பேஸ்புக் பொதுவுடமை கீதாசாரம்

நண்பர் Jo Simhaa அவர்கள் தனது எழுத்துக்களை பிரதி செய்து தனது எழுத்தாக பதியும் ஒருவரைப் பற்றி கருத்திட்டு இருந்தார்! 

பேஸ்புக் என்பது பொதுவுடமை வாதத்தை மக்கள் மனதில் திணித்து மக்களை அந்த தத்துவத்தை ஏற்றுக் கொள்வதற்காகவும் ஸ்ரீ கிருஷ்ண பரமாத்மாவின் கீதாசாரத்தை அனுபவ உண்மை எனப் புரியவைக்கவும் உருவாக்கப்பட்ட ஒரு நுணுக்கமாக பொறி முறை என்பதும் உங்களில் எத்தனை பேரிற்கு தெரியும்! 

பொதுவுடமைக் கொள்கையின் அடிப்படை, பொருளாதார மற்றும் பௌதிக உற்பத்திகளை பொதுமைச் சமூகத்தின் சகல அங்கத்தவர்களிடையும் பகிர வேண்டும் என்றும் இதனால், ஒவ்வொருவரின் உழைப்பின் மூலமும் கிடைக்கும் பலனை சமமாகப் பகிர்ந்துக் கொள்ளலாம் என்பதாகும். 

ஒரு எழுத்தாளன், ஆய்வாளன் தனது உழைப்பான எழுத்தை பேஸ்புக்கில் பொதுவில் Public option இல் பதிவது பொதுவுடமைத் தத்துவத்தின் முதல் படி! 

பொதுவுடமைத் தத்துவத்தின் இரண்டாவது படியான ஒவ்வொருவரின் உழைப்பின் மூலமும் கிடைக்கும் பலனை சமமாகப் பகிர்ந்து கொள்வதை செய்வதற்கு இயல்பாகவே பலர் இருக்கிறார்கள். ஆனால் உழைப்பின் மூலம் கிடைக்கும் பலனை சமமாக பகிரவேண்டும் என்பது நடக்காது, Like உம் பாராட்டு comment களும் சமமாக பகிரப்படுவதில்லை என்பது இங்கு குறிப்பிடத்தக்க விஷயம்!    

அவர்கள் உங்கள் துறை சார்ந்த எந்த அறிவும், உழைப்பும் செய்ய மாட்டார்கள், ஏதாவது ஒரு பேஸ்புக் பக்கமோ, ப்ளாக்கர் வலைத்தளமோ வைத்திருப்பார்கள். நீங்கள் பதிந்து அடுத்த கணம் அதைப் பிரதி செய்து தமது தளத்தில் போட்டு விடுவார்கள்! பேஸ்புக் எழுதியவரின் எழுத்தை அப்படியே share செய்யும் நவீன வசதியைத் தந்தாலும், அவர்கள் Copy & Paste என்ற கணனியின் பழைய option ஐப் பயன்படுத்தும் பழமை வாதிகள்! 

இற்றைக்கு எட்டு - ஒன்பது வருடங்களுக்கு முன்னர் நாம் எழுதிக் கொண்டிருந்த போது இன்னொரு பக்கத்தில் எனது கட்டுரைகளைப் பிரதி எடுத்து தனது பக்கத்தில் ஒருவர் தானே எழுதியதாக பதிவிட்டுக் கொண்டுக் இருந்தார். 

இன்னொருவர் எந்தக்கிலேசமும் இல்லாமல் நான் எனது தாத்தாவைப் பற்றி எழுதினால் அதையும் பிரதி செய்து தனது தாத்தா என்றது போல் பிரதியிடுவார். 

இன்னொருவர் சற்றுப் புத்திசாலி, கட்டுரையை எடுத்து அதை தனக்கு தனது தாத்தா, குரு உபதேசித்ததாக customize செய்து ஆனால் எவரோ எழுதியதை தானே எழுதியதாக பதிவிடுவார்!

ஒரு மிகப் பிரபலமான பக்தி தளத்தில் நான் தமிழில் மொழிப் பெயர்த்த ஸ்ரீ லலிதா ஸஹஸ்ர நாம உரையை பிரதியிட்டு அதற்கு நூற்றுக்கணக்கானவர்கள் "அருமை ஐயா" என்று கூற அதை மகிழ்வுடன் " நன்றி ஐயா" என்று தானே எழுதியதாக ஏற்றுக் கொண்டு மகிழ்பவரைப் பார்த்து நான் மன மகிழ்ந்து கொண்டு இருந்தேன்! அவரிடம் டாக்டர் ருத்திரன் இது யார் எழுதியது என்று கேட்டதற்கு நேரே பதில் சொல்ல விருப்பமில்லாமல் சுற்றி மழுப்பி பதில் சொல்லியிருந்தார்! ஏனென்றால் டாக்டர் ருத்திரன் ஆரம்பக் காலத்திலிருந்து நான் எழுதிய உரைகளைப் படித்து வந்திருக்கிறார். 

முதல் முதலில் இதை பிரதி செய்பவரைப் பார்த்த போது ஒருவித மனசஞ்சலம் அடைந்த நான் சிலகாலத்திற்கு பிறகு அவற்றை இரசிக்கும் ஒருவனாக மாறி இருந்தேன்! 

ஏனென்றால் உலகத்தின் இயற்கையை பேஸ்புக் புரியவைத்திருந்தது!

எதை நீ கொண்டுவந்தாய் அதை இழப்பதற்கு

எதை நீ படைத்தாய் அது வீணாவதற்கு

எதை நீ எடுத்தாயோ அது இங்கிருந்தே எடுக்கப்பட்டது

எதை கொடுத்தாயோ அது இங்கேயே கொடுக்கப்பட்டது

எது இன்று உன்னுடையதோ அது நாளை மற்றொருவருடையதாகிறது

மற்றொரு நாள் அது வெறோருவருடையதாகிறது

இதுவே உலக நியதியும் எனது படைப்பின் சாராம்சமும்" 

என பகவான் ஸ்ரீ கிருஷ்ணர் கூறியதை பேஸ்புக்கில் சொந்தமாக எழுதுகிறோம் என்று நினைப்பவர்களுக்கு புரிய வைக்க, ஞானத்தை தர இறைவனால் உருவாக்கப்பட்ட தூதர்கள் தான் இந்த  பேஸ்புக் Copy & Paste எழுத்தாளர்கள்! 

   

ஆகவே எவராவது எமது எழுத்துக்களை பிரதி செய்து தாமே எழுதியதாக பிரதியிடுகிறார்கள் என்றால் நாத்திகர்களும், கம்யூனிஸ்டுகளும் அவரை பொதுவுடமைவாதத்தின் தூதர்களாகவும்,

ஆத்திகர்கள், பக்தர்கள் அவர்களை பகவான் ஸ்ரீ கிருஷ்ணனின் கீதாசாரத்தை அனுபவமாக உணர்த்த வந்த தூதர்களாகவும் கருதி மதிக்க வேண்டும் என்று வேண்டிக் கொள்கிறேன்!    

ஆகவே பேஸ்புக்கில் எழுதுவதாக இருந்தால் நீங்கள் ஒரு பொதுவுடமைவாதியாகவோ அல்லது கீதாசாரம் புரிந்த ஒருவராகவோ இருப்பது அவசியம்!