******************************
ஆன்ம சாதனைக்கு மனைவி, கணவன், குடும்பம் ஒத்துழைக்க
****************
ஆனால் தியாகராஜ முதலியால் இந்தப்பாடல் பற்றறுத்து ஆன்ம முன்னேற்றத்திற்கான பிரயோகம் என்று கூறுகிறார்.
உங்கள் மனைவி, பிள்ளைகள் உங்கள் ஆன்ம சாதனைக்குத் துணையாக இல்லாமல் தொல்லையாக இருக்கிறார்களா? அப்படியென்றால் இந்தப் பாடலின் பிரயோகம் உங்களுக்கானது.
பலருக்கு ஆன்ம சாதனைக்கு அவர்களுடைய பந்தப்பட்ட எண்ணமே காரணம்! மனைவி, பிள்ளைகளைப் பற்றி தேவைக்கதிகமான சிந்தனை, தான் இல்லையென்றால் அவர்களுக்கு என்ன ஆகிவிடுமோ என்ற அதீத பயத்தால் ஆன்ம விசாரத்திற்கு நேரம் ஒதுக்காமல், உழைப்பு, குடும்பம் என்று ஓடிய வண்ணம் இருப்பார்கள். இறுதியில் அவர்கள் அப்படி நினைத்த குடும்பம் ஒரு காலத்திற்குப் பின்னர் இவர்களைத் தொல்லையாகக் காணத் தொடங்கும் போது இவர்களுக்காக எப்படியெல்லாம் உழைத்தேன், எனக்கு சிறிதும் மரியாதை தருகிறார்கள் இல்லையே என்று புலம்புவார்கள்.
எம் குரு நாதர் கண்ணைய யோகியார் கூறுவார், மனைவி, மக்கள், உற்றார், உறவினர் என்போருக்காக தனது சாதனையை விட்டுக்கொடுக்காதவனே என் மாணவன் என்று, அதுபோல் மனைவி, பிள்ளைகளுக்கு கடமை செய்கிறேன் என்று தன் ஆன்ம முன்னேற்றத்திற்கு தினசரி வாழ்க்கையில் நேரம் ஒதுக்காதவன் மும் மலங்களால் பீடிக்கப்பட்டவன். சூரபத்மன், சிங்கமுகன், தாரகன் ஆகிய மூவரும் முறையே ஆணவ கன்ம மாயா மலங்களின் உருவங்கள். இந்த மூன்று மலங்களும் வளைபட்ட மாதொடு பற்றுக்கொள்ளும் போது இயல்பாக வரும். குடும்பத்தின் மீது கொண்ட பற்று மாயா சொரூபம். அவர்களை ரட்சித்து காக்கும் முயற்சி கரும பந்தம். என் மனைவி என் மக்கள் என்கிற இடையறாத எண்ணமே
ஆணவம்.
இந்தப்பாடலில் சாதகன் இப்படி மயங்கக்கூடாது என்று சொல்லும் போது வளைபட்ட மாது என்று கணவனின் ஆன்ம முன்னேற்றத்திற்கு அழகு சேர்க்கும் மனைவியைப் பற்றியும் சூசகமாக உரைக்கிறார். எல்லாப் பெண்களும் ஒருவனுக்கு மாயை உருவாக்கி கர்ம பந்தம் ஏற்படுத்துவதில்லை! சில பெண்கள் ஞானத்தை தரும் ஞான சக்தியாகவும் சிலருக்கு வாய்ப்பர்! அதைச் சரியாகப் புரிந்து ஒருவன் வீண்பற்றுக்களை உருவாக்கக்கூடாது என்பதை முதல் இரண்டு வரிகளில் கூறுகிறார்.
இனிப்பாடலை ஒருதடவை படித்துக்கொண்டு உரைக்குச் செல்வோம்.
வளைபட்டகைம் மாதொடு மக்க ளெனும்
தளைபட்டழியத் தகுமோ தகுமோ
கிளைபட்டெழு சூருரமும் கிரியும்
தொளைபட்டுருவத் தொடு வேலவனே
இங்கு அருணகிரி நாதர் நுட்பமாக ஆன்ம விசாரத்திற்கு, இறை சாதனைக்கு மனைவி, பிள்ளைகள் தளையாக ஆக்கிவிடக்கூடாது என்பதை தகுமோ தகுமோ என இரண்டு தடவை விதந்துரைக்கிறார். இரண்டு தடவை கூறப்படின் அது மிக முக்கியமான உபதேசம் என்பது மரபு!
ஆணவ, கன்ம, மாய மலங்களை சூரபத்மனாகவும், சிங்கமுகன், தாரகனாகவும், க்ரௌஞ்ச மலையாகவும் இறைவனை மறைக்க அந்த மலங்களை அந்த வேலன் தனது வேலால் துளைத்து தனது அணியாக - சேவலும், மயிலுமாக - அழகாக்கிக் கொண்டான். அதுபோல் அந்த வேலனை வழிபட ஆணவம், கன்மம், மாயையை உருவாக்கும் குடும்பம் முருகனின் வேல் எனும் ஞான சக்தியால் சாதகனின் குடும்பத்தை ஆன்ம விசாரத்திற்கு ஒத்துழைக்கும் ஞான சக்தியாக மனைவி, குடும்பத்தினரை மாற்றும் வல்லமை உடையது முருக உபாசனை!
இந்தப்பாடலைப் படிக்கும் போது உங்கள் குடும்பத்தினரின் அஞ் ஞானம் அழிந்து, மும்மலங்கள் அழிந்து ஞான சக்தி விழிப்படைவதாக பாவிக்க வேண்டும்!
இதற்குரிய தனியான யந்திரமும் மூல மந்திரமும் உண்டு!
No comments:
Post a Comment
எமது பதிவுகளை FaceBook இல் பகிர விரும்புவவர்கள் தகுந்த இணைப்புடன் பகிரவும். தமது தனிப்பட்ட வலைத்தளங்களில் பகிர விரும்புவபர்கள் தனிப்பட்ட மின்னஞ்சல் மூலம் அனுமதி பெற்று பகிரவும். எழுந்தமானமாக பிரதி செய்து பகிர்வது முறையான செய்கையாக கருதப்படமாட்டாது.