தலைப்பு இல்லை

வாசிப்பது ஒரு நல்ல போதை! அதுவும் எம்மை நாமே புரிந்துகொள்ளும் அறிவைத் தரும் நூற்கள் வாசிப்பது இரட்டிப்பு மகிழ்ச்சியைத் தரும் போதை! 

இன்றைய வாசிப்பு Neuroplasticity தொடர்பானது, Neuroplasticity என்றால் மூளை தன்னை தொடர்ச்சியாக புதுப்பித்துகொண்டு உருவாக்கிக்கொண்டிருக்கும் தன்மையைக் குறிக்கும் சொல்! 

பலகாலமாக மூளை பழுதடைந்தால் அவ்வளவுதான் அது மீளுருவாக்கம் பெறாது என்ற கருதுகோள்தான் நம்பப்பட்டது. ஆனால் இப்போது மூளை தன்னைப் புதுப்பித்துக் கொள்கிறது என்பது உறுதிப்படுத்தப்பட்டுள்ளது. 

மருத்துவர் Doidge இந்த நூலின் மூலம் மூளைப்பாதிப்புகளில் இருந்து வெற்றிகரமாக மீண்டுவந்த கதைகளை சொல்லுகிறார். 

இந்த நூலில் உள்ள "Rewiring the brain with light" என்ற அத்தியாயம் மிகச் சுவாரசியமானது. பண்டைய எகிப்திய, இந்திய நாகரீகத்தில் சூரிய வணக்கம் இருப்பது மூளையினை மீள் கட்டமைப்பதற்குரிய வழி என்பதை தற்போதைய நவீன ஆய்வுகளின் படி மூளையில் ஊடுருவும் ஒளி அலைகள் Neuro-plasticity தன்மையின் மூலம் மூளையை மீள்கட்டமைக்கும் தன்மை உடையது என்று அறியபட்டுள்ளது. இந்த அறிவை பண்டைய நாகரீகங்களான எகிப்தும், இந்தியாவும் பெற்றிருந்திருக்கிறார்கள் என்கிறார். (பக்கம் 119). 

காயத்ரி உபாசனையில் புத்தியைத் தூண்டும் அந்தப்பேரொளியை எம்மில் இருத்தி தியானிப்போமாக என்ற அர்த்தம் மூளையினை ஒளியின் மூலம் மீள் கட்டமைத்துக்கொள்ள என்பது விளக்கமாகிறது. 

சாத்திரங்கள் பாவகாரியங்கள் செய்தால் பிராயச்சித்தமாக சூரியனைத் தியானித்து ஆயிரம் காயத்ரி ஜெபித்து விடு பாவம் பிராயச்சித்தமாகிவிடும் என்று கூறுவதன் அடிப்படை இதுதான் எனலாம். பாவங்கள் எனப்படுபவை மூளையின் சம நிலையைக் குலைக்கும் உணர்ச்சிவசப்பட்ட செயல்கள், இவற்றைச் செய்த மூளை மீண்டும் சமப்பட்டு சரியான நிலைக்கு வர இந்தப்பயிற்சிகள் உதவுகின்றது எனக்கொள்ளலாம்! ஆகவே தவறான காரியத்தைச் செய்து மூளையைக் கெடுத்தவர்கள் தனது மனதினதும் சூரிய ஒளியின் உதவியினையும் கொண்டு தனது மூளையைச் சமப்படுத்திக்கொள்ளலாம். 

நாம் நினைப்பதைப்போல் எமது தோல், மண்டையோட்டுடன் சூரிய ஒளி நின்று விடுவதில்லை, இவற்றைத்தாண்டி ஒளி மூளையில் புகுந்து மூளையை மீள் கட்டமைக்கும் செயலைச் செய்கிறது என்கிறார் ஆசிரியர்!

எமது மூளையினதும் உடலினதும் ஆற்றல்கள் அபாரமானது!