அனைவரும் தினசரி செய்யக் கூடிய எளிய யோகப்பயிற்சி

============================================================================
ஓம் அகத்திய மாமகரிஷி குரவே நமஹ

ஓம் கண்ணைய யோகீஸ்வர குரவே நமஹ

ஓம் காயத்ரி சித்த குரவே நமஹ

======================================================================================

மேலதிக விபரங்களுக்கு இந்த பதிவினையும் பாருங்கள்:

மூச்சின் சூட்சுமம் அறிதல் - பிராணாயாம அடிப்படைகள்

============================================================================

இன்றைய உலகில் யோகா பழகிறேன் என்று சொல்வது ஒருவித நாகரீக சொல்லாகிவிட்டது. அதேவேளை யோகம் என்பது கடினமானது எல்லாராலும் பழகமுடியாதது என்றும் பலமான கருத்து உண்டு. ஏனெனில் யோகப்பயிற்சிகள் கடினமானவை, இயமம், நியமம் என்பன கடைப்பிடிப்பதற்கு கஷ்டமானவை. தினசரி அலுவலகவேலைகள், படிப்பவர்கள் இதையெல்லாம் எப்படி செய்வது! தனியாக நேரம் ஒதுக்கி கற்கவியலாது, ஆதலால் யோகம் செய்வது எமது தினசரி வாழ்க்கையுடன் சரிவராது என மனம் சலித்து போயுள்ளவர்களுக்கு எமது குரு நாதர் உபதேசித்த மிக எளிமைப் படுத்தப்பட்ட ஆனால் சக்தி வாய்ந்த யோகப் பயிற்சி ஒன்றினை இந்த பதிவில் குருவருளுடன் வெளிப்படுத்துகிறோம்.

இந்தப்பயிற்சி மிக இலகுவானது, சிரத்தையும் ஆர்வமும், பொறுமையுமே இதற்கு தேவையான தகுதிகள். இது அஷ்டாங்க யோகத்தின் பிராணாயமம், பிரத்தியாகாரம், தாரணை ஆகிய மூன்று அங்கங்களையும் ஒருங்கிணைத்த எளிமைப்படுத்தப்பட்ட பயிற்சியாகும். மற்றைய சாதனைகளால் விளையக்கூடிய அனைத்து பயன்களும் மெதுவாக ஆனால் நிச்சயமாக வரும்.

நீங்கள் எந்தக்கருத்துடனும் இந்த பயிற்சியினை செய்ய முன்வந்தாலும் இதனை கூறப்பட்ட நியமத்துடன் செய்து வருவீர்களேயானால் இந்தப்பயிற்சி உங்களுக்கு ஒரு புதுத் தெம்பையும், வாழ்வில் மறுமலர்ச்சியினையும், மனதில் உற்சாகத்தினையும் கொடுக்கும் என்பதனை உறுதி கூறுகிறோம்.

பயிற்சி

தினசரி காலை, மாலை குறித்த நேரத்தில் ஓர் அமைதியான இடத்தில் உடலை தளர்ச்சியாக வைத்தவண்ணம் அமர்ந்து கண்மூடி இயற்கையாக நடக்கும் மூச்சை ஆழ்ந்து கவனித்தபடி இருக்கவும். இதற்காக மூச்சை கட்டுப்படுத்தவோ, அதிகம் இழுக்கவோ, மாற்றவோ வேண்டாம். இயற்கையாக வரும் சுவாசத்தை கவனித்தால் மட்டுமே போதும். மற்றும்படி வேறெந்த முயற்சியும் தேவையில்லை. உங்களால் இருக்ககூடிய கால அளவிற்கு இருக்கவும். பயிற்சி கூட கூட பயிற்சியினால் பெறும் ஆனந்தத்தில் அதிகளவு நேரம் இருக்ககூடிய தன்மை வரும்.

இவற்றின் பலன் இன்னது என பட்டியலிடுவது ஒவ்வொருவரது சுய அனுபவத்தினையும் பாதிக்குமாதலால் செய்து பயன் பெற்றபின்னர் எமக்கு அறிவித்தால் மகிழ்வடைவோம். இந்த பயிற்சியினை செய்து ஆர்வமுடன் மற்றைய எளிய பயிற்சிகளையும் செய்ய விரும்புவபர்களுக்கு அவற்றின் விபரம் பகிர்ந்து கொள்ளப்படும்.

இதையே அஜபா ஜெபம் என்பர், இந்த அரிய சாதனையை மட்டுமே செய்து சித்தி பெற்ற சாதகர்கள் பலர் உண்டு என குருதேவர் கூறியுள்ளார். இந்த சிறிய அருட் சக்தி நிறைந்த அரிய சாதனையினை செய்துவாருங்கள்.

உங்கள் சந்தேகங்களை, கேள்விகளை பின்னூட்டமிடுங்கள் இதுதொடர்பான அனைத்துக்கேள்விகளுக்கும் பதிலளிக்கப்படும்.