எனது பெயர்

எனக்கு எனது பெற்றோர்கள் இட்ட பெயர் சுமனேந்திரன் = சு+மன+இந்திரன்.

ஒரு தடவை எனது குரு நாதர் ஸ்ரீ அம்ருதானந்த நாதர் பூர்ணதீக்ஷையின் போது கொடுக்கப்படும் பெயர் அந்த சாதகன் தனது சாதனையால் அடையப்போகும் நிலைக்கான சங்கேத் குறியீடு என்று சொல்லியிருந்ததை அடிப்படையாக கொண்டு எனது பெயரின் அர்த்தத்தை அறிய முயன்றேன்.

சுமனேந்திரன் = சு+மன+இந்திரன்.

சுமன = நல்மனது, செழுமனது
சமஸ்க்ருதத்தில்
सुमन = சுமன = மிக வசீகரமான, அழகான,
सुमनस् = சுமனஸ் = நல்மனது , இரக்கமுள்ள, நன்கு முதிர்ந்த, இனிமையான, கருணையுள்ள , சாதகமான, ஏற்றுக்கொள்ளக்கூடிய அர்த்தங்களில் வேதங்களில் கூறப்பட்டுள்ளது.(Lit. RV. Lit. AV. Lit. Gobh. Lit. KaṭhUp)

ஸ்ரீ அரவிந்தரும், Dr. காஸ்யப அவர்களும் வேதங்களில் குறிப்பிடப்படும் இந்திரன் என்ற தெய்வத்தைப்பற்றிய மறையியல் சூக்ஷ்ம விளக்கத்தைக் கூறும்போது இந்திரன் என்பது தெய்வ மனதின் அதி தெய்வம் என்றும், பிரபஞ்சத்தில் இருந்து மனித மனத்தின் செயற்பாட்டை நெறிப்படுத்தி, மனிதன் தனது செயற்பாடுகளை சரியான முறையில் செய்வதற்குரிய ஆற்றலை ஸ்தூல பௌதீக உலகிலும், சூக்ஷ்ம உலக ஆற்றல்களை பெற அறிவினை தருபவனாகவும் அர்த்தப்படுத்துகிறார்கள்.

மேற்கூறிய அர்த்தங்களைக் கொண்டு சுமன இந்திரன் என்ற பெயரிற்கு நல்மனது , இரக்கமுள்ள, நன்கு முதிர்ந்த, இனிமையான, கருணையுள்ள , சாதகமான மனதையும், தெய்வ மனதை இயக்க கூடிய ஆற்றலுள்ளவன் என்றும் பொருள் கொள்ளலாம்.

நான் மேற்குறித்த அர்த்தத்திற்கு தகுதியானவனா என்று தெரியவில்லை! எனினும் சிறுவயது முதல் மனம் பற்றிய ஆழமான புரிதலை தேடியது என்னை யோகசாதனைக்குள் கொண்டு வந்து விட்டது என்பது அனுபவ உண்மை!