குரு அகத்திய காயத்ரி சாதனியும் நவக்கிரக தோஷங்களும்

வணக்கம் ஐயா,

நான் தங்களின் blog ஐ தொடர்ந்து படித்து வருகிறேன். நான் நவகிரக காயத்ரி சாதனை - சந்திர காயத்திர மந்திர சாதனை துவங்க ஆவலாய் உள்ளேன். தினமும் சந்திர ஓரையில் சாதனை பண்ண இயலாவிட்டால் வேறு உகந்த நேரத்தில் பண்ணலாமா ? அல்லது சந்திர ஹோரையில்தான் கட்டாயம் சாதனை புரியவேண்டும் ?

அன்பரே,

சாதனை மூலம் எங்கள் பிரச்சனைகளைத் தீர்க்கலாம் என்பது உண்மை! ஆனால் அது நாமாக பொதுவாக நம்பிவரும் நம்பிக்கைகளிலிருந்து வேறுபட்ட ஒரு ஒழுங்குபடுத்தப்பட்ட ஒழுக்க முறை. இதன் அடிப்படை குறித்த சில காலத்திற்கு (மாதங்களுக்கு, வருடங்களுக்கு) சிரத்தையாக தினசரி சாதனை செய்யும் அர்ப்பணிப்பு இருக்க வேண்டும்.

தற்போதைய fast food யுகத்தில் இருக்கும் எமக்கு அதைப்போன்ற துரித பரிகாரங்கள் போன்று எமது மனம் விரும்பிய விஷயங்களை நம்பிச் செய்யும் முறை அல்ல சாதனை.

சாதனைக்கு என்று ஒரு ஒழுங்கு இருக்கிறது, அதன்படி எமது அந்தக்கரணங்கள் (மனம், புத்தி, சித்தம், ஆங்காரம்) கட்டியமைக்கப்படும் போது நாம் அந்த பரம்பொருளின் பேரோளியை ஏற்றுக்கொள்ளும் பண்பும், ஆற்றலும், வலுவும் உள்ளவர்களாக இருப்போம்.

இந்தப்பரம்பொருளின் பேரோளி எம்மில் சேரத்தொடங்க நாம் முதலில் எமது மனதின் பிடியிலிருந்து வெளிவருவோம். பிறகு புத்தி தெய்வ உருமாற்றம் பேறுவதால் சித்த விருத்தியின் பிடியிலிருந்து வெளிவருவோம். இந்த இரண்டும் சரியாக நடைபெறும்போது எமது பிராண சக்தி இழப்புக் குறைந்து விடுவதால் உடல் அதிக உயிர்ப்புடன் நோய்கள் குணமாகும்.

இப்படி நடைபெறுவதற்கு ஒவ்வொருவருடைய அந்தக்கரணத்தின் அமைப்புக்கு ஏற்றவகையில் சாதனையின் காலம் வேறுபடும். பலரும் அதிக ஜெபத்தின் மூலம் துரிதமாக தமது அந்தக்கரணங்களை மீளமைத்துக்கொள்ள முடியும், பிரச்சனைகளில் இருந்து மீண்டு விட முடியும் என்று நம்புகிறார்கள். இது முழுமையான உண்மை அல்ல!

எமது மனம்-புத்தி-சித்தம் உடனடியாக சாதனையினை ஏற்றுக்கொள்ளாது; அதிக சந்தேகங்கள், குழப்பங்கள், அதிஆவல், அதிஆசை, பயங்கள், உணர்ச்சிகளும் சாதனயுடன் போராடத்தொடங்கும். இந்தப்போராட்டத்தில் வெற்றிபெற சீரான நீண்டகால தினசரி சாதனை அவசியம்! இப்படி நீண்டகால தினசரி சாதனையினூடாக எம்மை நிலை நிறுத்திக்கொண்டு குறித்தளவு ஜெப எண்ணிக்கையையும் பூர்த்தி செய்யும் போது எமது வாழ்கைப் பிரச்சனைகளுக்கு சாதனை தீர்வினைத் தரும்.

இது நீங்கள் தெரிந்துகொள்ள வேண்டிய அடிப்படை!

இனி அந்தக்கரணங்களை சமப்படுத்தினால் எமது 90% பிரச்சனை தீர்ந்தாலும் எமக்கு வெளிச்சூழல் சில பாதிப்புக்களைத் தரும், இவற்றுள் முக்கியமானவை நவக்கிரக தோஷங்கள் எனப்படுபவை. கிரங்கள் எமக்கு எந்தப்பலனையும் தாமாகத் தருவதில்லை; நாம் செய்த கர்மத்தை கணக்கு வைத்துக்கொண்டு அதற்குரிய பலனைச் சரியாகச் செய்யும் பணியைத்தான் அவை செய்கிறது.

காயத்ரி உபாசனையில் நவக்கிரகங்கள் நவக்கிரகங்கள் எட்டாவது ஆவரணத்திலிருப்பவை! காயத்ரியின் சவிதாவின் பேரோளி மத்தியில் இருக்க நவக்கிரகங்கள் எட்டாவது ஆவரண சக்தியாக இருக்கிறது.

ஆகவே ஒரு சாதகன் காயத்ரி மந்த்ரித்தை முதலில் சாதகம் செய்து பின்னரே ஆவரண தேவதைகளுக்கு வரவேண்டும். எனவே நவக்கிரக காயத்ரி சாதனை என்பது ஒரு சாதகன் குறித்தளவு குரு அகத்திய காயத்ரி சாதனையின் பின்னர் கிரக பிரபாவங்களின் தாக்கம் அதிகமாக இருந்தால் நவக்கிரக சாதனை செய்யலாம்!

ஆனால் ஜனாதிபதியின் ஆணையைப் பெற்ற ஒருவன் கிராம அலுவலகரின் உதவியை உடனடியாகப் பெறுவதைப் போன்றதே இது!

ஆகவே சிரத்தையாக காயத்ரி சாதனையில் கவனம் வையுங்கள்! அதன் பிறகு நவக்கிரக சாதனை தேவையா இல்லையா என்பது பற்றி வழிகாட்டல் கிடைக்கும்!