மாணிக்கவாசகரின் சம்போகத்திலிருந்து சமாதிக்கு - 08

இனி ஐந்தாவது பாடல், 

பரிந்து வந்து பரமா னந்தம் பண்டே அடியேற் கருள்செய்யப்

பிரிந்து போந்து பெருமா நிலத்தில் அருமா லுற்றேன் என்றென்று

சொரிந்த கண்ணீர் சொரிய உள்நீர் உரோமஞ் சிலிர்ப்ப உகந்தன்பாய்

புரிந்து நிற்ப தென்றுகொல் லோஎன் பொல்லா மணியைப் புணர்ந்தே.

புருவ மத்தியில் பொல்லா மணியைப் புணர்ந்தால் பரமானந்த அனுபவம் தானாகக் கிடைக்கும். ஆனால் உடல் அனுபவத்தில் இச்சை ஏற்பட்டால் அந்த அனுபவம் பிரிந்து அவற்றில் ஆர்வம் உடையதாகிவிடும். 

இதை எண்ணித் தான் முன்னைய பாடல்களில் மாலும் அயனும் செய்யும் செய்கையால் எப்படி ஒருவன் தனது கீழ்சக்கரங்களான மூலாதாரம், சுவாதிஷ்டானம், மணிப்பூரகத்தில் சிக்கி பொல்லா மணியைப் புணர்ந்து பெறும் பேரானந்தத்தை இழந்து விடுவான் என்பதை சுட்டிக் காட்டியவர் இந்தப் பாடலில் அந்த நிலையை மேலும் அழகாகச் சுட்டிக்காட்டுகிறார். 

தனது யோக சாதனையால் அடைந்த உயர்ந்த நிலை பெருமாநிலம் எனும் உடலில் தூண்டலால் அருமாலுற்றேன் என்கிறார், அருமாலுற்றேன் என்றால் மயக்கமுற்றேன் என்று அர்த்தம். 

அடுத்த வரிகளைப் பண்டிதர்கள் அன்பு பெருகி கண்ணீர் மல்கி உரோமஞ் சிலிர்க்கும் அனுபவத்தை பெருமானார் கூறுவதாக பொருள் கொள்வார்கள். எனினும் அடுத்த வரிகள் ஆழ்ந்து யோக நுணுக்கத்துடன் பொருள் காணப்பட வேண்டியவை. 

என்றென்று சொரிந்த கண்ணீர் சொரிய உள்நீர் உரோமஞ் சிலிர்ப்ப உகந்தன்பாய்

புரிந்து நிற்ப என்ற வரிகள் உள்நீர் சொரிய வரும் அனுபவங்கள் எவை என்றால் என்றென்றும் சொரிந்துக் கொண்டிருக்கும் கண்ணீர், உரோமஞ் சிலிர்ப்ப, மனது அன்பால் நிறையும் என்று பொருள் கொள்ளப்பட வேண்டும். 

பல பண்டிதர்கள் உள்நீர் என்பதற்கு பொருளை உள் அன்பு என்று பொருள் கொள்கிறார்கள். ஆனால் உள் நீர் என்றால் புருவமத்தியில் உணர்வை ஒன்றுவதால் தலையில் சுரக்கும் அம்ருதம் என்பது சித்தர்களின் பரிபாஷை. 

புருவ மத்தியில் உள்ள பொல்லா மணியாகிய சிவத்தைப் புணர்ந்தால் யோகி அம்ருதத்தைப் பெறுகிறான். அப்படி அம்ருதமாகிய உள் நீர் சுரந்தால் மனதில் அன்பு பெருகும், உரோமம் சிலிர்க்கும், உடல் நடுங்கும், பரமானந்த நிலை வாய்க்கும்! இப்படி எல்லாம் உயர்ந்த நிலையை அனுபவிக்கையில் பெருமாநிலம் எனும் உடலில் இச்சைகள் அந்த அனுபவத்தைப் பெறமுடியாமல் பிரித்து அருமாலுறும் - மயக்கமுறும், உடலில் தூண்டலுக்கு மயக்கமுறாமல் அதைப் புரிந்து பொல்லாமணியைப் புணர்ந்து பேரானந்ததில் என்றென்றும் நிற்பது எக்காலம் என்று கேட்கிறார் மாணிக்க வாசகர்! 

ஆக சித்தர்கள் கூறும் அம்ருதம் பெறும் நிலையை மிகச் சூக்ஷ்மமாக பரிபாஷையாக இந்தப்பாடலில் கூறியுள்ளார் பெருமானார்! 

பெரும்பாலும் பலர் மாணிக்கவாசகர் உருகி உருகிப் பாடி உணர்ச்சியையும், தமிழின் எதுகை மோனை சொற்பிரயோகங்களையும் கொண்டு திருவாசகத்திற்கு உருகாதார் ஒருவாசகத்திற்கும் உருகாதார் என்று சொல்லுகிறார். 

இராஜ தந்திரியான அமாத்திய மாணிக்கவாசகர் உலகம் அறிந்துக் கொள்ள வேண்டிய யோக இரகசிய நுணுக்கங்களை பரிபாஷையாகக் கூறி சிவபுராணத்தின் கடைசி வரியில் சொல்லிய பாட்டின் பொருளுணர்ந்து சொல்லுவார் செல்வர் சிவபுரத்தி னுள்ளார் சிவனடிக்கீழ்ப் பல்லோரும் ஏத்தப் பணிந்து என்று அதை அறிவதற்குரிய சாவியையும் கொடுத்துச் சென்றுள்ளார்.