காலபைரவ தியானம் – 39

 

இந்தப் பாடல் எத்தகைய தீய பழக்க வழக்கத்தினால் ஆட்பட்டிருந்தாலும் பைரவ உபாசனையால் அதிலிருந்து மீண்டு ஆற்றலுடையவர்களாகலாம் என்பதைக் குறிக்கிறது. வேடனின் பொறியில் மாட்டிய விலங்குபோல் தீய பழக்கவழக்கத்தில் மாட்டிக்கொண்டு வெளிவரமுடியாமல் தடுமாறும் எவரும் பைரவ உபாஸனையின் துணைகொண்டு மேன்மை பெறலாம். அட்டவீரட்டான பைரவ தலங்களை திருக்கடவூரில் மார்க்கண்டேயருக்கு யமனை உதைத்து அருள் செய்ததும் இங்கு குறிப்பிடப்படுகிறது.

வாட்கொண்ட கண்ணியர் மாயையில்

வீழ்ந்து மருண்டுபல

நாட்கொண்ட தீயேனை யாட்கொண்டு

காத்தருள் நல்குவையோ

கோட்கொண்ட காலனுக்கஞ்சிய பாலனைக்

கூர்ந்தளித்துத்

தாட்கொண்டு காத்தவனே

காழியாபதுத் தாரணனே

வாள் வைத்திருக்கும் வேடரின் பொறியில் வீழ்ந்து மருளும் விலங்குகள் போல்

பல நாட்கள் தீய பழக்கங்களில் வீழ்ந்து உழன்றுகொண்டிருக்கும் என்னைக் காத்தருளும் பைரவரே!

காலனுக்கு அஞ்சிய பாலகனாகிய மார்க்கண்டேயரை அருள் கூர்ந்து ஆட்கொண்டு காத்த

சீர்காழிப்பதியில் உறையும் ஆபத்துத் தாரண பைரவரே

உம்மை நான் தியானிக்கிறேன்!