கந்தரனுபூதி மந்திரப் பிரயோகம் - 06

 கந்தரனுபூதி மந்திரப் பிரயோகம் - 06

********************************************

கணவன் மனைவி அன்னியோன்யம் பெற

***********************************************

முன்னைய பாடலில் அருணகிரி நாதர் பெண்ணாசையை நீக்க வேண்டும், மாயை என்றவுடன் பலரும் தம்முடன் தர்மப்படி வாழும் மனைவியையும் மாயா சக்தி என்று எண்ணிக் குழம்புவதுண்டு. அந்தக் குழப்பத்தை நீக்க இந்தப் பாடலில் அழகாக விளக்குகிறார். 

இந்தப்பாடலிற்கான மந்திரப் பிரயோகத்தை சித்த புருஷர்  மாதரைத் தழுவ (பெண் புருஷர் கூடாத பேர்க்கு) என்று பெயரிட்டுள்ளார்.  இதன் அர்த்தம் திருமணம் செய்துகொண்ட கணவன் மனைவி கிரகதோஷத்தாலோ, மனக் குழப்பத்தாலோ, வேறு வினைகளாலோ ஒருவருடன் ஒருவர் அன்னியோன்யமாக வாழ் முடியவில்லை என்றால் இந்தப்பாடலின் பொருளுணர்ந்து முருகப்பெருமானை தியானித்து இந்த மந்திரப் பிரயோகத்தைச் செய்தால் அன்னியோன்யம் ஏற்பட்டு இன்பமாக வாழலாம். 

ஏன் கணவனுக்கும் மனைவிக்கும் இடையில் மனப் பிளவு வருகிறது. அடிப்படையில் ஒருவரை ஒருவர் மதித்துப் போற்றாமல் தாழ்மையான, ஆணவமான எண்ணங்களை தமக்குள் உருவாக்கிக்கொள்வதால். ஒருவன் மனைவியை மதித்து, அவளின் ஆலோசனை பெற்று அவள் மனது கலக்கமுறாமல் செயலை செய்பவனாக இருந்தால் மாத்திரமே அந்தப் பெண் ஞானசக்தியாக கணவனின் செயலுக்கு ஊக்கம் தரும் சக்தியாக செயற்படுவாள். அப்படியில்லாமல் மரியாதை கொடுக்காமல், ஆணவத்தால் அவமதிக்கப்படும் பெண் மாயாசக்தியாக மாறி அவனின் வாழ்க்கையை அவனுக்குத் தெரியாமலே நரகமாக்குவாள். இந்த உண்மை தெரியாத ஆணவம், அறியாமை நிறைந்த ஆண்கள் பலர் தமது நிம்மதி கெட்டு, மன அழுத்தத்திற்கு உள்ளாகி ஆண்மை அழிந்து போய் நோயுறுவதைக் காணலாம்.  

ஒருவன் வாழ்க்கையில் இன்பமாக ஞானம் பெறவேண்டும் என்றால் அவனது இச்சா சக்தி - will power சரியாக இயங்க வேண்டும். இந்த இச்சக்தியின் குறியீடே வள்ளி! எமது இச்சா சக்தி எளிமையாக, பக்தியுடன் இருக்கும் போது அதை நாம் மதித்தால் எம்மால் மனவுறுதியுடன் காரியமாற்ற முடியும். 

வள்ளி முருகனின் வலது புறமாக தாமரை மலருடன் நிற்பாள்.  

இனி பாடலைப் படித்த பின்னர் அதன் தத்துவ விளக்கமும், பிரயோகமும் காண்போம். 

திணியான மனோசிலை மீதுனதாள் 

அணியார் அரவிந்தம் அரும்பு மதோ 

பணியாவென வள்ளிபதம் பணியும் 

தணியா அதிமோக தயாபரனே

திணி ஆன மனோ சிலை மீது - சிலை போன்ற கடினமான மனமாகிய கல்லின் மீது,

உனதாள் - உனது பாதம் 

அணியார் அரவிந்தம் அது அரும்புமதோ - அழகு மிகுந்த (வள்ளியின் கையில் உள்ள) தாமரை மலருவது என்ன ஆச்சரியம்?

பணி யாவை என? - எனது வேலைகள் எவை என

வள்ளிபதம் பணியும்  - வள்ளியின் பாதங்களைப் பணிந்து 

தணியாத - என்றும் குறையாத

அதிமோக - காதல் அதிகமாக 

தயாபரனே - கருணைக் கடவுளே 

வள்ளியின் பாதங்களைப் பணிந்து எனது பணிகள் யாவை என்று வினாவும் என்றும் குறையாத காதல் உடைய கருணைக் கடவுளே, எனது கல்போன்ற இறுகிய ஆணவ மனதில் அந்த வள்ளியின் கையில் இருக்கும் தாமரை மலர் போன்ற உனது பாதங்கள் எப்போது மலரும்?  

முருகன் அருணகிரி நாதருக்கு குரு, குருவின் பாதத்தை ஆணவமயமான கல்போன்ற மனதில் மலரச் செய்ய முருகன் தனது மனைவியின் பாதத்தை ஆணவமின்றி பணிந்து நான் செய்ய வேண்டிய வேலை என்ன என்று கேட்கும் காதல் மிகுந்தவன் என்று சொல்லிக் காட்டுகிறார். அதாவது மனைவியின் பாதத்தைப் பணிந்து ஆணவமற்ற நிலை எம்மிடமிருந்தால்தான் எமது கல்போன்ற மனதில் தாமரை போல் குருவின் பாதம் மலரும். 

இந்தப்பாடலிற்கு சித்த புருஷர் புருஷர் மாதரைத் தழுவ என்று பிரயோகம் எழுதியிருக்கிறார். அதாவது இந்தப் பாடலின் பொருளைப் புரிந்துகொண்டால் அந்த ஆணிற்கு அவனுடைய மனைவி வசமாகி அன்னியோன்யமாகிவிடுவாள் என்பது இதன் அர்த்தம். எப்படி மனைவியை வசப்படுத்துவது என்பது சர்வ வல்லமையுடைய அந்த முருகக் கடவுளே தனது மனைவியான வள்ளியிடம் எப்படி நடக்கிறார் என்பதைப் புரிந்துகொண்டால் நாமும் வாழ்க்கையில் இன்பமாக இருக்கலாம்! 

முதல் பிரச்சனை எமது ஆணவத்தால் கல்லாகிப் போன மனம்; இந்த மனம் வள்ளியில் கையில் இருக்கும் தாமரை போல் மலரவேண்டும். அதற்கு முருகன் என்ன செய்கிறான், என்றும் குறையாத காதலும், கருணையுடனும் மனைவியின் பாதத்தைப் பணிந்து என்ன செய்ய வேண்டும் என்று அன்புடன் வினாவுகிறான். இப்படிச் செய்யத் தெரிந்த ஆணிற்கு மனைவி வசப்படாமல் இருப்பாளோ?

இப்படிச் செய்ய என்னால் முடியாது என்று எண்ணினால் இந்தப் பண்பு வர என்ன செய்ய வேண்டும்? 

இந்தப் பண்பை எம்மைல் உருவாக்குவதுதான் மந்திர யந்திரப் பிரயோகம். இந்தப்பாடலுக்கு சித்தர்பிரான் ஒரு மூல மந்திரமும், யந்திரமும் தந்திருக்கிறார். இந்தப்பாடலின் அர்த்தம் புரிந்து மந்திர சாதனையும் செய்துவர உம்மில் இந்தப் பண்பு உருவாகும். 

மனைவிடம் குன்றாத காதலும், கருணையும், அன்பும் பண்பும் செய்யத் தெரியாதவனின் மனம் மலராது. அப்படி மலராத மனதில் முருகனின் பாதங்களும் மலராது! தர்மப்படி மணந்த மனைவியின் மனதை முருகனைப் போல் குளிரச் செய்தாலே அந்தப்பண்பு குருவின் திருவடியை மலரச் செய்யும் என்பது இந்தப் பாடலின் பிரயோக சூட்சுமமாம்.