தலைப்பு இல்லை

நேற்று நண்பர் ஒருவர் புத்தகத்தின் அட்டைப்படத்தை தனது பதிவில் பதிவிட்டிருந்தார். 

அது ஜப்பானியர்களின் நீண்ட ஆரோக்கியமான மகிழ்ச்சியான வாழ்க்கைக்கான காரணம் பற்றிய இரகசியத்தை உரையாடுவதாக கூறப்பட்டிருந்தது. 

ஐகி-காய் - ikigai (生き甲斐) என்பது அதன் பெயர்! இதில் ஐகி என்பது பிராணன் எனும் உயிர்சக்தியைக் குறிக்கும் சொல். ஐகி காய் என்ற சொல்லின் அர்த்தம் தமிழில் சரியாக இப்படி மொழிபெயர்க்கலாம் என்று எண்ணுகிறேன். 

பிராணனின் பயன் அல்லது உயிர்சக்தியின் பயன்

பிராணனின் விளைவு அல்லது உயிர்சக்தியின் விளைவு

ஜப்பானியர்களின் போர்க்கலையான ஐகிடோவும் இந்த உயிர்சக்தியை உபயோகித்து தற்பாதுகாப்பினை ஏற்படுத்தும் உத்திதான்! 

ஜப்பானியர்களைப் பொறுத்தவரையில் வாழ்க்கையின் அர்த்தம் என்பது காலை கண்விழித்தவுடன் தனது உயிர்சக்தியை எப்படிப்பயன்படுத்த வேண்டும் என்பதாக இருக்கிறது. 

இவை எமக்குப் புதியது போல் தோன்றினாலும் நித்திய கர்மம் என்று வைதிகத்திலும், சைவமரபிலும், ஆயுர்வேதத்திலும், சித்த வைத்தியத்திலும் வரையறுக்கப்பட்டிருந்த ஒன்று தான்! இந்த மரபுகள் தற்போது சடங்காகவும், புனிதப்படுத்தப்பட்ட ஒன்றாகவும் கருதப்படுவதால் உயிர்சக்தியை எப்படி பயன்படுத்துவது என்ற அடிப்படை இல்லாமல் வெறும் சடங்காகப்போய் பலன் தரவில்லை என்று கூறலாம்! 

அறம், அல்லது தர்மம் என்பது இப்படி எமது உயிர் சக்தியை எப்படி எமது உடல் மன மேம்பாட்டிற்கு பயன்படுத்தி கூட்டு முயற்சியாக சமூக மேம்பாட்டிற்கு பயன்படுத்துவது என்ற கோட்பாடுகள்தான்! 

ஐகி-காய் தத்துவத்தினூடாக ஒருவன் தினசரி தனது உயர்சக்தியை மனதினூடாகவும், உடலினூடாகவும் எப்படிப் பயன்படுத்த வேண்டும் என்ற ஓர் ஒழுங்குமுறையை ஜப்பானியர்கள் பயன்படுத்துகிறார்கள் என்பதும் அதனால் அவர்கள் ஆரோக்கியமாகவும், நீண்டகாலம் வாழ்பவர்களாகவும் இருக்கிறார்கள் என்பதே இந்த ஐகி-காய் தத்துவத்தின் அடிப்படை.