யோக சாதனையில் எந்தப்படிநிலையில் கோள்களின் தாக்கம் அற்றுப்போகும் ?

சித்ரா எனும் வாசகர் கேட்ட கேள்வி: தியானத்தில் எந்தப்படிநிலையில் கோள்களின் தாக்கம் அற்றுப்போகும் ?

இந்தக் கேள்வி யோக சாதனையில் எந்தப்படிநிலையில் கோள்களின் தாக்கம் அற்றுப்போகும் ? என அமைந்திருக்க வேண்டும் என்பது எமது அபிப்பிராயம் ஏனேனில்  தியானம என்பது யோக சாதனையின் உயர்ந்த ஒரு படியாகும். ஒருவருக்கு தியானம் கைவருவதற்கு முன்னராக சில படிமுறைகள் இயமம, நியமம், ஆசனம், பிரணாயாமம், பிரத்தியாகாரம், தாரணை சித்தியாக வேண்டும், அதன் பின்னரே   தியானம் கைகூடும். இந்த நிலையில் கிரக தாக்கத்திலிருந்து விடுபடலாம் என்பது பற்றிய விளக்கத்தினை தற்போது பார்ப்போம்;

இந்தக் கேள்விக்கான பதிலை சித்த வித்தைப்படி அணுகுவோமேயானால் மனம், சித்தம் ஆகிய இரண்டினதும் செயற்பாட்டினையும்  புரிந்து கொள்ள வேண்டும். ஏற்கனவே மனம் பற்றிய பதிவிலும், சித்ரகுப்தனார் பற்றிய பதிவிலும் இதுபற்றி விளக்கியுள்ளோம், அப்பதிவுகளையும் பார்க்க வேண்டுகிறோம்.

1. http://yogicpsychology-research.blogspot.com/2011/08/blog-post_7353.html
2. http://yogicpsychology-research.blogspot.com/2011/07/blog-post_1036.html

ஒவ்வோருமனிதன் பிறக்கும் இடம் மற்றும் நேரத்தின் படி (இதுவும் அவனது முற்பிறப்பு கணக்கின் படிதான்!) அவனது உடல், மனம், மனத்தின் கூறாகிய சித்தம் என்பன வடிவமைக்கப்படுகின்றன. இதனுடைய வலிமையினை கோள்கள் தீர்மானிக்கின்றன! 

அதாவது நீங்கள் செய்த கர்மத்திற்குரிய விளைவு தரும் பொறுப்பு குறித்த கிரகத்திடம் ஒப்படைக்கப்பட்டுள்ளது. அதாவது நீங்கள் செயலுக்கான காரணத்தினை (உங்களுடைய இன்ப துன்பம், செல்வம் வறுமை என்பவற்றை ) நீங்களே ப்ரோகிராம் எழுதுகிறீர்கள், அதனை ஆக்டிவேட் பண்ணுவதற்குரிய கொமாண்ட் குறித்த கிரகத்தினால் வழங்கப்படுகிறது. இதுவே ஜோதிடத்தில் காரகத்துவம் எனக்குறிக்கப்படுகிறது.

இது எப்படி செயற்படுகிறது? எந்தவொரு செயலை நீங்கள் செய்ய வேண்டுமாயினும் அதற்குரிய சித்த பதிவினை கொண்டிருத்தல் வேண்டும்.   பின்பு அந்த சித்த பதிவு வலிமை பெற்று செயல் நிலைக்கு வர வேண்டும்.  எப்படியெனில் நீங்கள் செல்வம் பெறவேண்டும் என உங்கள் சித்தத்தில்  ஆழமான பதிவு இருக்குமானால், கிரகத்தின் வலிமையால் அது செயலுருவும் பெறும், அதேபோல் தடை படவும் கூடும், எப்படியெனில் குறித்த கிரகம் உங்களது சித்தம் எனும் ஆழ்மனதிலுள்ள சித்தப்பதிவினை  தூண்டி, மேல் மனதினூடாக செயல் நிலைக்கு கொண்டு வருகிறது. ஆக கொமாண்ட் கிரகத்தினிடமிருந்து வந்தாலும் அது உங்களது சித்தத்திற்கூடாகத்தான் விழிப்படைந்து செயல் நிலைக்கு வர வேண்டும்.

இதனை ஒரு உதாரணம் முலம் விளங்குவோம்,  எப்படியெனில் ஏழரைச்சனி காலத்தில் விபத்து நடைபெறும் என உங்கள் கர்மா இருக்குமானால் குறித்த ஒரு நாளில் வழமைக்குமாறான பாதையில் செல்ல எத்தனித்து விபத்தில் சிக்கிக்கொள்வீர்கள், பின்பு சிந்தித்துப்பார்த்தால் அடே! வழமையாக இந்தப்பாதையில் செல்வதில்லையே பிறகேன் இந்த பாதையில் வந்தோம்? என எண்ணி வருத்தப்படுவீர்கள், இது அந்த கிரகம் இதுபோல் நன்மையும் நடைபெறும். இந்த உதாரணத்தின் மூலம் கிரகங்கள் எப்படி செயற்படுகின்றன என்று விளங்கியிருக்கும். ஆக சித்தத்தின் தூண்டல்களை உங்களால் கட்டுப்படுத்த முடியுமானால் கிரகத்தின் தாக்கத்திலிருந்து விடுபடமுடியும். உங்கள் சித்தத்தினை துண்டியதால் வந்த விளைவாகும், சரி இதனை எப்படி பயிற்சியில் கொண்டு வருவது?

1. இதற்குத்தான் யோகத்தில் "பிரத்தியாகாரம்" எனும் படி உள்ளது, மனதினை வெளித்தூண்டல்களிலிருந்தும் உள்தூண்டல்களிலிருந்தும் விலகி இருத்தல் எப்படி என்பதனைப்  பயிற்சித்தல்!  
2. ஆழ்ந்த மன ஒருமைப்பாட்டின் மூலம் சித்தத்தில் தகுந்த பதிவினை பதிப்பித்தல்.இதனை தியானம் தாரணை, சுய ஹிப்னாடிசம் மூலமும் சாதிக்கலாம். 
3. இவையெல்லாவற்றையும் விட இலகுவான வழி தகுந்த இஷ்ட தெய்வ உபாசனையினை முறைப்படி குருமூலம் கற்று பக்தியுடன் செய்துவருதல். 
4. இதுதவிர சித்தவித்தையில் சில இரகசிய முறைகள் உள்ளது, அவை பொதுவில் பதிய இயலாதவை. 

இவற்றை தவிர வேறு பரிகாரம் என்று அர்த்தமற்ற சடங்குகளை செய்வதோ, காசு கொடுத்து அர்ச்சனை செய்வதோ எதுவித பலனையும் முழுமையாக தராது என்பது அனுபவ  உண்மை. 

.