தலைப்பு இல்லை

ஆத்திரக்காரனுக்கு புத்தி மட்டு என்பதை தலாயிலாமா இப்படி விளக்கிச் சொல்கிறார்; ஒருவன் தனது சீலத்தை, ஒழுக்கத்தை மூன்று நிலைகளில் கடைப்பிடிக்க வேண்டும்;

1. செயலில்

2. வார்த்தைகளில்

3. மனதில் தோன்றும் எண்ணங்களில்

இந்த மூன்று நிலைகளில் எம்மை நாம் கவனித்து ஆராயவேண்டும். வார்த்தைகளிலும், செயலிலும் வரும் முன்னர் நாம் செய்யும் செயல்கள் முதலில் எண்ணங்களாகத் தான் தோற்றம் பெறும்; அப்படி எண்ணங்களாகத் தோற்றம் பெறும்போது அவற்றைச் சரியாக கவனித்து அவற்றை வார்த்தைகளாகவோ, செயலாகவோ தோற்றம் பெறுவதை தடை செய்ய முடியும். இது பயிற்சியால் சாத்தியமாகும்!

எண்ணங்களைக் கவனித்தால், அந்த எண்ணங்கள் செயலாகுவதற்கும், வார்த்தைகளாவதற்கும் முதல் அதை தடை செய்ய முடியும்; குறித்த எண்ணம் உருவாகும் போது அது செயலாகினால் என்ன விளைவினை ஏற்படுத்தும் என்பதை சிந்திக்க அந்த எண்ணம் எம்மை துன்பத்திற்குள் செலுத்தும் என்பதைப் புரிந்துக் கொண்டு அதைத் தடைப்படுத்தி எம்மைப் பாதுகாத்துக் கொள்ளலாம். 

உதாரணமாக ஒருவர் மேல் எரிச்சல் அதிகமாகி, கோபமாகி குறித்த நபரிற்கு பாடம் படிப்பிக்கிறோம் என்ற நினைப்பில் எமது மனதில் உள்ள ஆத்திரங்கள், வக்கிரங்கள் எல்லாவற்றையும் கொட்டி கடிதம் எழுதியோ, மெசேஜ் அனுப்பிவிட அது சட்டப்படி பெரும் குற்றமாகி தண்டணை அனுபவிக்க வேண்டி வந்து விடலாம்! 

இது மனதில் எரிச்சலாக எழும்போதே அவதானிக்கும் ஆற்றலை பயிற்சியினால் உருவாக்கிக் கொண்டால் அப்படிச் செய்வதால் ஏற்படும் ஆபத்துக்கள், தீமைகளை சிந்தித்து மனதினை நல்லெண்ணங்களினால் நிரப்பினால் நாம் தேவையற்ற பிரச்சனைகளிலிருந்து தப்புவோம்! 

எமது எண்ணங்களைக் கவனித்துப் பழகுவது அனைவரும் வாழ்க்கையில் பயில வேண்டிய அதிமுக்கிய பயிற்சி!