வெள்ளையாய் இருப்பவன் பொய் சொல்லமாட்டான்

விளம்பரங்களும், உணர்ச்சி வியாபார அரசியல்வாதிகளும் செயற்படுவதற்கு மக்களது சிந்தனைத் திறன் குறைவாக வேண்டிய தேவை இருக்கிறது. 

உதாரணமாக வெள்ளையாய் இருக்கிறவன் பொய் சொல்லமாட்டான் என்று மக்களை நம்பவைத்து பின்னர் வெள்ளையாய் இருப்பவனை வைத்தே பொய் சொல்லி ஏமாற்றும் அரசியல். 

இன்று சிலர் அறிவியல் பேசுகிறோம் என்பவர்களும், நாத்திகவாதிகளும் பழைய சம்பிரதாயங்களை, நூற்களை, கடவுளரை கேலி பேசுவதும், நக்கலடிப்பதும் தம்மை உயர்ந்த சிந்தனாவாதிகளாக காட்டும் ஒரு தகுதியாக நினைக்கிறார்கள். 

இது மனதில் வழுவுள்ள, காழ்ப்புணர்ச்சி கொண்ட விசிலடிக்கும் கூட்டத்திற்கு பொழுது போக்க உதவும்.

உண்மையில் நாம் சமூகத்திற்கு நன்மையாக எதையாவது செய்ய வேண்டுமானால் நாம் கற்காத, அறியாத, ஆராயாத ஒன்றைப் பற்றி கருத்துக் கூறுவதை தவிர்க்க வேண்டும். 

நாம் கிருஷ்ணரைப் பற்றி பேசுகிறோம் என்றால், எமது மனவக்கிரத்தை கிருஷ்ணனில் சாடிப் பேசுகிறோமா, அல்லது பாகவதத்தை முழுமையாக படித்திருக்கிறோமா? அதில் சொல்லப்பட்ட நிலைக்குரிய சமூகப் பண்பாடு என்ன? என்பதை ஆராய்ந்து பேசுகிறோமா என்பது முக்கியமானது. 

எமது கருத்து என்பது எமது மனதின் நிலை, ஆகவே எமது கருத்து உண்மை அல்ல என்ற ஞானம் இருக்க வேண்டும். எவராவது ஒருவரை அறிஞர் என்று ஏற்றுக் கொண்டு விட்டு அவர் கூறுவது எல்லாம் சரி, வெள்ளையாய் இருக்கிறவன் பொய் சொல்ல மாட்டான் என்று நம்பும் மந்தைக் கூட்ட மன நிலையில் இருந்து வெளிவந்து எனது சுய அனுபவத்தில் கற்று, அறிந்த பின்னர் தான் முடிவுக்கு வருவேன் என்ற மன நிலை உள்ள சமூகம் உருவாகும் வரை இப்படியான மந்தை மேய்ப்பான் போலித் தலைவர்கள் இருக்கத் தான் செய்வார்கள். 

ஆகவே சமூகத்தை சிந்திக்கும் சமூகம் ஆக்குவது தான் நாம் எல்லோரும் செய்ய வேண்டிய பணி!