தலைப்பு இல்லை

10) கயிற்றை சர்ப்பமென மயங்குதல் (ரஜ்ஜு ஸர்ப்ப நியாயம்)

இருளில் கயிற்றை மிதித்த ஒருவன் நச்சுப்பாம்பு தன்னைக் கடித்துவிட்டதாக குதித்து, பயத்தால் அழும் நிலை. அவன் நண்பர் விளக்கினைக் கொண்டுவந்து ஒளி பாய்ச்சியவுடன் சட்டென பயம் மறைந்து மனம் அமைதியடையும். 

இதைப்போலதான் நாம் எமக்கு ஏற்படும் துன்பங்களை, அறியாமை இருள் நிறைந்த மனதினால் தேவையற்ற பயங்களையும், குழப்பங்களையும் உருவாக்கிக்கொண்டு குழம்பி அழுகிறோம். அமைதியாக அறிவு எனும் ஒளிகொண்டு பிரச்சனைகளை ஆராயத்தொடங்க, அவை அனைத்தும் தீர்க்கக்கூடியவையே என்ற புரிதல் ஏற்பட்டு மனம் பயம் நீங்கி அமைதியடையும். 

எந்த ஒரு பிரச்சனை வந்தாலும் அதைத் தீர்க்கும் அறிவு என்ற ஒளி இல்லாததால் அந்தப்பிரச்சனையை பூதாகாரமாக்குகிறோம் என்பதைப் புரிந்திருத்தல் அவசியம். 

11) கானல் நீர் நியாயம் (ம்ருக த்ருஷ்ன நியாயம்)

பாலைவனத்தில் கானல் நீர் போலியானது; அதைப்பார்த்து ஓடக்கூடாது என்ற அறிவில்லாமல் பாலைவனத்தில் பயணிக்கும் ஒருவன் கானல் நீரை உண்மை என்று நம்பி அந்த இடத்தை அடைந்துவிட்டால் நீர் கிடைத்துவிடும் என்று அதை நோக்கி ஓடத்தொடங்குகிறான். இப்படி ஓடத்தொடங்கும்போது அவன் உடலில் சேர்த்து வைத்திருந்த ஆற்றலும் அதிகமாக இழந்து அங்கு நீரும் இருப்பதில்லை. அங்கிருந்து பார்க்க இன்னும் தூரத்தில் நீர் இருப்பதைப் போல் தோன்றி மீண்டும் ஓடுவான். இப்படி ஓடும் ஒருவன் எப்போதும் நீரைப் பெறுவதில்லை. தனது ஆற்றலை பாலைவனத்தின் வெப்பத்திற்கு இழந்து இறக்க நேரிடும். 

உலகவாழ்க்கையில் போலியான நட்புகள், அனைத்து இன்பங்களும் பாலைவனத்து கானல் நீர் போன்றவையே! இவை இன்பம் தரும் என்று ஓடிய எவரும் எந்த இன்பத்தையும் பெற்றதில்லை. 

12) ஆகாயம் நீலம் என்று நம்பும் நியாயம் (ஆகாஸ நீலிம நியாயம்)

பகலில் மாத்திரம் ஆகாயத்தைப் பார்த்த ஒருவன் ஆகாயம் என்றால் நீலம் என்று மாத்திரம் நம்பும் அறியாமையைக் குறிக்கும் தர்க்கம் இது. 

நாம் பலரையும் சில நேரங்களில் போடும் வேடங்களில் இவர் இப்படித்தான் என்று முத்திரை குத்தி நம்பிக்கொண்டிருக்கும் மனதின் அறியாமையைப் புரிந்துகொள்ள உதவும் தர்க்கம். 

இரவில் வானம் கறுப்பாக இருக்கும், மழையில் கருமுகில்களால் சூழப்பட்டிருக்கும் என்ற யதார்த்த உணர்வினை அறிந்திருத்தல் மூலம் ஆகாயம் பற்றி தெளிவான அறிவினைப் பெறலாம். 

இந்தத் தர்க்கம் ஒரு பொருளில் பல அமிசங்களை ஆழ்ந்து அகன்று நுண்ணி கற்க வேண்டும் என்பதைக் கூறும். 

13) கனக குண்டல நியாயம்

ஒரே தங்கத்தினை பொற்கொல்லன் தனது கலை நயத்தினால் பல்வேறு வகையான ஆபரணங்களாக வடிப்பான். அதே போல் பிரபஞ்சத்தின் அனைத்துப் பொருட்களும் ஒரு மூல வஸ்துவிலிருந்துதான் வந்திருக்கிறது என்ற அறிவு இருப்பவன் பேத புத்தியை வளர்த்து துன்பத்தில் விழமாட்டான்.