சடாக்ஷர மந்திரத்தில் ஸரவணப⁴வ என்பது சரியா? ஸரஹணப⁴வ என்பது சரியா?

*************************************

முதல் விதி மந்திரம் சரியா பிழையா என்று ஆராய்ச்சி செய்வதற்கு யூடியுப், புத்தகம், வெப்சைட்டில் தேடாதீர்கள்.

மந்திர ஸித்தி பெற்ற உங்கள் குருவிடம் நேர்முகமாக அவரின் வாக்கால் பெற்ற மந்திரம் மாத்திரமே சரியான மந்திரம்; அப்படிப் பெற்றால் வீண் ஆராய்ச்சி செய்து குழம்பாதீர்கள்! குரு பராவாக்குடன் தரும் எந்தச் சொல்லும் மந்திரமே. நிறைமொழி மாந்தர் ஆணையில் கிளந்த மறை மொழி எல்லாம் மந்திரமே!

இனி கேள்விக்கு வருவோம்?

ஸரவணப⁴வ என்பதே சரியான மந்திரம். மந்திரங்களில் சம்பிரதாய பேதங்கள் உண்டு; தமிழ் சித்த மரபிலும், எனது தந்தை வழி உபதேசத்திலும் சடாக்ஷரம் என்பது ஸரவணப⁴வ என்பதே உபாசனைக்கு எடுத்துக்கொள்ளப்பட்டது.

இதற்கு சமஸ்க்ருத கந்தபுராணத்திலும் ஆதாரம் உண்டு. ஸரஸி ஸரவணே ஜாத꞉ தஸ்மாத் ஸரவணப⁴வ꞉ ஸ்ம்ருʼத꞉ என்கிறது. சரவணப் பொய்கையில் தோன்றியதால், அவரை சரவணபவ என அழைக்கிறார்கள்.

ௐ ஸரவணப⁴வாய நம꞉

இதேவேளை சரஹணபவ என்று பாராயணம் செய்யும் சம்பிரதாயங்களும் உண்டு! எனது குருவின் குருவான ஸ்ரீ கண்ணைய யோகீஸ்வரர் ஸரஹணபவ என்றே சடாக்ஷர மந்திரம் உபதேசித்துள்ளார். நான் இரண்டு மந்திர பேதங்களிலும் உபதேசம் பெற்று சாதனை செய்துள்ளேன்!

குருமுகமாய்ப் பெற்ற மந்திரத்தையே அவரவர் சாதகம் செய்ய வேண்டும். மந்திரத்தைத் திருத்துவது அவரவர் குருவின் வேலை. பொதுவில் இது சரி இது பிழை என்று சொல்வதற்கு மந்திர சாஸ்திரத்தில் பொது அதிகாரம் எவருக்கும் இல்லை