காயத்ரி பிராமணர்களுக்கு உரியது

ஆம் பிராமணர்களுக்கு உரியதே காயத்ரி! ஆனால் பிராமணர்கள் என்பதன் பொருள் என்ன? பிரம்மத்தை அறிய முனைபவன் பிராமணன் அன்றி பிறப்பால் வருவதல்ல பிராம்மணத்துவம். ஞானம் பெற்றபின் வருவது பிராமணத்துவம் அன்றி மந்திரம் ஜெபிப்பதால் வருவதல்ல பிராம்மணத்துவம். அதாவது மனம், சித்தத்தில் குறித்த தெய்வ சம்ஸ்காரங்களை பெற்று வளர்த்து தெய்வ குணங்களை விழிப்பித்தபின் வருவது தான் பிராமணத்துவம். யார் காயத்ரி அட்சர சக்தியில் குறித்த குணங்களின் விழிப்பு பெற்றவர்களோ அவர்களே பிராமணர் அன்றி மற்றவர் அன்று! இதில் யாருக்கும் தடையில்லை! முயற்சியுடைய சாதனை புரிய முயலும் எவரும் பிராமணன் எனும் நிலையை அடையலாம். அந்த முயற்சியில் உலகுக்கு கிடைத்தது தான் காயத்ரி மந்திரம், சத்திரியரான (ரஜோ குணம் மிகுந்த) மன்னன் கௌசிகன் பிராமணத்துவம் பெற முயற்சியில் கிடைத்ததுதான் காயத்ரி - உலகத்தின் நண்பராகிய - விஸ்வாமித்திர மகரிஷி அருளியது காயத்ரி!.

இன்று சிலர் காயத்ரி தமது ஜாதிக்கு மட்டுமானது என்கின்றனர்! ஒருசிலர் அது சமஸ்கிருதம் தமிழருக்கு ஒவ்வாதது என்கின்றனர், இன்னும் சிலர் தமிழ் சித்தர்களுக்கும் சமஸ்கிருத காயத்ரிக்கும் என்ன தொடர்பு எங்கின்றனர்? அனைத்துக்கும் ஒரேபதில் தான் காயத்ரி குறியத்த யாருக்கும் சொந்தமானதல்ல! அனைவருக்கும் சொந்தமானது! இந்த விஸ்வத்திற்கே மித்திரமானது! அதனை தம் மனதில் மேற்கூறிய காழ்ப்புணர்ச்சியுடன் அறிய முற்பட்டால் எதுவும் கிட்டாது! 

தேன் உலகில் பூக்கும் பூக்கள் அனைத்திலும் இருந்தாலும் தேனி என்ற ஒரு ஜந்து சேகரித்து அதனை அருந்தும் போதுதான் அதன் சுவை தெரியும்! அதுபோல் உலகம் முழுவதும் வியாபித்திருக்கும் விஸ்வ சக்தியை விஸ்வாமித்திர மகரிஷி எனும் ராஜதேனி காயத்ரி மந்திரம் எனும் கூட்டில் அடைத்து தந்திருக்கிறார். 

ஜாதி, மதம், இனம், மொழி கல்வி, செல்வம், அறிவு என்பவற்றை ஆணவமாக்கிடாமல் கையில் கிட்டிய தேனை சுவைப்போமாக!