பிரணவ வித்யா பரிமளம் {ஓங்கார மந்திர இரகசியம்} - 04

அபரவித்தைகளை ப்ரோக்ஷ ஞானமெனவும் பரவித்தையை அப்ரோக்ஷ ஞானம் எனவும் வராஹோப நிஷத் முதலிவை குறிப்பிடுகிறது. இந்த இரண்டு ஞானத்திலும் 

• அபரவித்தையின் தெளிவு ஞானத்திற் சரியை அதாவது கேட்டல் 
• ஞானத்திற் கிரியை சிந்தித்தல்

பரவித்தையானது 

• ஞானத்தில் யோகம் தெளிதல் 
• ஞானத்தில் ஞானம் அதாவது நிஷ்டை எனவும் தெளிவுபடுத்தப்படுகிறது. 

அபரவித்தை இறுதி இலக்கில் பரவித்தையிலிருந்து வேறுபட்டிருந்தாலும் அபரவித்தை இறைவனின் படைப்புகளை பற்றி ஞானமாக துவி ஞானமாகவும், பரவித்தை அத்வைத ஞான அனுபவத்தையும் ஒருவனுக்கு தரும். 

இதை க்ருஷ்ணயஜுர் வேத அம்ருத பிந்துப நிஷத்தில் "சப்தப்ரஹ்மணி நிஷ்ணாத பரம்ப்ரஹ்மாதிகச்சதி" என்று சப்த ப்ரஹ்மமெனும் ஞானவிசாரத்தில் தேர்ச்சியடைந்தவன் பரப்பிரம்மத்தை அடைகிறான்" என்று உறுதி கூறுகிறது. 

ஒருவன் நிஷ்காமிய கர்மத்தால் சித்தத்தூய்மை பெற்று மலங்கள் அறுந்து பக்குவம் பெற்றாலும் தெய்வத்தின் அருள் இன்றி பர ஞானம் கிட்டாது. இதனை பெறும் வாய்ப்பினை அதிகரிக்க உள்ள மார்க்கம் "உபாசனை". உபாசனையை உருவம், அருவுருவம், அருவம், அதீதம் என நான் கு வகையாக செய்யலாம். இதை குருமுகமாய் உபதேசம் பெற்று தினசரி விடாமல் அப்பியாசித்து வர பர ஞானம் மேலிட்டு பிரம்ம ஸ்வரூபம் வெளிப்படும். இதையே வேதங்கள் உறுதி கூறுகின்றன. 

க்ருஷ்ண யஜுர் வேத கடோபனிஷத்தில் நாயாத்மா ப்ரவசதே நலப்யோமேதயா பஹுச்ஸ்ருதேன யமேவை ஷவ்ருணுதே தே நலப்யஸ்தஸ்யைஷ ஆத்மா வ்ருணுதே தனூம்ஸ்வாம் என்றவாறு இந்த பரமாத்மாவானவர் வேத அத்யாயனத்தாலோ, புத்தியினாலோ, அதேக சிரவணத்தாலோ அடையப்பெறுபவரல்லர், எவனை அவர் விரும்புகிறாரோ அவன் மட்டுமே அடைகிறான். அவனுக்கு பரமாதமாவானவர் தனது சொரூபத்தை காட்டி மகிழ்விக்கின்றார்" என்று கூறுகிறது. இதே மந்திரம் அதர்வண வேத முண்டகோப நிஷத்தில் உள்ளது. இதையே மாணிக்க வாசக பெருமான் "அவனருளாளேயவன்றாள் வணங்கி" என்றும் கூறியுள்ளார். 

தொடரும்...