சாதனை/அனுஷ்டானத்தின் போது குடும்பத்தில் மரணம் நிகழ்ந்தால் தீட்டா?

நாம் சாதனை செய்துகொண்டிருக்கும் போது வீட்டில்/சொந்தத்தில் இறப்பு நிகழ்ந்து விட்டால் சாதனையைத் தொடர்லாமா?

சாதனை புறச்சடங்கு அல்ல; உங்கள் அகத்தின் அமைதியும், சாதனை செய்யக்கூடிய சூழலும் இருந்தால் கட்டாயம் செய்யலாம்.

இறப்பு என்பது ஒரு துயரம் என்று எண்ணுவது பாசமும் பற்றும் மிகுந்த மனதின் செயல்; உண்மையில் ஆன்மா குறித்த உடலிற்கான கர்ம பந்தத்தை முடித்துக்கொண்டு அந்தக்கர்மங்களின் பயனாக அதன் அடுத்த நிலைக்குச் செல்லும் செயலே இறப்பு! ஆகவே இறந்த ஆன்மாவிற்கு நாம் எமது உணர்வின் மூலம், மனதில் அந்த ஆன்மா நல்ல நிலை அடைய வேண்டும் என்று எண்ணுவதன் மூலம் உதவி செய்யலாம்.

இறந்த ஈமச்சடங்குகள் நாம் சாதனை செய்யும் வீட்டில் நடைபெற்றால் சாதனை செய்யக்கூடிய நிலைமை இருக்காவிட்டால் அமைதியாக ஓரிடத்திலிருந்து ஜெப மாலை இன்றி மானசீக ஜெபம் செய்யலாம். இறந்தவரின் ஆன்மா நல்ல நிலையடையவேண்டும் என்ற எண்ணத்தை வலுப்படுத்தி சாதனை செய்யலாம்.

அப்படியில்லாமல் நெருங்கிய உறவினர் நாம் வசிக்காத வீட்டில் இறந்திருந்தால் வீடு வந்தவுடன் குளித்து சாதனையில் அமரலாம்.

ஆகவே வழமையாகக் கூறப்படும் தீட்டு போன்ற நம்பிக்கைகளைக் சாதனையுடன் குழப்பிக்கொள்ளத்தேவையில்லை. இறந்த நபரின் ஆன்ம முன்னேற்றத்திற்காக பிரார்த்தித்து சாதனையைத் தொடவேண்டும்.