கந்தரனுபூதி மந்திரப் பிரயோகம் - 01 :

 கந்தரனுபூதி மந்திரப் பிரயோகம் - 01 :

**************************************************

தேவி முருக உபாசனையில் சித்தி பெற கணபதியின் அருள் வேண்டிய பிரயோகம்

****************************************************

கந்தரனுபூதியின் மந்திரப் பிரயோகங்களை 1959ம் ஆண்டளவில் சென்னையில் மயிலாப்பூர் மயானத்தில் வசித்த ஒரு சித்த புருஷர் தியாகராஜ முதலியார் என்ற முருக உபாசகருக்கு ஏட்டுச்சுவடிகளில் ஒவ்வொரு பாடலுக்குமுரிய பிரயோக யந்திரமும், மூல மந்திரமும் சொல்லிக்கொடுக்க அதை அவர் பதிப்பித்தார்.

அவர் பதிப்பித்த நூலில் அவர் அவற்றை பலருக்குச் சொல்லிக் கொடுத்து பெற்ற பலன் களுடன் நூலாக வெளியிட்டார்.

அந்த நூல் முருக உபாசகர்களுக்கு ஒரு பெரும் பொக்கிஷம். முதலாவது கணபதி துதிப் பாடலை அவர் ஒரு அமெரிக்காரான Edward James என்பாருக்கு தேவிஉபாசனையில் ஏற்படும் தடைகளை நீக்கும் கணபதி உபாசனையாக உபதேசித்து அவர் பெற்ற அனுபவத்தை விளக்கியுள்ளார். இங்கு நாம் இவற்றைக் கற்றபோது ஒவ்வொரு பாடலுக்கும் பெற்ற அனுபவ விளக்கவுரையையும், தியாகராஜ முதலியார் தந்த பிரயோகங்களை தருகிறோம். பயன்படுத்த விரும்புவர்கள் அவரவர் குருவைக் கட்டாயம் கேட்டு இதைப் பயிற்சிக்க வேண்டும். எந்த தெய்வ, மந்திர சாதனையும் புத்தகத்தை, யூடியுபை, பேஸ்புக்கைப் பார்த்துச் செய்வது முற்றிலும் தவறானதும், மனதை மாயையில் இருத்து உண்மையான முன்னேற்றம் எப்போதும் பெறமுடியாதபடி ஆணவத்தில் சிக்கவைத்துவிடும்.

அப்படியானால் ஏன் இவற்றைப் பதிவிடுவது என்ற கேள்வி வரலாம், தகவல் அனைவருக்கும் கிடைக்கும் படி செய்தால் வரும் தூண்டலால் ஒரு சிலராவது குருவை அண்டிச் சரியான முறையில் சாதனை செய்வார்கள் என்ற நம்பிக்கையில்தான்.

இனி கந்தரனுபூதி கணபதி துதி, இந்த துதியும், மூலமந்திரமும், யந்திரமும் தேவி உபாசனையின் தடைகளை நீக்கும் கணபதியின் அருளாம்!

ஆடும் பரிவேல் அணிசேவ லெனப்

பாடும் பணியே பணியாய் அருள்வாய்

தேடுங் கயமா முகனைச் செருவிற்

சாடுந் தனியானை சகோதரனே.

இங்கு ஆடும் பரி என்பது மயில், பரி என்பது வாகனம் என்ற பொருளில் எடுத்துக்கொள்ள வேண்டும். முருகனின் ஆடுகின்ற வாகனமாகிய மயில்,

அடுத்து வேல்

அணிசேவல் என்றால் அணி என்றால் அழகு என்று அர்த்தம் கொடியிற்கு அழகு செய்யும் சேவல் இந்த மூன்றையும் கூறி

தனது பாடும் பணியை அருள்வாய் என்று வேண்டிக்கொண்டு போரில் தனியாக கயமுகாசூரனை அடித்து விழுத்திய அந்த முருகபெருமானின் சகோதனே என்று கணபதியை விளிக்கிறார்.

நுட்பமான கணபதி துதி, தன்னுடைய இறைவனாகிய முருகனை மாத்திரமே பாடி கடைச் சொல்லை சகோதரனே என்று வைத்து கணபதியைத் துதிக்கிறார். எப்படிப்பட்ட நுண்ணறிவுடனான பாட்டு!

கயமுகன் = பேராசை, அகந்தை, வன்முறை போன்ற தீமைகளின் உருவகம்.

முருகன் வேல் = ஞானம் மற்றும் தெய்வீக அருள்.

கயமுகனை முருகன் வெல்வது = ஞானமும் அருளும் சேர்ந்த தெய்வீக சக்தி, அகந்தை மற்றும் அறியாமையை முறியடிப்பது.

இந்தப் பாடல் சில முருக உபாசனை இரகசியங்களையும் சொல்லித்தருகிறது. எடுத்தவுடன் எவரும் சுத்தப்பிரம்மமாகிய சுப்பிரமணியரை அடைய முடியாது. அவர்கள் முதலில் மயில், வேல், சேவல் ஆகியவற்றின் அர்த்த ஞானம் புரிந்து அதன்படி தம்மைப் பக்குவப்படுத்த வேண்டும்.

மயில் ஆடிக்கொண்டிருப்பது, அது எமது பிராணன், எப்போதும் சலனித்து ஆடிக்கொண்டிருப்பது, அதன் மீது சண்முகனை ஏற்றி வைக்க பிராணன் அடங்கி குண்டலினியாகிய பாம்பினை காலில் அடக்கிக் கொள்ளும்.

பிறகு வேல் சக்தியாயுதம். சக்தியின் அருள் இருந்தால்தான் முருகனின் அருள். எது எமது ஞானம். மலங்கள் அகன்ற மனதில் ஞான சக்தி உதிக்கும்!

அணியான சேவல் என்பது மனம், சேவலின் குணம் மமதையால் கொக்கரித்துக்கொண்டிருப்பது. அதை சுப்பிரமணியருக்கு அணியாக - அழகான கொடியாக்கிவிட்டால் மனதின் கொக்கரிப்பு அடங்கிவிடும்.

ஆக ஒருவன் முருக உபாசனையில் சித்தி பெற வேண்டும் என்றால் ஆடுபரியாகிய பிராணனில் சுப்பிரமணியரை ஏற்ற வேண்டும், ஞான சக்தியான வேலை வணங்கி சக்தி அருள் பெற வேண்டும், மனதை முருகனின் அணியாக கொடியாக்கவேண்டும். இதற்கு எமக்குள் இருக்கும் துர்குணமான கயமுகாசூரனை அடித்து வீழ்த்த வேண்டும்!

இவையெல்லாம் அந்த சுப்பிரமணியனின் சகோதரனான கணபதியின் அருள் இருந்தால் மாத்திரமே சாத்தியமாகும்!

இந்தப் பாடலுக்குரிய மந்திரப் பிரயோகம் வேண்டுபவர்கள் வாட்ஸப் அனுப்புங்கள்: 077 627 1292