பிரணவ வித்யா பரிமளம் {ஓங்கார மந்திர இரகசியம்} - 05

இந்த பிரபஞ்சத்தின் தோற்றம் நாதத்தில் இருந்து தோன்றியது என்பதற்கு என்ன ஆதாரம் என்ற கேள்விக்கு விடை பிரபஞ்சம் தொடர்பான உண்மைகள் வேதங்களில் மந்திரங்களாகவும் அதன் வழியே பிரபஞ்ச உண்மைகளை அறியக்கூடியதாகவும் இருப்பதே பிரமாணம். 

நாதவடிவான வேதங்களும், அவற்றின் மந்திரங்களுமே பர ஞான உண்மைகளை அறிய மூலமாக இருப்பதால் நாதமே மூலமாக இருக்கும் என்பதை அறியலாம். 

இதை அதர்வணவேத மாண்டூக்யோப நிஷத் "ஓமித்யே ததக்ஷரமிதம் ஸர்வம் தஸ்யோப் வ்யாக்யானம் பூதம் பவத் பவிஷ்யமிதி ஸர்மோங்கார ஏவ" என்று கூறுகிறது. இதன் பொருள் "இந்தப்பிரபஞ்சம் யாவும் ஓமென்னும் அக்ஷரமாக சொல்லப்படுகின்றது. அந்த அக்ஷரமே விரிவான பொருளாயுமிருக்கிறது. கடந்தது, நிகழ்வது, வருவது யாவும் ஓங்காரமே" என்பதாகும். 

மேலும் அதர்வணவேத அதர்வசிரோப நிஷத் "இந்த அக்ஷரமே காணப்படும் பிரபஞ்சமெனலாம். ஜகத்துக்கு இதமாயுள்ளது. பிரஜாபதியை சார்ந்தது, ஸர்வவேத ஸாரபூதமானது, சேமெனென்ற உமா நாதனை தேவதையாகவுடையது" என்று பொருள் பட "ஸர்வம் ஜகதிதம் வா ஏகதாக்ஷரம் ப்ரஜாபத்யம் சூக்ஷ்மம் ஸௌம்யம்" என்று மந்திரமாக உரைக்கிறது. 

அதர்வணவேத அதர்வசிரோப நிஷத்தின் இன்னுமொரு மந்திரம் " ஸர்வதேவ வேத யோனி ஸர்வ வாஸ் ய வஸ்து ப்ரணவாத்மகம்" என்று உரைக்கிறது. ப்ரணவாத்மகம் சர்வ தேவர்களுக்கும் சர்வ வேதங்களுக்கும், மூல யோனி ஆக இருக்கிறது, சர்வ வஸ்துக்களும் இதுவே என்பது இதன் அர்த்தம். 

தாருமோத்தரச் செய்யுள் " ஓமென்னும் பதமதனில் வேத்மாதி யுற்பவிக்குமாலம் வித்தி நுதிக்குமாபோல்" என்று கூறும் வரிகளும், தாயுமானார் " ஓங்காரமைந்தெழுத்தாற் புவனத்தை உண்டு பண்ணிப் பங்கா நடத்தும் பொருளேய கண்ட பரசிவமே" என்ற வரிகளாலும் மேலும் தெளியலாம். 

ஓம் என்ற இந்த அக்ஷரமே பரப்பிரம்ம ஸ்வரூபம், எல்லாவாற்றிற்கும் மூலம், இது இல்லாமல் எந்தக்காரியமும் நடவாது என்பதை அனேக உப நிஷத்துகள் தெளிவுறக்கூறுகின்றன. 

க்ருஷ்ண யஜுர்வேடஹ் கடோபனிஷத் ஏதத்யேவாக்ஷரம் ப்ரஹ்ம ஏததேவாக்ஷரம்பரம் - (ஓம் எனும்) இந்த அக்ஷரமே பிரமம், இந்த அக்ஷரமே சிரேஷ்டம்"

அதர்வணவேத அதர்வசிகோபனிஷத் "ஏததக்ஷரம் பரம் ப்ரஹ்ம" - இந்த அக்ஷரம் பரப்பிரம்ம சொரூபம்" 

க்ருஷ்ண யஜுர்வேத அமிர்த நாதோபனிஷத் "ஓமித்யேகாக்ஷரம் ப்ரஹ்ம ஓமித்யேதந் நரேசயேத்" - பிரணவமென்பது ஏகாட்சரப்பிரமம், பிரணவத்தை என்றும் தள்ளக்கூடாது". 

ஸாமவேத மைத்ராயாண்யுப நிஷத் "ஓமித்யேததாத்ம ஓமித்யே ததக்ஷரம்" ஓமென்பது அந்தப்பரமாத்மா, இந்தப்பிரணவமே அக்ஷரப்பிரமம்"

சுக்கிலயஜுர் வேத தாரஸாரோப நிஷத் "ஓமித்தியேததக்ஷரம் பரம்ப்ரஹ்ம ததேவோ பாஸிதவ்யம்" - ஓமென்ற அந்த அக்ஷரமே பரப்பிரமம், அதுவே உபாசிக்கவேண்டியது. 

க்ருஷ்ண யஜுர் வேத தைத்திரீயோப நிஷத் "ஓம் என்பது பிரமம், சதாசிவன் பிரணவன்" 

கூர்ம புராணம் பகவாந் ஸர்வ  விஜ்ஞாநா தவ நாதோமிதி ஸம்ருத" சர்வஞ் ஞராதலின் பகவான் எனவும், காப்பவராதலின் ஓம் எனவும் சிவபிரான் எண்ணப்படுகின்றார்.