கந்தரனுபூதி மந்திரப் பிரயோகம் - 08

 ***************************

அதிகாரத்திலுள்ளவர்களை வசப்படுத்த

**********************

எட்டாவது பாடலிற்கு சித்தர் பிரான் ஏட்டுச் சுவடியில் தந்த தலைப்பு "குடிகனத்தவன் வசமாக" என்பதாகும். இதன் அர்த்தம் அக்காலவழக்கில் பல்வேறு குடிகளை தமது ஆளுகைக்குள் வைத்திருக்கும் நிலப்பிரபுக்களைக் குறிக்கும். இக்காலத்தைய வழக்கில் செல்வாக்கானவர்கள், உயர் அரச அதிகாரிகள் என்போரைக் குறிப்பதாக எடுத்துக்கொள்ளலாம். 

இந்தப்பாடலையும் அதற்குரிய மூல மந்திரம், யந்திரம் ஆகியவற்றைப் பிரயோகம் செய்து இந்தப் பாடலை மனனம் செய்துகொண்டு உயர் பதவிகளில் உள்ளவரகளைச் சந்திக்கச் செல்லும் போதும் அவர்கள் எமக்கு வசமாகி காரிய சித்தியாகும் என்பது இந்தப் பாடலின் மந்திரப் பிரயோகமாகும். 

இனி இந்தப்பாடலில் பொருளை உணர்ந்து அது எப்படி இந்த வசப்படுத்தும் ஆற்றலைத் தருகிறது என்பதை ஆராய்வோம். 

அமரும் பதி, கேள், அகம் ஆம் எனும் இப்
பிமரம் கெட மெய்ப் பொருள் பேசியவா
குமரன் கிரிராச குமாரி மகன்
சமரம் பெரு தானவ நாசகனே.

குமரன், மலைராசனின் மகளின் மகன், சமர் புரிய வந்த சூரனை அழித்தவனை, எனது மனதில் இருத்த, 

நான் எனும் பிரமை கெடும், 

மெய்ப்பொருள் காணலாம் என்பது இந்தப் பாடலின் பொருளாம். 

இந்தப் பாடலின் பொருளைப் புரிந்தால் வசீகரணம் அல்லது வசிய ஆற்றல் என்பது என்ன என்பது புரிந்துகொள்ளலாம்.  நான் என்று தன்னைப் பற்றிப் பெரிதாக எண்ணிக்கொண்டும், மற்றவரகளிடம் அகங்காரம் காட்டுபவனை எவருக்கும் பிடிக்காது. மற்றவர்களை வசப்படுத்த வேண்டும் என்றால் முதலில் நான் என்ற எண்ணத்தைக் குறைக்க வேண்டும். தன்னை பற்றி முதன்மையாக எண்ணாமல் மற்றவர்களை மதித்து அவர்கள் பேச்சைக் கேட்பவரையே அனைவருக்கும் பிடிக்கும். 

குறிப்பாக அதிகாரத்திலுள்ளவர்கள், பணக்காரர்களை வசப்படுத்த வேண்டும் என்றால் தம்மை முன்னிலைப்படுத்தாமல் அவரகளுடைய எண்ணத்தை அறிந்து செயற்படும் பண்பு உள்ளவர்களையே அவர்களுக்குப் பிடிக்கும். அதிகாரத்திலுள்ளவர்கள், பணக்காரர்களிடம் சென்று உங்கள் அகங்காரத்தைக் காட்டினால் அவர்கள் உங்களுக்கு வசப்படமாட்டார்கள். நான் என்ற எண்ணம் இல்லாமல் இருப்பவர்களே மற்றவர்களை, குறிப்பாக சமூகத்தில் பெரிய அதிகார நிலையில் இருப்பவர்களை வசப்படுத்த முடியும்.

இப்படி சாதாரண மானுடர்களில் அதிகாரம் படைத்தவர்களை வசப்படுத்தவே நான் என்ற அகங்கார பிரமை இருக்கக்கூடாது என்றால் குமரன், இந்த பிரபஞ்சத்தை இயக்கும் பராசக்தியின் மைந்தன், சூரபத்மன் முதலிய ஆற்றலுள்ள அசுரர்களை எல்லாம் அழித்தவனை எம் மனதுள் ஏற்று மெய்ப்பொருள் காணவேண்டும் என்றால் நிச்சயமாக நான் என்ற அகங்காரம் அழியவேண்டுமல்லவா?

இந்தப் பாடல் அருணகிரி நாதரால் முருகப்பெருமானை வசப்படுத்தி, எம்முள் இருத்தி மெய்ப்பொருள் காண்பதற்கான வழியாக அகம் ஆம் எனும் இப்

பிமரம் கெட என்று சொல்லப்பட்டிருக்கிறது. இந்த அகங்காரம் அழிந்த நிலை சர்வவசீகர சக்தியைக் கொடுக்கும் என்பதால் இந்தப்பாடலிற்குரிய பிரயோகமாக குடிகனத்தவன் வசமாக என்று சித்தர் பிரான் பிரயோகம் சொல்லியிருக்கிறார். 

இந்தப் பாடலின் பொருள் அறிந்து மூல மந்திரத்தையும், யந்திரத்தையும் பிரயோகிக்க செல்வாக்கானவர்களை வசப்படுத்தலாம்.