கந்தரனுபூதி மந்திரப் பிரயோகம் - 12

*******************************************

களவு வெல்ல - சித்தவிருத்தி அடங்கி யோக சித்தி பெற

 பன்னிரெண்டாவது பாடலிற்கு சித்தர் பிரான் இட்ட மந்திரப் பிரயோகத் தலைப்பு "களவு வெல்ல" என்பதாகும்.  இதன் பிரயோகமாக இரண்டு விஷயங்களைச் சொல்கிறார். என்னிடமிருந்து களவாடப்பட்ட பொருட்களைத் திரும்பப் பெறவும், களவு ஏற்படாமல் பாதுகாக்கவும் என பௌதீகமான களவினைத் தடுக்கும் வழியாக இந்தப் பாடலில் மந்திரப் பிரயோகத்தைச் செய்யலாம். அதேபோல் மனதினை புலன்கள் களவாடிவிடாமல் சும்மா இருக்கும் யோக சித்தியைப் பெறவும் இந்தப்பாடலின் மந்திரப் பிரயோகத்தைச் செய்யலாம்.

யோகத்தின் மிக உயர்ந்த சித்தி சும்மா இருத்தல். இதன் அர்த்தம் மிக ஆழமானது! இதை பதஞ்சலி சித்த விருத்தி நிரோதம் என்று சொல்கிறார். அனேகர் ஆன்மீகம் என்றவுடன் உலகப் பற்றுக்களைத் துறந்து காவியுடை உடுத்திக்கொண்டு, எங்காவது திருவண்ணாமலை, காசியில் சென்று அமர்ந்து விட்டால் மோக்ஷம் பெற்றுவிடலாம் என்று நம்புகிறார்கள். வேறு சிலர் ஒன்றுமே செய்யாமல் புலன் களை அடக்கிவிட்டால் ஆன்ம ஞானம் கிட்டும் என்று நம்புகிறார்கள். ஆனால் இவை ஒன்றும் உண்மையில்லை! கண்களை மூடி, காதைப் பொத்தி ஒரு அறையில் அமர்ந்து கொண்டு புலன் களுக்கு எந்தத் தூண்டுதலும் கொடுக்காவிட்டாலும் உள்ளே நாம் ஏற்கனவே பெற்ற அனுபவத்தால் பதிவு செய்த சித்தப்பதிவுகளிலிருந்து எழும் எண்ண அலைகள் ஒருவனை உண்மையில் சும்மா இருக்க விடாது. யோகத்தில் சும்மா இருத்தல் என்பது நான்கு தளங்களில் நடைபெறவேண்டும். 

புலன் கள் அடங்கிய பிரத்தியாகார சித்தி 

உடல் அசையாமல் தியானத்திற்கு உகந்ததாக ஆசன சித்தி

மூச்சு தீர்க்கமாக கும்பக நிலையை அடையும் பிரணாயாம சித்தி

மனம் ஏகாக்கிரமடைந்த தாரணா சித்தி

இந்த நான் கும் அடைந்தால் மாத்திரமே உண்மையில் சும்மா இருக்க முடியும். இல்லாவிட்டால் சித்தத்தில் எழும் அலைகளால் அலைக்கழியப்படும் ஒருவனாகவே இருப்பான். 

இப்படி சும்மா இருக்க முடியவில்லை என்றால் எமது புலன் களை, உடலின் ஆற்றலை, மனதை இயற்கையான மாயா சக்தி களவாடுகிறது என்று அர்த்தம். இந்தக் களவாடலைத் தவிர்த்து சும்மா இருக்கும் வழியை இந்தப்பாடலில் அருணகிரிநாதர் கூறுகிறார். இனிப்பாடலைப் பார்த்துவிட்டு பிரயோகத்தை உரையாடுவோம். 

செம்மான் மகளைத் திருடும் திருடன்
பெம்மான் முருகன், பிறவான், இறவான்
.சும்மா இரு, சொல் அற .. என்றலுமே
அம்மா பொருள் ஒன்றும் அறிந்திலனே.

செம்மானுடைய மகளாகிய வள்ளியம்மையாரைத் திருடும் திருடன், மிகப்பெரியவன் அந்த முருகன், அவன் பிறவாத, இறவாதவ நித்யன், குருவாக வந்து சும்மா இரு, சொல் அற என்று கூறியவுடன் அதன் பொருள் தெரியாதவனாக இருந்தாலும் அம்மம்மா அதை நான் அனுபவித்தேனே! 

அருணகிரி நாதருக்கு கிடைத்த உபதேச மகா வாக்கியம் சும்மா இரு, சொல் அற என்பதாகும்! இந்த உபதேசத்தின் உண்மை யோக அர்த்தம் அவருக்கு விளங்கவில்லை என்றாலும் உடனடியாக அனுபவத்தில் சித்தத்தின் விருத்தியும், மனம் அடங்கி, அதனால் உருவாக்கு வாக்கும், சொல்லும் அடங்கி மௌன நிலை வாய்த்து யோகசித்தி பெற்றார். இதற்கெல்லாம் காரணம் அந்த பெம்மான் முருகனிடமிருந்து தீக்ஷையாக் கிடைத்த சக்தி நிபாதம். முருகனுக்கு சித்த விருத்திகளை அடக்கி மௌன நிலை தந்து யோக சித்தியைத் தரும் ஆற்றல் இருப்பது எங்கனம்? அவன் இந்தப் பிரபஞ்சத்தில் சலனத்தை ஏற்படுத்து பராசக்தியின் ஆற்ற்லை வேலாக - ஞான சக்தியாகப் பெற்றவன், இச்சைத் தூண்டும் இச்சக்தியாகிய வள்ளியை திருடி தனது கட்டுப்பாட்டில் வைத்திருப்பவன், செயலைத் தூண்டும் கிரியா சக்தியான தெய்வானையை மணந்துகொண்ட பெரியவன். ஆகவே முருகனுக்கு பிரபஞ்சத்தின் அனைத்துச் சலனங்களையும் கட்டுப்படுத்தும் ஆற்றல் உண்டென்பதால் அவன் அருளால் ஒருவனுக்கு சும்மா இரு, சொல் அற என்ற நிலை இலகுவாக வாய்க்கும். 

அதேபோல் இந்தப் பாடலிற்கு பிரயோகமாகச் சொல்லப்படும் "களவு வெல்ல" என்ற உலகியல் தேவையும் சாத்தியமாகும். களவு, திருட்டு என்பது சலனிக்கும் பேராசை மனதின் செயலாகும். இந்தச் சலனத்தை முருகனை வேண்டி பிரயோகம் செய்ய எம்மிடமிருந்து களவு போதலும், களவாடப் பட்ட பொருள் திரும்பலும் நடக்கும் என்பது இதன் அர்தமாம்.