ஸ்ரீ சனீஸ்வரர் பெருமை - சனீ தோஷத்திற்கு ஓர் எளிமையான பரிகாரம்!

இந்தப் பதிவினை படிக்கு முன் கட்டாயம் கீழ்வரும் இணைப்புகளை படித்தபின் வாசிக்கவும்

சனிபெயர்ச்சியும் சனி பகவான் தோஷத்திற்கான‌ எளிய பரிகார முறையும்

சனீஸ்வர மஹாத்மியம் - எளிய பரிகாரமுறை

============================================================================

முன்னொரு காலத்தில் மாவீரன் விக்கிரமாதித்தியன் உஜ்ஜனி எனும் நகரை ஆண்டு வந்தான், அவன் மிகுந்த இரக்க முடையவனும், அறிவாற்றலும் உள்ள அரசன். அவன் பல கலைகளை கற்று தேர்ந்ததுடன் அந்தக்கலைகளில் விற்பனராகிய அறிவாளிகளை மிகுந்த மதிப்புடன் தனது அவையில் வைத்திருந்தான். தனது குடிமக்களை தந்து சொந்தப் பிள்ளைகள் போல் கருதினான். அதுபோல் மக்களும் தமது அரசனை தமது தந்தைபோல் மதித்து போற்றி வந்தனர். ஆகவே அவனது அரச எல்லைக்குட்பட்ட அனைத்துக் குடிமக்களும் மிக்க மகிழ்வுடனும் மன நிறைவுடனும் வாழ்ந்து வந்தனர். 

பத்துத் திசைகளிலுமிருந்து தேனுடைய பூக்களை நோக்கி வண்டுகள் வருவது போல் அவனது அறிவாற்றலும், அறிவைத் தேடும் பண்புகண்டு அவனது காலத்திலிருந்த அனைத்து துறைசார் அறிஞர்களும் அவனை நோக்கி வந்தனர். அரசனும் தன்னை அண்டி வந்த அனைத்து அறிஞர்களையும் தக்க மரியாதை செலுத்தி அவர்களுடன் கருத்துப்பகிர்ந்து தனது அறிவையும் வளர்த்துக்கொள்வதை பெரும் மகிழ்வுடன் செய்து வந்தான். 

அதாவது தற்காலத்தில் பேராசிரியர்கள் ஒவ்வொரு துறைக்கும் நியமிக்கப்பட்டு ஆண்டுகொருமுறை கலந்துரையாடல் நடத்தும் முறையினை தனது அரச அவையில் ஏற்பாடு செய்து தானும் அதில் ஒருவனாக பங்குபெற்றி வந்தான். அரசியல், சமயம், தத்துவம், மருத்துவம் என பலதுறைகளில் கலந்துரையாடல் செய்து அறிவு பரவ வழி செய்தான். 

இப்படியாக அறிவுபரவச்செய்து வரும் பல கலந்துரையாடல்கள் நடாத்தி வந்தான். மன்னனோ மற்றவர்களோ தமது கருத்தினை, சந்தேகங்களினை அவையினர் முன் வைப்பார்கள், அவற்றிற்கு மன்னன் விக்கிரமாதித்தியன்  உட்பட மந்திரிகள், பண்டிதர்கள், தாந்திரீகர்கள், ஜோதிடவிற்பனர்கள் போன்ற துறை சார்ந்த அறிஞர்கள் தமது கருத்தினை தெளிவு படுத்துவர், ஒரு நாள் இப்படியான அறிஞர்கள் குழுமியிருந்த அவையில் விக்கிரமாதித்தியன் தனது சந்தேகம் ஒன்றினை முன் வைத்தான்; அது ;

நவக் கிரகங்களில் முதன்மையானவர் யார்? என்பது!

அந்த அவையில் வராஹமிரர் போன்ற ஜோதிட சாஸ்திரத்தில் கரைகண்ட ஜோதிட ஞானிகள் பலர் இருந்தனர், அவர்கள் ஒவ்வொருவரும் ஒவ்வொரு கிரகத்தினையும் உபாசித்து அந்த கிரகம் தொடர்பான அறிவையும் அந்த கிரகத்துக்குண்டான அருளையும் ஞானத்தினையும் பெற்றிருந்தனர். அவர்கள் ஒவ்வொருவரும் மன்னனது இந்தக் கேள்விகளை தங்களது பக்கங்களிலிருந்து அணுக தயாராகினர். விக்கிரமாதித்திய மன்னனும் மன்னனது அவையினரும் ஆவலுடன் அந்த விற்பனர்களது பதிலினை கேட்க ஆவலாயினர்! 

நாமும் ஆர்வமுடன் அவர்கள் என்ன சொல்லப்போகிறார்கள் என்பதனை நாளை பார்ப்போம்!