தலைப்பு இல்லை

வாழ்வில் நாம் எதைக் கூர்ந்து கவனிக்கிறோமோ அதற்கு நாம் எமது பிராணனைச் செலுத்துகிறோம். பிராணன் என்பதே எல்லாவற்றையும் உயிர்ப்பாக வைத்திருக்கும் உயிர் சக்தி. 

எமக்கு துன்பம் வரும் போது, எம்மைச் சுற்றி தீமைகள் நடக்கும் போது அதில் கவனம் செலுத்தி எதிர்க்கிறோம் என்று எண்ணிக் கொண்டு அந்த தீமையை வலுப்படுத்துவதை விட எமது எண்ணத்தை அதைவிட, அந்தப் பிரச்சனை தீரக் கூடிய உயர்ந்த ஒன்றில் செலுத்தி எமது ஆற்றலை அதிகரித்துக் கொள்வதே சிறந்த வழி!

எம்மை ஒருவர் பொறாமையுடன் தூற்றுகிறார் என்றால் அதற்கு அவர் நிலைக்கு இறங்கி பதில் சொல்லிக் கொண்டு இருக்காமல் அவரது தூற்றல் செயலற்றுப் போகும் வண்ணம் எமது செயலில் ஊக்கத்தையும் கவனத்தையும் செலுத்தி வெல்லவேண்டும். 

எனக்கு மட்டும் ஏன் இவ்வளவு பிரச்சனைகள் வருகிறது என்று கேட்பவர்கள் இந்த விஷயத்தை கூர்ந்து கவனிக்க வேண்டும். நாம் தினசரி பிரச்சனைக்குரிய தீர்வுகளில் ஆர்வத்தையும் முயற்சியையும் காட்டாமல் பிரச்சனையை உரையாடுவதிலும், அதைப் பற்றி சிலாகித்து எமக்கு நாமே பச்சாதாபத்தை உருவாக்குவதிலும் உள்ள நுண்மையான விருப்பமே எமது பிரச்சனைகள் அனைத்திற்கும் காரணமாக இருப்பதைக் காணலாம்!