சித்தர்கள் பாடல்களின் பொருளறிதலில் எம்முறை சரியானது?

சித்தர்கள் மக்களின் பரிபக்குவ நிலைக்கேற்ப விளங்கிகொள்வதற்காக ஞானம், யோகம், வாதம், வைத்தியம் என பல பாடல்களாக பாடிச் சென்றுள்ளனர். 

இவற்றின் பொருள் ஒவ்வொரு மனிதனதும் பரிணாமத்துக்கேற்ப ஒவ்வொருவிதமாக பொருள் விளங்கும். இரசவாதம் என்றால் இரும்பை தங்கமாக்குதல் என்று பொன்னாசையுள்ளவருக்கு விளங்கும், மாசடைந்து அழியக்கூடிய மனதாகிய இரும்பினை அப்பளுக்கற்ற ஞானம் எனும் தங்கமாக்குதல் என ஞானமுடையவனுக்கு விளங்கும். 

இதுபோலவே சித்தர்பாடல்களனைத்தையும் ஒவ்வொருவர‌து பரிபக்குவ நிலைக்கமைய பொருள் கூறலாம். எதையும் சரியென்பதோ, பிழையென்பதோ கூறமுடியாது. அவரவர் பரிணாம உயர்வுக்குத்தக்க பொருள் விளங்கும். அதன் படி நடப்பதால் ஏற்படும் விளைவுகளையும் அவரே ஏற்றுக்கொள்ளவேண்டி வரும். 

சித்தர்பாடல்கள் சந்தித்த பெரும் பின்னடைவு ஆங்கிலேயர் முதலான ஐரோப்பியரது கையில் சிக்கியமை, இதனால் பல்லாயிரக்கணக்கான ஆண்டுகளாக எமது பரம்பரையினர் சேர்த்து வந்த ஞானத்தினை இடையில் வந்த பரதேசிகள் அழித்து புதிய கல்விமுறையினை புகுத்தியமை. இதனால் நாம் எமது முன்னோர்கள் கூறியதன் உண்மையினை அறியும் தன்மையினை இழந்து விட்டோம். இப்போது நாம் பார்ப்பது அவர்களால் புகுத்தப்பட்ட மேற்கத்தேய தர்க்க அறிவினைக் கொண்டு, எமது கலாச்சாரம் அக நோக்கு கொண்டது, மனதினை வசப்படுத்தி அதன் மூலம் இன்பம் அடைவது எப்படி? என்பதனை நன்கு அறிந்து நுண்கலைகளாக வகுத்து ஆடல், பாடல், காமசாத்திரம் என தொடங்கி அதன் மூலம் யோகத்தினை அடைவது எப்படி என்பதுதான் கல்வியின் நோக்கமாக இருந்தது. எமது இரசவாதத்தினை கொண்டுதான் நவீன வேதியல்/இரசாயனவியல் வளர்ந்தது என்பது நாம் தெரிந்து கொள்ளவேண்டிய முக்கிய விடயம். 

அடுத்த பின்னடைவு இந்த கலைகள் ஒருசாரார் மாத்திரமே தமக்குரியது என வகுப்புவாதம் கொண்டு ஆணவத்தினால் பகுத்தறிவு இன்றி தம்மனம் போன போக்கில் கையாளத்தொடங்கியது. 

இதனால் இன்று சித்தர்கள் பற்றிய விடயங்கள் ராஜேஸ்குமாரின் கிரைம் நாவல்  அளவிற்கு மனதுக்கு திகில் கொடுப்பதாகவும் அற்புதம்/ இரசவாதம் என்று மனித கற்பனையின் உச்சகட்டத்தில் மக்களை ஒருவித கற்பனா வாதத்திலும் (fantasy) வாழ்க்கைக்கு ஒவ்வாத‌ ஒன்றாகத்தான் காணப்படுகிறது. இதனால் தான் தவறான வழியில், தமது வாழ்க்கைக்கு பயன் படுத்தமுடியாத வகையில் எதைத்தின்றால் பித்தம் தீரும் என்ற நிலையில் இன்றைய ஆன்மீகம் உள்ளது, இதனை அரசியலாக்கி நாத்திகம் பேசும் கூட்டம் ஒருபுறம், கடவுளை காட்டுகிறேன் வா என காமலீலை நடாத்தும் சாமியார் கூட்டம் மறுபுறம், இவற்றையெல்லாம் பார்த்து தன் சந்தர்ப்பத்திற்கேற்ப கடவுளை வணங்கும் பக்தன் நடுவில் நின்று தலையை பிய்த்து தன் வாழ்வை அழித்துக்கொள்கிறான்.

ஆக கூறமுற்படுவது என்னவெனில் "சித்தர்கள் மனிதவாழ்வுக்கொவ்வாத எதையும் கூற‌வில்லை! அப்படிக்கூறப்பட்ட எவையும் நாம் பொருள் கொள்ளும் வகையில் இல்லை! சித்தர்கள் பெயரைக்கூறி அவர்களை வினோதவேடிக்கை காட்டும் மந்திரவாதிகளாக்காமல் அவர்கள் கூறிய ஞானத்தினை அடைந்து வாழும் வாழ்க்கையினை இன்பமுடையதாக்குங்கள்" 

அவர்கள் அருள் மானசீகமாக எப்போதும் எல்லோருக்கும் கிட்டும்!