இராவணன் தமிழனா?

நண்பர் ஒருவரின் கேள்வி?

இது ஒரு அர்த்தமற்ற கேள்வி! நாத்திகர்கள் கட்டிய கற்பனைக் கோட்டைகளின் இன்னுமொரு வடிவம்! கடவுள் இல்லை என்று எண்ணும் நாத்திகர்களுக்கு இராவணனுடனும், நரகாசூரனுடனும் என்ன வேலை! கடவுள் இல்லை என்ற பின்னர் அசுரனும் இல்லைத்தானே! ஒரு நாணயத்தின் ஒருபக்கம் இல்லை என்றால் மறுபக்கமும் இல்லைத்தானே! 

காப்பியங்கள் மனிதரின் மனநிலைகளை படம்பிடித்துக்காட்டுவதற்கும், மக்களை நன்மை, தீமை, சமூக நியதி என்பவற்றை மனதிற்குப் புகட்ட எடுத்துக்கொள்ளப்பட்ட உருவகங்கள்! வாழ்ந்த ஆளுமைகளை மனநிலைக்கு ஏற்ற விதத்தில், பார்வைகளுக்கு ஏற்ற வகையில் கதை கதையாக எழுதி வைத்திருக்கிறார்கள் எமது மனநிலையை உணர்த்த, உயர்த்த! இந்தக்கதைகளைப் படிக்கும் போது எமது மனநிலைக்கு ஒத்த பாத்திரங்களுடன் ஒன்றி நமக்குரிய மனதின் கட்டமைப்பை, வழிகாட்டலைப் பேணமுடியும்! 

இந்த அடிப்படையில் கதைகளை, இதிகாசங்களை எடுத்துக்கொள்ள வேண்டும். ஆக இராவணனின் மனநிலை உடையவர்களுக்கு அவர்கள் இராவணனின் வழித்தோன்றலாகவும்; இராமரின் மனநிலையுடையவருக்கு இராமர் வழித்தோன்றலாகவும் தோன்றும்! அவ்வளவுதான்! இதில் உயர்ந்ததும் இல்லை, தாழ்ந்ததும் இல்லை! அவரவர் மனநிலை! தம்மை எப்படித் தொடர்புபடுத்திக் கொள்கிறோம் என்பதைப் பொறுத்தது! 

பல காலத்திற்கு முன்னர் ஒரு தமிழ் திரைப்படத்தில் ஆக்கிரோசனாமான, திறமையான பொலிஸ் அதிகாரி வில்லனை தைரியத்துடன் எதிர்கொள்ளும்போது வில்லன் அவனைப் பார்த்து உள்ளூர இரசித்துக் கொண்டு அவன் நம்ம சாதிக்கார பயலுதான், காதைப் பாரு துடிக்குதிலே என்பார், ஆனால் பொலிஸ்காரனோ வில்லனை அழிக்கும் வேலை பார்த்துக்கொண்டிருப்பான், கடைசியில் வில்லனை அந்த பொலிஸ்காரன் அழித்துவிடுவான்! 

இதைப்போல ஒரு மனநிலை தான் இராவணனை தமிழனாக்கி இரசிப்பது! 

இதிகாச வரலாற்றுப்படி பிரம்மாவின் மகன் புலஸ்தியர், புலஸ்தியர் மகன் வைச்ரவ, வைச்ரவ மகன் இராவணன், இராவணன் பிரம்மாவின் 04ம் தலைமுறை! 

பிரம்மாவின் இன்னொரு மகன் மரீசீ, மரீசீயின் மகன், காஷ்யப்பர், அவர் மகன், விஸ்வான், அவர் மகன் மனு, அவர் மகன் இஷ்வாகு இப்படி 67வது தலைமுறையில் ஸ்ரீ இராமர் உதிக்கிறார். 

ஆக இதிகாசப்படி பார்த்தால் இராவணன் ரிஷி கோத்திர வழிவந்த ஒரு பிராமணன்!