மூலம் அனுமதி பெற்று பகிரவும். எழுந்தமானமாக பிரதி செய்து பகிர்வது முறையான செய்கையாக கருதப்படமாட்டாது.