அர்த்த சாஸ்திரம் - முதல் ஸ்லோகம்

ஓம் நம; சுக்கிர ப்ருஹஸ்பதிப்யாம் 

சென்ற பதிவில் ஓம் ஏன் என்ற விளக்கம் பார்த்தோம்! 

ஓம் இற்கு அடுத்து சுக்கிரனும் பிரஹஸ்பதியும் வணங்கப்படுகிறார்கள்

சுக்கிரனையும், பிரஹஸ்பதியையும் ஏன் குறிப்பிடப்படுகிறார் என்றால் அர்த்த சாஸ்திரத்துடன் உள்ள தொடர்பை விளங்கிக் கொள்ளப்பட வேண்டும். ரிஷி பரம்பரையில் இந்த பிரபஞ்சத்தின் "அர்த்தம் எனும் பொருள் உடைய வாழ்க்கையை - செல்வத்தை அடைய இரண்டு வழிகளே உண்டு. அவை

நல்ல வழி - பிரபஞ்ச மூல இயக்கத்துடன் ஒத்திசைந்து பெறுவது நல்வழி. 

தீய வழி - பிரபஞ்ச மூல இயக்கத்தை எதிர்த்து பலம் பெறுவது தீய வழி. 

நல்வழி கடைப்பிடிபோர் தேவர் என்றும், தீயவழி கடைப்பிடிப்போர் அசுரர் என்றும் கூறப்பட்டனர். 

ஆனால் இது நன்மை, இது தீமை என்று எப்போதும் தெளிவாக கோடிட்டு பிரித்து விட முடியாது. நன்மையில் நன்மையும், தீமையும் கலந்தே இருக்கும். நல்லவர் தீயவராகவும், தீயவர் நல்லவராகவும் மாறி மாறி மனதின் பிடியில் மாறிக் கொண்டிருப்பதே இயல்பு வாழ்க்கை!

ஆகவே வாழ்க்கையை நடத்த எது சரி எது பிழை எனக் கூற ஞானம் பெற்ற குரு அவசியம். நல்லவை மட்டுமே அர்த்தத்தை அடைய வழிகாட்டுவோம் என்ற வைராக்கியமுடைய நல்லவர்கள் பிரஹஸ்பதி என்ற தேவகுருவால் காட்டப்படுகிறார்.

கெட்டவரும் ஒரு நாள் நல்லவராவார் என்ற உயர்ந்த மனப் பண்புடன் வழிகாட்டும் குரு சுக்கிரனாக காட்டப்படுகிறார். 

சுக்கிரன் பிரம்மாவின் பேரன், பிருகு மகரிஷியின் மகன். சிறு வயதில் பிரகஸ்பதியின் தகப்பனான அங்கிரஸ் மகரிஷியின் கீழ் பிரகஸ்பதியும் சுக்கிரனும் கல்வி கற்கின்றனர். பின்னர் அங்கிரஸ் மகரிஷியின் தன் மகன் மீதான ஒரு தலைப்பட்சமான கவனிப்பால் கௌதம மகரிஷியிடம் கற்று தனது தவத்தின் மூலம் சிவபெருமானிடம் சஞ்சீவனி மந்திர உபதேசம் பெறுகிறார். பின்னர் அந்த உயர்ந்த வித்தையை தனது போட்டியாளனான பிரஹஸ்பதியின் மகனான கசனுக்கு, அவனது தகுதி கண்டு உபதேசிக்கிறார்.

இப்படி நன்மையும் தீமையும் போட்டியிடும் வாழ்க்கைக்கு வழிகாட்டும் அறிவு சக்தியே சுக்கிரனும், பிரஹஸ்பதியுமாக சுட்டிக் காட்டப்படுகிறார்கள். இந்த அறிவு சக்தியை பிரயோகித்தே மனித சமூகம் வளர்ந்திருக்கிறது. தீயதை செய்பவனை தனது சஞ்சீவினி வித்தையின் மூலமும் எல்லாம் வல்ல சிவனின் அருளாலும் நல்ல நிலைக்கு கொண்டுபோகின்றவர் சுக்கிரன். ஆக சுக்கிரன் அனைவரிலும் கருணை கொண்டவர். 

நல்ல நிலை எனப்படும் தேவ நிலை அடைந்த பின்னர் அந்த நிலையை தவறவிடாமல் இருக்க உதவுபவர் தேவ குரு பிரஹஸ்பதி!

ஆக சுக்கிரனும் பிரஹஸ்பதியும் மனித வாழ்க்கையில் நிகழும் நன்மையை வழி நடத்தும் அறிவு சக்திகள்! ஆகவே அர்த்த சாஸ்திரத்தை ஓம் என்ற பிரபஞ்ச சக்தியின் அதிர்வுடன் ஒத்திசைந்து, மனித மனதில் நிகழும் நன்மை, தீமைகளை வழி நடத்தும் அறிவு சக்திகளான சுக்கிரன், பிரஹஸ்பதியை நினைத்து அர்த்த சாஸ்திரத்தை தொடங்குகிறார்.

இதுவே இந்த ஸ்லோகத்தின் மீதான ஸ்ரீ ஸக்தி சுமனனாகிய எமது அபிப்பிராயம்.