குமார தந்திரம் கூறும் ஸுப்ரமண்யரின் சோடஷ (பதினாறு) தியான ரூபங்கள் - 13 : வள்ளி கல்யாண சுந்தர ஸ்வாமி தியானம்

{கந்த சஷ்டி, திருக்கார்த்திகை, விசாகம், ஒவ்வொரு மாத சஷ்டியிலும் முருக உபாசகர்கள் தியானிக்கத் தக்க ரூபங்கள் வள்ளி கல்யாண சுந்தர ஸ்வாமி தியானம்}
______________________________________________
பதின்மூன்றாவது ரூபம் வள்ளீ கல்யாண சுந்தர ஸ்வாமி தியானம்

குமார தந்திரம் வள்ளீ தேவியை மகாவிஷ்ணுவின் மகளாகக் குறிப்பிடுகிறது. இந்த ரூபத்தில் வள்ளியை விஷ்ணுவின் க்ருஷ்ண வர்ணத்திலும், சுப்பிரமணியரை செம்மை நிறமாகவும் தியானிக்க வேண்டும். 

வள்ளி என்பதன் பொருள் நிலத்தினையும், நிலத்தில் விளையும் கிழங்கு, அதன் கொடி இவற்றைக் குறிக்கும் சொல்! மகாவிஷ்ணு நீடித்து நிலைத்திருக்கும் காக்கும் சக்தி! பூமியில் உணவுப் பஞ்சம் வந்தால் எக்காலத்திலும் நிலைத்து நின்று எம்மைப் போஷிக்கக் கூடியது வள்ளிக் கிழங்கு! அத்தகைய ஆற்றல் மகாவிஷ்ணுவின் அருளால் கிடைப்பது! உடலைப் போசிப்பது வள்ளிக் கிழங்கு! 

வள்ளியைக் கைப்பிடிப்பது என்பது பெரும் யோக இரகசியம் அடங்கிருக்கிறது; ஒரு யோகி தனது அசுர குணங்களை வென்று தேவேந்திரனின் தெய்வ மனதை முதற்படியில் அடைந்து விடலாம்; ஆனால் உடலாகிய பிருத்வி தத்துவத்தை சித்தி செய்ய மூலாதாரத்து கணபதி உதவி செய்ய, மணிப்பூரகத்து மகாவிஷ்ணு தன் பெண்ணாம் வள்ளியை – என்று நிலைத்து நிற்கும் யோக சித்தியை – கைப்பிடித்துத் தந்தால்தான் ஆறு இதழ் சுவாதிஷ்டான ஆறறிவு ஆறுமுகன் பூரண சக்தி அடைய முடியும். 

தெய்வானையைக் கைப்பிடித்தல் தெய்வ மனம் பெறுதல் எனும் முதல் தெய்வ சக்தி! 

வள்ளியை மணம்புணரல் என்பது உடலை யோகத்திற்கு சித்தி செய்யும் காய சித்தி! காய சித்திக்கு வேண்டிய மூலிகைகள் எல்லாம் தெரிந்த வேட்டுவப் பெண் என்பதும் இதனால்தான்! 

வள்ளீ கல்யாண சுந்தரர் என்ற இந்த ரூப தியானம் யோகத்தில் மணிபூரக சித்தியடைந்து மகாவிஷ்ணுவின் அருளைப் பெறுதலைக் குறிக்கும்! இந்த ரூப தியானம் பூரண லக்ஷ்மி கடாக்ஷத்தையும், உடல் உறுதியையும் சாதகனில் உருவாக்கும். 

ஹஸ்த த்வந்த்தேக்ஷமாலா 

மபய மபித்ருதம் குண்டிகாச்ரோணி பந்தம்

ஸ்வ்யே வாமே நிஷண்ணம்ஸ்ருவ 

த்ருத விதி நா ஹூய மாநேந யுக்தம் 

ஸர்வாலங்கார் யுக்தம் ஜலகலச த்ருதா விஷ்ணுநா சாருணாபம்

வள்ளீ கல்யாண மூர்த்திம் 

ஸகலசுரகணை ஸ்தூய மாநம் ப்ரபத்யே 

வலது இரண்டு கைகளில் அக்ஷமாலை, அபயம் தரித்து, மற்ற இடது இரண்டு கைகளில் கெண்டியும், இடுப்பில் கை வைத்தவராகவும்,

வலது பக்கத்தில் ஸ்ருவத்தை தரித்து ஹோமம் செய்து கொண்டு இருப்பவருமான பிரம்மாவுடன், 

ஜலகலசத்தைத் தரித்துக்கொண்டு இடது பக்கத்திலுள்ள விஷ்ணுவுடன் கூடியவரும், வள்ளிதேவியை கைப்பிடிக்க ஆபரணங்களொடு பீதாம்பரங்களோடு வீற்றிருக்கும், எல்லா தேவர்களாலும் துதிக்கப்படுபவரான வள்ளி கல்யாண மூர்த்தியை தியானிக்கிறேன்.

அடுத்தது பால ஸ்வாமி தியானம்