2024 சிருஷ்டி வகுப்புத் தொடர் 02 : ஹடயோகத்திறவுகோல் 01

 சிருஷ்டி 2024 – வகுப்பு 02

ஹடயோக பிரதீபிகை வகுப்பு – 01

செவ்வாய்க்கிழமை 09-ஜனவரி-2024

 

அன்பின் மாணவர்களே இன்று நீங்கள் கற்றுக்கொண்டவை:

1. ஹட என்ற சொல்லிற்கு இரண்டு வகையில் பொருள் சொல்ல முடியும்; பொதுவிளக்கம் பலம் என்பதாகும்; எழுத்துக்களை வைத்து யோக வழியில் பொருள் கண்டால் ஹ என்பது சூரியனையும், ட என்பது சந்திரனையும் குறிக்கும்.
2. ஹடயோகம் என்றால் பலத்தை தரும் யோகம் அல்லது உடலில் உள்ள சூரிய சந்திர ஆற்றலை இணைக்கும் முறை என்று பொருள்.
3. பிரதீபிகை என்றால் ஒளி விளக்கு என்று அர்த்தம்; ஹடயோகம் பயில விரும்பும் மாணவருக்கு தெளிவான வழிகாட்டும் ஒளி விளக்கு ஹடயோக பிரதீபிகை.
4. இந்த நூல் நாத சம்பிரதாய யோக நூல்; நாத சம்பிரதாயம் என்பது சிவபெருமான் பார்வதிக்கு இந்த யோக வித்தையை உபதேசிக்கும் போது அதைக் கேட்டுக்கொண்டிருந்த மீன் பரிணாம உயர்வு பெற்று அடுத்த பிறவியில் மச்சேந்திர நாதர் என்ற சித்தராக மனிதப் பிறவி எடுத்து யோகத்தில் தேர்ச்சிபெற்று யோகியானார். அவரிடன் தீட்சை பெற்று கோரக்க நாதர் இந்த யோகத்தில் தேர்ச்சி பெற்றார். ஆகவே இந்த யோக முறை ஆதி நாதரிடமிருந்து மச்சேந்திர நாதரும், மச்சேந்திர நாதரிடமிருந்து கோரக்க நாதரும் அவர்கள் குருபரம்பரையாகப் பயிற்சி செய்த யோகப் பயிற்சிகளை முறையாகத் தொகுத்து இந்த ஹடயோகப் பிரதீபிகை நூல் உருவாக்கப்பட்டிருக்கிறது.
5.  இந்த நூலைத் தொகுத்த யோகியின் பெயர் ஸ்வாத்மாராம யோகி.
6.  இந்த நூலில் நான்கு அத்தியாயங்கள் உள்ளன; இவற்றை உபதேசங்கள் என்று நூலாசிரியர் சொல்லுகிறார்.
7.  முதலாவது உபதேசம் 67 சுலோகங்களைக் கொண்டது; இது நூலின் குருபரம்பரை வரலாறு, நூலின் நோக்கம், ஹடயோகம் பழகும் சாதகனுக்கு இருக்க வேண்டிய ஒழுக்கம், பயிற்சிசெய்யும் இடத்திற்கு இருக்க வேண்டிய நிபந்தனைகள், உணவு முறைகள் மற்றும் தேர்ந்தெடுத்த ஹடயோக சித்தி தரும் பதினைந்து ஆசனங்கள் விளங்கப்படுத்தப்பட்டுள்ளது. இது ஸ்தூல உடலின் சுத்தி பலம் ஆகியவற்றை விளக்குகிறது.
8.  இரண்டாவது உபதேசம் 76 சுலோகங்கள் கொண்ட அறுவகைச் உடல் சுத்தி முறைகள், அஷ்ட கும்பகங்களின் பயிற்சிமுறையும் விளக்கப்பட்டுள்ளது. இது பிராண பலம் பேறுவதற்கான முறையைக் கூறுகிறது.
9.  மூன்றாவது உபதேசம் 130 சுலோகங்கள் கொண்ட பந்த முத்திரைகள் பற்றிய விளக்கங்கள்; ஸ்தூல உடல் பலமும், பிராண பலத்தையும் வளர்த்துக்கொண்ட யோகி எப்படி தன்னுடைய நாடிகளைத் தூய்மைப்படுத்தி மூலாதாரத்தில் உறங்கும் குண்டலினியை விழிப்பிப்பது என்ற முறையைச் சொல்லும் அத்தியாயம்.
10.  நான் காவது உபதேசம் 114 சுலோகங்கள் கொண்ட ஸமாதி நிலையை எட்டுவதற்கான பயிற்சிகளைக் கூறும் பகுதி. இது நாதானுசந்தானம் என்ற ஸமாதி அனுபவத்தை எப்படி அடைவது என்பதை விளக்குகிறது.
11.  இந்த நூல் கற்கை வெறுமனே கோட்பாட்டறிவிற்கு மாத்திரம் என்பதையும் பயிற்சிகள் அனைத்தும் முறையான ஆச்சாரியரிடம் குருமுகமாகப் பயில வேண்டும் என்பதையும் மாணவர்கள் தெளிவாக விளங்கிக்கொள்ள வேண்டும்.  எக்காரணம் கொண்டும் தன்னிச்சையாக பயிற்சிகளைச் செய்யக்கூடாது.
12.  முதல் உபதேசத்தின் முதல் சுலோகம்:
• மிக உயர்ந்த இராஜயோகத்தில் ஏறிச் செல்வதற்கு ஏணிப்படிபோன்று விளங்கும் இந்த ஹடயோக வித்யாவை எமக்கு உபதேசித்த ஆதி நாதருக்கு நமஸ்காரம்
13. முதல் உபதேசத்தின் இரண்டாவது சுலோகம்:
• இராஜ யோகத்தில் வெற்றி பெறுவதாற்காக மாத்திரமே தனது குரு நாதரை வணங்கி ஸ்வாத்மாராம யோகியினால் இந்த ஹடயோக வித்யா உபதேசிக்கப்படுகிறது.
14. முதல் உபதேசத்தின் மூன்றாவது சுலோகம்:
• ராஜயோகத்தை பயிற்சிக்க முயற்சிக்கும் சாதகர்கள் பல்வேறு கருத்துக்கள் இருப்பதால் குழம்பி இருட்டில் நிற்பதுபோல் சாதனையில் தடைபட்டிருப்பவர்கள் தெளிவாக விளங்கிக்கொள்ள ஹடம் என்ற இந்த ஒளிவிளக்கை ஸ்வாத்மாராமர் கருணையுடன் ஏந்தி நிற்கிறார்.
15. முதல் உபதேசத்தின் நான்காவது சுலோகம்:
• ஹடயோக வித்தை மத்ஸ்யேந்திர நாதர், கோரக்க்ஷ நாதர் பயிற்சித்து சித்தி பெற்ற வித்தை; அவர்களின் அருளாசியால் ஸ்வாத்மாராமர் அறிந்துகொண்டார்.
16.  முதல் உபதேசத்தின் ஐந்து தொடக்கம் ஒன்பதாவது சுலோகம்:
• இந்த ஹடயோக வித்தையை கீழ்வரும் 33 ஹடயோக சித்தர்கள் பயிற்சி செய்து சித்தியடைந்து இந்த யோகத்தின் மகிமையால் காலத்தினை வென்று இந்த பிரம்மாண்டத்தில் சாசுவதமாக இருந்து உலாவி வருகிறார்கள்: அவர்கள் நாமங்கள்
1. ஸ்ரீ ஆதி நாதர்
2. மத்ஸேந்திரர்
3. சாபரர்
4. ஆனந்தர்
5. பைரவர்
6. சௌராங்கி
7. மீனர்
8. கோரக்ஷர்
9. விருபாக்ஷர்
10. பிலேசயர்
11. மந்தாநர்
12. யோகபைரவர்
13. சித்தி
14. புத்தர்
15. கந்தடி
16. கோரகண்டகர்
17. ஸுரானந்தர்
18. சித்தபாதர்
19. சர்படி
20. கானேரீ
21. பூஜபதர்
22. நித்ய நாதர்
23. நிரஞ்ஜனர்
24. கபாலீ
25. பிந்து நாதர்
26. காகசண்டீச்வரர்
27. அல்லாமர்
28. பிரபுதேவர்
29. கோடாசோலீ
30. டிண்டிணி
31. பானுகீ
32. நாரதேவர்
33. கண்டகாபாலிகர்