தலைப்பு இல்லை

அன்றொரு காலை வாட்ஸப்பில் ஒரு செய்தி;

உங்களுடைய கட்டுரை பிரபலமான ஒரு சித்தர் குழுவில் அப்படியே பிரதி செய்யப்பட்டு தான் எழுதியது போல் அப்படியே அந்தக் குழு நிர்வாகி பதிவிட்டுள்ளார் என்று!

அதற்கு நான் அளித்த பதில் வருமாறு;

copy பண்ணுதல் என்பது கற்றல் நடவடிக்கையின் முதல் பழக்கம்! சிறுகுழந்தைகளை அவதானித்தால் அவர்கள் முதல் தமது பெற்றோர்கள், உறவினர்கள், ஆசிரியர்களை copy பண்ணுவதையே முதலாவதாகச் செய்வதை அவதானிக்கலாம்! ஆகவே அவர் கற்றலின் முதல் நிலையில் இருக்கிறார் என்றேன் பெருஞ்சிரிப்புடன்    

இல்லை ஐயா, கட்டாயம் உங்கள் பெயர் போடப்பட்டிருக்க வேண்டும் என்றார் என் மீது அன்பு கொண்ட அன்பர்; 

அதற்கு நான் சிரித்துக் கொண்டு சொன்ன பதில்; அவர் எனது சிந்தனைகளை, எண்ணங்களைப் பரப்பும் ஒரு கருவியாக செயற்படுகிறார்; அதில் எனது பெயர் இருந்தாலும், இல்லாவிட்டாலும் எனது எழுத்துக்குரிய சக்தி - signature கட்டாயம் இருக்கும். நான் எழுதுவது எனது சந்தோஷத்திற்கு! எழுதிப் பதிவிட்ட பிறகு அதைப்பற்றி நான் சிந்திப்பதேயில்லை; 

மேலும் எனது எழுத்துக்கள் என்று நாம் நினைத்துக் கொண்டிருப்பதும் பிரபஞ்சத்தில் எங்கோ மிதந்து கொண்டிருப்பதைத் தான் ஈர்த்து எழுதுகிறோம்! எல்லோரும் எங்கோ ஒரு மூலத்திலிருந்தே பெறுகிறோம்! 

யோகத்தைப் பற்றி எழுதப்படும் எழுத்துக்களைப் பிரதி எடுத்து தமதாக காட்டிக்கொள்வதில் பலரைக் கவரலாம்; பலரைக் கவர்ந்து கூட்டம் கூட்டினால் ஆன்ம முன்னேற்றம் வாய்க்காது! அது அவரது அனுபவமாக வேண்டும். இப்படி தனக்கு எல்லாம் தெரியும் என்று மக்களின் மனதிற்கு கோட்டை கட்டிக் கொண்டிருந்தால் அவற்றைக் காப்பாற்றவே தவறுக்கு மேல் தவறு செய்து கொண்டிருக்க வேண்டும்! இப்படிச் செய்து கொண்டிருந்தால் உளச்சுத்தி வாய்க்காது! ஆன்மீகமும் சித்திக்காது!

இப்படியானவர்களை நாம் குழந்தைகளைப் போல் மதிக்க வேண்டும்; எல்லோரிலிருந்தும் பிரதியெடுத்து தமது அறிவினை உருவாக்கிக் கொண்டு இருக்கிறார்கள்; சற்று வளர்ந்தவுடன் தமது சிந்தனை சக்தி பெருகிய பின்னர் ஏதாவது உலகிற்குத் தருவார்கள்.

எதை நாம் கொண்டு வந்தோம், எம்முடையது என்று சொல்வதற்கு! Facebook தந்த ஞானம் அனைத்தையும் share செய் என்பதே! 

ஆகவே என்னுடைய கட்டுரைகளை பிரதி எடுப்பவர்கள் தாராளமாக பிரதியெடுங்கள்! பகிருங்கள்! எமக்கு credit தந்தால் மிக்க மகிழ்ச்சி! அப்படித்தராவிட்டாலும் மிக்க மகிழ்ச்சிதான்! எமது எழுத்துக்களைப் பலருக்கும் கொண்டு செல்லும் உங்களுக்கு எமது நன்றிகளும்! பிரார்த்தனைகளும்! 

அதேவேளை நீங்கள் பிரதியெடுத்த அறிவை உங்களுடையதாக்கிக் கொண்டு புது அறிவினை உருவாக்க முயலுங்கள்! அதுவே நீங்கள் உங்களுக்கும், மற்றவர்களும் செய்யும் பெரும் தொண்டு!