தலைப்பு இல்லை

 

இன்று காலையில் அனேகரது முக நூல் பக்கம் தேசபக்தியால் வழியத் தொடங்கியுள்ளது! இதற்கு 2400 வருடங்களுக்கு முன்னர் சீனத்து ஞானி லாவோ ட்சு தனது தாவோ தே ஜிங் என்ற நூலில் 18 வது கவிதையில் சுவாரசியமான ஒரு குறிப்பு கொடுக்கிறார்.

மாபெரும் தாவோ மறக்கப்பட்ட போது

நற்பண்புகளும் தெய்வ பக்தியும் தோன்றியது

பிறகு புத்தியும் அறிவும் வெளிவந்தன

குடும்பத்தின் அமைதி குலைந்தபோது

வாரிசுரிமைப் பற்று தொடங்கியது

நாடு குழப்பத்தில் ஆழ்ந்த போது

தேசபக்தி ஜனனமாயிற்று

{மொழிபெயர்ப்பு: சந்தியா நடராஜன்}

இங்கு தாவோ என்றால் விழிப்புணர்வு என்று அர்த்தம் கொள்ள வேண்டும். மனிதன் விழிப்புணர்வுடன் பிரபஞ்ச நியதியைப் பின்பற்றும் வரை கடவுளோ, நல்லது கெட்டது என்ற ஒழுக்கத்தைப் பின்பற்றத்தேவையில்லை. எப்போது விழிப்புணர்வினை இழக்கிறானோ அப்போது அவனுக்கு நற்பண்புகள் போதிக்கவும், இறைவன் ஒருவன் இருக்கிறான் என்று மனதிற்கு பயத்தின் மூலம் விழிப்புணர்வு உருவாக்கத் தொடங்கினார்கள். இதிலிருந்து இது சரி, இது பிழை என்ற அறிவு, புத்திகள் உருவாகத்தொடங்கின!

அதுபோல் ஒரு குடும்பத்தில் அனைத்துப் பிள்ளைகளும் ஒத்திசைந்து, ஒற்றுமையாய் அமைதியுடன் வாழும் போது குடும்பத்தின் வளம் எப்போதும் அழியாது! விழிப்புணர்வு அற்ற குழப்பம் உருவாகும் போது யார் குடும்பத்தின் சொத்தினை, பெருமையினை வளர்ப்பானோ அவனை வாரிசாக்க வேண்டிய நிர்பந்தம் உருவாகியது.

இதுபோல் நாட்டில் அமைதி இருக்கும் போது எவருக்கும் தேசபக்தி பற்றி எண்ணம் வராது. குழம்பியவுடன் ஒன்று பட தேச பக்தி உதயமாகிறது.

ஆகவே மக்களே விழிப்புணர்வுடன், எது பிரபஞ்ச தர்மமோ, நியதியோ அதனுடன் செயலாற்றுங்கள்! அது நன்மையைத் தரும்! விழிப்புணர்வு இல்லாமல், உங்களை உசுப்பேத்தும் அரசியல் வாதிகளை தேர்ந்தெடுத்து குழப்பத்தை உருவாக்குவதும் நீங்கள் தான்! அந்தக்குழப்பத்தை சமப்படுத்த தேசபக்தி என்று உரக்கக் கூறுவதும் நீங்கள்தான்!

ஆகவே விழிப்புணர்வுடன் இருங்கள்! அது சமநிலையான சமூகத்தை, தேசத்தை உருவாக்கும்!

இதுவே தாவோ சொல்லும் உபதேசம்!

தலைப்பு இல்லை

 

"எனது விழிப்புணர்வே எண்ணத்திற்கு ஆற்றலைத் தருகிறது. எனது விழிப்புணர்வு பூதக்கண்ணாடி போன்றது, அது எதில் ஏகாக்கிரம் கொள்கிறதோ அதைப் பெருக்குகிறது. அதை வெளிப்படுத்துகிறது. ஆகவே நான் எனது விழிப்புணர்வை தீய எண்ணங்களுக்குத் தரமாட்டேன்; அவை ஆடம்பரமாக ஒரு போதும் வாய்ப்பளிக்க மாட்டேன். ஏனென்றால் அவை விழிப்புணர்வினால் போசிக்கப்படுகின்றது, விழிப்புணர்வின் மேல் வளர்கின்றன, அவை எப்படி தன்னை குறிப்பிட்ட ஒன்றாக அடையாளப்படுத்தி வளர்கின்றனவோ அவற்றையே ஆகர்ஷிக்கின்றது".

அம்ருதோப நிஷத்

ஸ்ரீ அம்ருதானந்த நாத சரஸ்வதி

தேவிபுரம்

***************************************

ஸ்ரீ ஸக்தி சுமனனின் குறிப்பு;

விழிப்புணர்வு என்பது எம்மை ஒன்றுடன் அடையாளப்படுத்தி மனதை அதனுடன் தொடர்புடையவற்றுடன் ஈடுபடுத்தும் நிலை! நான் என்னை யோக சாதகன் என்று விழிப்புணர்வுடன் அடையாளப்படுத்தினால் மனம் யோக சாதனைக்குரிய எண்ணங்களில் கவனம் செலுத்தி அவற்றை விருத்தியாக்கி என்னை யோக சாதனையில் ஈடுபடுத்தும்.

நான் என்னை ஒரு தேவி உபாசகன் என விழிப்புணர்வுடன் அடையாளப்படுத்தினால் என்னை தேவி உபாசனையில் ஈடுபடுத்தி தேவியின் ஆற்றலை ஆகர்ஷித்துத் தரும்.

நான் துன்பப்பட்டவன் என விழிப்புணர்வுடன் அடையாளப்படுதினால் மனம் துன்ப அலைகளை எழுப்பி அவற்றை ஆகர்ஷித்து துன்பமான வாழ்க்கையைத் தரும்.