மஹாலஷ்மி தத்துவம்: மஹாலஷ்மி அஷ்டகம் - 03

சர்வஜ்ஞே சர்வவரதே சர்வதுஷ்ட பயங்கரி
சர்வ துக்க ஹரே தேவி மஹாலக்ஷ்மி நமோஸ்துதே

சர்வஜ்ஞே : அனைத்தையும் அறிந்தவள் 

மஹாலக்ஷ்மியை அனைத்து செல்வத்தையும் கொடுப்பவள் என்றும் அனைத்து செல்வங்களுக்கு அதிபதி என்று சொல்கிறோம். இப்படி எல்லாவற்றிற்கும் அதிபதியாகவும் எல்லா செல்வங்களையும் தர வேண்டும் என்றால் அவள் அந்த செல்வங்களைப்பற்றியும், அதன் பண்புகள் பற்றியும், தன்மை பற்றியும் முழுமையாக அறிந்தவளாக அல்லவா இருக்க வேண்டும். ஆகவே மகாலஷ்மியின் சர்வஜ்ஞே என்ற அமிசத்தை தியானிப்பதன் மூலம் ஒருவன் செல்வங்களை அடைவது என்ற வழிமுறைகளை தந்து மனதில் விழிப்படையச் செய்கிறான். மஹாலக்ஷ்மியை சர்வஜ்ஞேயாக தியானிப்பதால் அனைத்து செல்வங்களையும் அடையக்கூடிய அறிவினை, ஆற்றலை, நுட்பத்தினை, தெளிவினை சாதகன் பெறுகிறான், 

ஸர்வ வரதே : எல்லா வரங்களையும் கொடுப்பவள் 

ஒருவன் தன்னிடம் இருப்பதை மட்டுமே மற்றவர்களுக்கு கொடுக்க முடியும். பணம் மட்டும் உள்ளவன் பணத்தை மாத்திரமே கொடுக்க முடியும். கல்வியை தரமுடியாது. இதுபோல் ஒவ்வொன்றை பெறவும் ஒவ்வொரு தெய்வ சக்தியை நம்மில் ஈர்க்க வேண்டும். ஆனால் எல்லா வரங்களையும் கொடுக்கு வண்ணம் எல்ல செல்வங்களுக்கும் அதிபதியாக இருக்கும் மஹாலக்ஷ்மியால் இது முடியும். ஆக மகாலக்ஷ்மியை ஸர்வ வரதே என தியானிப்பவன் அனைத்து செல்வங்களையும் பெறக்கூடிய ஆற்றலைப் பெறுவான். இந்த வல்லமை உடைய தெய்வ சக்தியே மஹாலக்ஷ்மி! 

ஸர்வ துஷ்ட பயங்கரி: எல்லாத் தீமைகளையும் பயமுறுத்தி தண்டிப்பவள் 

தீமைகள் அண்டுபவன் லக்ஷ்மித்துவம் பெறமுடியாது. இதன் மறுதலையாக லக்ஷ்மித்துவம் பெற்றவனை தீமைகள் அண்ட முடியாது. லக்ஷ்மித்துவம் என்பது இன்பத்தினை பெறுவற்குரிய சரியான வழி. பலர் இன்பத்தினை அடைய லக்ஷ்மித்துவத்தினை பெறாமல் அசுரத்தனத்தின் மூலம் பெற முயல்கிறார்கள். இன்றைய நிலை அதுவே. இப்படி அசுரத்தனத்தின் மூலம் பெறப்படும் இன்பம் மூலம் ஒருவன் தனது பரிணாமத்தை முன்னேற்றி பரிபூரணம் பெறமுடியாது. இதனால் மீண்டும் மீண்டும் மாயையின் பிடியில் சிக்கி காலம் வீணாகி தீமைகளும் துன்பமும் இன்பமும் கலந்து ஆன்ம முன்னேற்றம் பெற முடியாமல் போய் விடும். 

இப்படி இல்லாம மகாலக்ஷ்மியின் அருளை தன்னில் விழிப்படையச் செய்து தீமைகள் அண்டாமல், இன்பமான வாழ்க்கை பெற்று அதன் திருப்தியால் ஆன்ம முன்னேற்றம் அடையும் வழியே மகாலக்ஷ்மியின் அருள் தருகிறது. இதனால் சாதகனுக்கு வரக்கூடிய எல்லா துஷ்டங்களும் விலகுகிறது. 

சர்வ துக்க ஹரே : எல்லா துக்கங்களையும் போக்குபவள் 

இன்பம் கிடைக்கவேண்டும் என்றால் துன்பம் போக்கப்பட வேண்டும் என்பதுதானே தர்க்க ரீதியாக சரியான விஷயம். எல்லா இன்பங்களும் மகாலக்ஷ்மியால் கிடைக்கும் என்றால் அவை கிடைப்பதற்கு எல்லா துன்பங்களும் நீக்கப்பட வேண்டும் என்பதே சரியான ஒழுங்கு அல்லவா. 

ஆகவே மகாலஷ்மியை உபாசிப்பவனது எல்லா துக்கங்களும் போக்கபடும். 

இந்த ஸ்லோகத்தில் சாதகர்களுக்கான அறிவுரை 

1. இந்த ஸ்லோகம் மகாலஷ்மியை உபாசிப்பவர்களுக்கு மஹாலக்ஷ்மியின் அருள் கிடைக்கும் வழிகளை அவள் செயல்படும் தன்மைகளை கூறுகிறது. 

2. மஹாலக்ஷ்மியின் அருள் ஒருவனுக்கு செல்வத்தை சரியான வழியில் பெறுவதற்குரிய வழிகள் எல்லாவற்றையும் அறியத்தரும். 

3. ஒருவன் மஹாலக்ஷ்மியின் ஆற்றல் எல்லா வரங்களையும் தந்து எல்லா துன்பங்களையும் போக்க கூடியது. 

4. மகாலக்ஷ்மியை உபாசிக்கும் சாதகன் தனது துக்கங்கள் நீங்கி எல்லா ஸௌபாக்கியங்களும் பெறுவான்.