தலைப்பு இல்லை

ஒரு இனம் விடுதலையை வேண்டின் அது தனது சமூக மனதைச் செம்மைப்படுத்தி விழுமியங்களை உருவாக்க வேண்டும் என்பதை இந்திய சுதந்திரப் போராட்டத்தின் சமூகவிடுதலைக்கான தத்துவவியலாளர்கள் கற்றுத் தந்திருக்கிறார்கள்!

எண்ணங்களிலும், முன் துணிபுகளிலும் இருந்து விடுதலையுற்ற மனமும், அதனால் கட்டமைக்கப்பட்ட இனமும், அதன் விழுமியமும் தனது சமூகத்திற்கு மாத்திரமல்ல மனித குலத்திற்கு பங்களிக்க வேண்டும். 

இருப்புக்கான காரணம் (purpose of existence) ஒவ்வொன்றும் கொண்டிருக்கும் விழுமியத்தில் (value) இருந்து உருவாகிறது! சிலது மறைகின்றன என்றால் அதன் இருப்புக்கான காரணமும், அதன் விழுமியமும் சமூகத்தில் இல்லாமல் போகும் அளவிற்கு அவர்களது கொள்கைகள் வலிமையற்றவர்கள் என்றுதான் அர்த்தம்! 

தமக்குள்ளேயே அதிகாரத்திற்கு அடிபடும் மனமும், உள்வீட்டுச் சண்டையில் நேரம் வீணாக்கும் இனமும் அதிகாரத்தை அடைந்து தமது சமூகத்திற்கு எதைப் பங்களிக்கப்போகிறார்கள்?

தமக்கு வெளியே எதிரி இருக்கிறான் என்று பழைய சூழல் அனுபவத்திலேயே மனதை ஸ்தம்பிக்கச் செய்துவிட்டு கற்பனையில் வாழ்ந்துகொண்டு, யதார்த்த சூழலைக் கூர்ந்து அவதானிக்காமல், குறைகூறிக்கொண்டு இருக்க எதிரி என்று கற்பித்தவன் தனது விழுமியத்தையும், குறைகளையும் மாற்றிக்கொள்ள, நாமோ இன்னும் பழைய ரீலையே ஓட்டிக்கொண்டிருந்தால் சிந்திக்கவும், அவதானிக்கவும் தெரியாதவர்கள் ஆகிறோம். 

தன்னைவிட அறிவில் சிறந்தவனை, ஆற்றலில் சிறந்தவனை எப்படி சமூக நன்மைக்குப் பயன்படுத்தமுடியும் என்று சிந்திக்கத்தெரியாமல் உள்ளூர தாழ்வு மனப்பான்மையுடன் புத்திஜீவிகளை ஒதுக்கி அரசியல் செய்யும் தலைமைகள் எப்போதும் நிலைத்திருப்பதில்லை! 

கேள்வி கேட்பவர்களை முட்டாள்களாகவும், எதிரிகளாகவும், துரோகிகளாகவும் முத்திரை குத்தப் பழகிய மனங்களுக்கு அதைத்தாண்டி தூரதரிசனமான சிந்திக்கும் ஆற்றல் வாய்ப்பதில்லை!

குறுகிய மனப்பாங்கிலிருந்து வெளிவருவதுதான் தமிழ்ச்சமூகத்தின் தற்போதைய தேவை! குண்டுச் சட்டி குதிரை மனங்கள் ஆபத்தானவை! 

குறிப்பு:

இந்தப்பதிவு இலங்கைத் தமிழ் அரசியலைப் பற்றியது அல்ல!