கந்தரனுபூதி மந்திரப் பிரயோகம் - 11

கந்தரனுபூதி மந்திரப் பிரயோகம் - 11

*************************************************

மெய்ப்பொருள் காண - பாபக்கர்மங்களை வென்று குண்டலினி விழிக்க

**************************************************** 

இந்தப் பாடலுக்கு சித்தர் பிரான் பிரயோகமாக இட்ட தலைப்பு "குளிகை மோகனம் பலிக்க (தளிகை சேர்க்க) என்பதாகும். 

குளிகை என்ற சொல்லின் அர்த்தம் உருண்டை, மாத்திரை என்று பொருள் பட சித்த மருத்துவத்தில் பாவிக்கப்படுகிறது. இந்தப் பொருளை எடுத்துக்கொண்டே ஒரே வரியில் இதன் பயன்பாட்டினை விளக்காமல் தியாகராஜ முதலியார் முதலானோர் பொருள் செய்துள்ளனர். 

ஆனால் இந்தப்பாடலிற்கும் இந்தச் சொல்லிற்கும் மிகுந்த நெருக்கமான தொடர்பு உண்டு. இங்கு சித்தர் பிரான் இட்ட தலைப்பு குளிகை மோகனம் என்பதாகும். அதாவது குளிகையை மோகிக்கச் செய்வதற்கு என்று இதன்பொருள். 

குளிகை என்பது குளிகன் காலம் எனப்படும் நேரமாகும். சனியின் உபகிரகமான குளிகை காலம் சாதாரண வேலைகளுக்கு உகந்த நேரமாக எடுத்துக்கொள்ளப்படுவதில்லை. ஆனால் ஜபம், தியானம், தானம், பித்ரு கர்மா போன்றவற்றிற்கு ஏற்ற நேரமாகக் கருதப்படுகிறது. சனியின் நேரம் காரியத்தடைதரும் என்றாலும் பாவ நிவர்த்திக்குரிய காலமும் ஆகும். இந்த நேரத்தில் மரணம் நிகழ்வது கர்மக் காரகனான சனியின் ஆதிக்கத்தில் பாவங்கள் நீங்கி உயிர் நன் நிலை அடைவதாகச் சொல்லப்படுகிறது. இந்த குளிகனையே மாந்தி என்றும் சொல்லப்படுகிறது. 

குளிகன் பற்றி பராசர ஹோரா இப்படிச் சொல்கிறது: 

ஶனீயம்ʼ சாபரம்ʼ ஜ்ஞேயம்ʼ மாண்டி³ நாம க்³ரஹம்ʼ ஶுப⁴ம் .

ஸதா³ து பாபகர்மாணம்ʼ காரகோ மரணஸ்ய ச ..

சனியோடு அறியப்படவேண்டிய மற்றொரு கிரகம், மாந்தி என்று பெயர் கொண்ட இந்தக் கிரககம் சுபமானது என்றாலும் பாபக் கர்மத்தையும், மரணத்தையும் குறிகாட்டுகிறது. 

இந்தப் பதினொராவது பாடலில் அருணகிரி நாதர் இந்த மாந்தியின் காரகத்துவமான மரணம், பாபக் கர்மம் இரண்டையும் வெல்லும் வழியினைப் பற்றிக் கூறுகிறார். 

கூகா என என் கிளை கூடி அழப்
போகா வகை, மெய்ப்பொருள் பேசியவா
நாகாசல வேலவ நாலு கவித்
தியாகா சுரலோக சிகாமணியே 

நாகாச்சல வேலவனே, ஆசு, மதுரம், சித்திரம், வித்தாரம் என நான் கு வித கவிபாடும் ஆற்றலைத் தந்தவனே, தேவலோக சிகாமணியே நான் மரணத்தை நெருங்கும் போது எனது உற்றார் உறவினர்கள் எல்லாம் கூவி அழுது ஒரு பாவி உடலைவிட்டு செல்வதைப் போல் அல்லாமல் மெய்ப்பொருளை அறிந்து உன் திருவடியை அடையும் நிலையைத் தருவாய்! 

இங்கு நாகச்சலம் என்பது குண்டலினி விழிப்பைக் குறிப்பது. குண்டலினி விழித்தவன் குளிகனிடம் சிக்க மாட்டான். குளிகனை வசப்படுத்தியவன் ஆவான். இந்தப்பாடலின் பிரயோகம் குளிகை மோகனம் என்பதன் அர்த்தம் முருகனை வழிபட்டு குண்டலினி விழிப்படைந்து சாதாரண மரணமாக குளிகனிடம் பாபக்கர்மங்களில் சிக்காமல் மெய்ப்பொருள் அறிந்து முருகன் திருவடியை அடைவதாகும். 

குளிகை மோகனம் என்பதன் அர்த்தம் பாபக்கர்மங்களை செய்பவர்களின் மரணத்திற்கான காரகனான குளிகனை முருக உபாசனையால் மோகிக்கச் செய்து குண்டலினி விழிப்புடன் மெய்ப்பொருளை அறியும் நிலையைப் பெறுவதாகும். 

இந்தப் பாடலின் மந்திரப் பிரயோகத்தால் ஒருவன் தனது பாபகர்மங்கள் நீங்கி குளிகனால் வரும் மரணம் நேராமல் மெய்ப்பொருள் கண்டு குண்டலினி விழிப்புற்ற யோகியாக மாறுவான்.