தலைப்பு இல்லை

இலங்கையில் க.பொ.த சாதாரண தரப்பரீட்சை முடிவுகள் வெளியாகியுள்ளது. 

முடிவுகளின் படி தமிழ் மாவட்டங்கள் எனக் கூறப்படும் வட கிழக்கு மாகாணங்கள் பின்னடைவைச் சந்தித்து விட்டதாக புள்ளி விபரங்கள் பதியப்பட்டு வருகிறது. 

வழமையான "தமிழர் மன நிலையான" தமது பிரச்சனைக்கெல்லாம் காரணமான, தமது இனத்தையே அழிக்க வந்த அரக்கர்களின் சூழ்ச்சி போன்ற பூதாகரச் சிந்தனைகளை பேஸ்புக் புரட்சியாளர்கள் பதிய ஆரம்பித்து விட்டார்கள். 

தமிழர்களின் பொதுப் புத்தியான தமது வீழ்ச்சிக்கெல்லாம் காரணம் வெளியிலுள்ள எதிரிகள் என்ற மூடத்தனம் எப்போது விலக ஆரம்பிக்கிறதோ அன்று தான் சமூகம் முன்னேற ஆரம்பிக்கும். 

இது தமிழ் நாட்டுத் தமிழர்களுக்கும், இலங்கைத் தமிழர்களுக்குமுள்ள ஒரு ஒற்றுமை! இலங்கையில் தமிழரின் துன்பத்திற்கெல்லாம் காரணம் சிங்களவர், தமிழ் நாட்டில் தமிழரின் துன்பத்திற்கெல்லாம் காரணம் வட நாட்டுக்காரன்! 

வெகுவிரைவில் கனடாவிலும், ஐரோப்பாவிலும் வெள்ளைக்காரன் புலம்பெயர் தமிழர்களின் துன்பத்திற்கு காரணமாக இருப்பான் என்று நம்புவோம். 

வெளிநாட்டுப் பணத்தைக் கொட்டி, படிப்பு உழைப்பு என்பவற்றின் நோக்கம் என்னவென்று தெரியாத, சுகபோக, இலட்சியமற்ற சமூகத்தை செவ்வனே உருவாக்கிக் கொண்டு தமது வீழ்ச்சிக்கு எவனோ செய்யும் சூழ்ச்சி என்று கூக்குரல் போடாமல் மாணவர்கள் படிப்பில் அக்கறை இல்லாமல் போவதற்கு என்ன சமூக காரணம் என்று கண்டறிந்து அவற்றிற்கு தீர்வு காண்பது அவசியம்! 

நாம் வலிமையாக இருந்தால் நோய் வராது என்பது இயற்கையின் விதி! சமூகம் நோய் பிடிக்கிறது என்றால் அதற்கு காரணம் சமூகத்தின் மன நிலையில், பண்பில் ஆரோக்கியம் இல்லை என்பது தான்! 

பொதுவாக பிச்சைக்கார மனநிலை என்ற உளவியல் நிலை உண்டு. வீதிகளில் தமது காயங்களை காட்டி பிச்சை எடுப்பவர்களை கூட்டிச் சென்று குணப்படுத்தி எல்லா வசதிகளும் செய்து கொடுத்தாலும் தமக்கு மீண்டும் புண்களை உண்டாக்கிக் கொண்டு பழைய பல்லவியை பாடி பிச்சை எடுப்பதில் தான் ஆர்வம் காட்டுவார்கள். 

இதைப் போல் பழைய பல்லவி பாடி சிங்களவன் சூழ்ச்சி, தமிழனின் வீழ்ச்சி என்று புலம்புவதை விடுத்து சமூகம் முன்னேறும் வழியைப் பார்க்க வேண்டும்.