தலைப்பு இல்லை

விழுமியம் (Value) சமூகத்தினைக் கட்டமைப்பதற்குரிய அடிப்படை அத்திவாரக்கல்! 

உலகத்துடன் ஒத்திசைந்து வாழக்கூடிய விழுமியங்களை சமூகங்கத்தின் அத்திவாரமாக கொண்டிருக்கும் சமூகத்தின் மீதுதான் கல்வி, பொருளாதாரம் வளர்ந்து தேசம் - இனம் என்ற ஒன்று உருவாக்கப்பட முடியும்! விழுமியங்கள் பிழையாக இருக்கும் போது அந்த விழுமியங்களைத் தகர்த்தால் சமூகம் என்ற பெறுமானம் அற்றுப்போகிறது! 

பின்னர் கல்வி மேம்பாடும் அறிவு விருத்தியும், அதன்பின்பு தொழிலும் பொருளாதாரமும் மேம்பட்ட நிலையும் சமூகத்திற்குள் ஏற்படும் போது மட்டுமே அந்தச் சமூகம் அதிகாரத்தைக் கையாளும் தகுதியைப் பெறுகிறது! கல்வியை மாத்திரம் வைத்துக்கொண்டு பொருளாதாரம் இல்லாத சமூகம் தன்னை நிலை நிறுத்த முடியாது. அதுபோல் தனியே பொருளாதாரமும், செல்வமும் உள்ள சமூகம் அதை சரியான வழியில் பிரயோகித்து நல்ல நிலையை அடையவும் முடியாது. 

ஒரு சமூகம் தனக்குரிய விழுமியங்களை வரையறுத்து அந்த விழுமியங்களுக்குரிய கல்வியும், பொருளாதார நிறைவினூடாக தனக்குள் இருக்கக்கூடிய கருத்தியல் குழப்பங்களைத் தீர்த்துக்கொண்டு சம நிலைக்கு வந்து, தாம் ஒரேயொரு சமூகக்குழு மாத்திரம்தான் உலகத்திலிருக்கிறோம் என்ற கிணற்றுத்தவளை மனநிலையிலிருந்து வெளிவந்து நாம் சார்ந்திருக்கக் வேண்டிய, விலகியிருக்க வேண்டிய, எம்மைத் தாக்கம் செய்யக்கூடிய சமூகங்களுடன் இடைத்தொடர்படைந்து சமநிலையுடன் நீடித்து நிலைத்திருக்கும் ஆற்றலைப் பெற்றதன் பிறகுதான் அது அதிகாரத்தைத் திறம்பட முகாமைத்துவம் செய்யும் ஆற்றலைப் பெறும்.

தனிமனித மனநிலையில் அதியாசையும் (craving), கூட்டுச் சமூக நிலையில் அதிகாரத்தை அடைந்துவிட வேண்டும் என்ற பேரவாவும் சரியான தடுப்பு (Break) இல்லாமல் அதிவேகப்பாதையில் வாகனம் ஓட்டி விபத்து உண்டாக்கும் நிலைதான்! 

தான்சார்ந்த சமூகத்திற்குள் தொடர்பாடி கருத்தினை ஏற்றுக்கொண்டு ஒரு திசையில் செலுத்தவல்ல தலைமைத்துவமும், தெளிவும் அவசியம்! கருத்தை எதிர்த்து வாதம் செய்யும் அதேவேளை எதிர்க்கருத்தைக் கூறுபவருடன் எந்தவித தனிப்பட்ட பகையுணர்ச்சியும், தனிமனித தாக்குதலும் செய்யாமல் இருவரும் ஒரு நோக்கத்திற்காக பாடுபடும் இருவேறு பாதைகள் என்ற தெளிவு இருத்தல் அதிமுக்கியம்! 

இப்படியில்லாமல் தமக்குள்ளேயே ஒத்திசைவைப் (Harmoney) பேணமுடியாத சமூகம் அதிகாரத்தை எப்படி அடையப் போகிறது? அடைந்த பின்னர் தக்கவைத்துக்கொள்ளப்போகிறது என்ற ஆய்வு மிக அவசியமானது!