காலபைரவ தியானம் – 30

 

காலபைரவர் வழிபாட்டில் உடுக்கை, முரசு பாவித்து பெருத்த ஒலி எழுப்புவது மரபு காசியில் நடு நிசிப் பூஜையில் அடிக்கப்படும் இரண்டு உடுக்கைகளும் அந்த இடத்தில் வேறெந்த எண்ணமும் இல்லாத சூனிய நிலையை உருவாக்கும் வல்லமையுடையது. இந்தப்பாடல் காலபைரவ வழிபாட்டின் சிறப்புத் தன்மைகளைக் கூறுகிறது. காலபைரவரின் பார்வை காமனின் வீரியத்தை எரிக்கக் கூடியது. இந்தப்பாடல் காம தகனம், எவருக்கும் அஞ்சாத துணிவு, பூத பிசாசுகள் போன்ற சூக்ஷ்ம சக்திகளால் தாக்கப்படாத நிலையை ஒரு பைரவ உபாசகன் பெறுவான் என்று சொல்லப்படுகிறது.

வெடிக்கும் பரவை முரசதிர் காமனை வீறழியப்

பொடிக்குங்கனல் விழிப் புண்ணியனே புவியோர்கணேஞ்சள்

துடிக்கும் பொல்லாத பிசாசுகள் தன்னைத் துரத்திவெட்டி

அடிக்குந் தண்டாயுதனே காழி யாபத்துத் தாரணனே

வெடிக்கும் கடலின் ஓசை போன்ற முரசு அதிர,

காமனின் வீரியத்தை அழித்து காம தகனம் செய்யக்கூடிய பார்வையை உடைய புண்ணியனே,

இந்தப்புவியில் எவருக்கும் அஞ்சாத மனவலிமையைத் தருபவரே!

மானிடருக்கு துன்பம் ஏற்படுத்தும் துடிக்கின்ற பிசாசுகளை துரத்தி வெட்டி அடித்து ஓட்டும்

சீர்காழிப் பதியில் உறையும் ஆபத்து தாரண பைரவரே

உம்மை நான் தியானிக்கிறேன்!

{ஸ்ரீலஸ்ரீ சிவஞான தேசிக சுவாமிகள் அருளிச் செய்த ஆபதுத்தாரண மாலை பாடல் 16}

இன்றைய காசிகாபுராதி நாத காலபைரவரின் மங்கள அலங்காரம் அனைவரது தரிசனத்திற்காகவும்!

 

 

காலபைரவ தியானம் - 29

 

இந்த தியானம் நாம் அறியாமையால் நிலையற்ற விடயங்களில் மனமகிழ்ந்து மாத்திரம் இருந்திவிடாமல் பைரவரின் பாதங்களில் பக்தி வைத்து தமிழறிவு கிட்ட வேண்டப்படுகிறது.

மாடும் தண்தாமம் அணிந்திடும் மைந்தரும் மாதர்களும்

வீடும் தண் தாமம் என மகிழாமல் உன் மென்மலர்த்தாள்

பாடும் தண்டாத்தமிழ் ஈந்தருள் பூத பிசாசுகளைச்

சாடும் தண்டாயுதனே காழியாபதுத் தாரணனே.

பொன்னால ஆன மாலையும்,

குளிர்ந்த மலர்மாலையும் அணிந்த பைரவப்பெருமானே!

பிள்ளைகளும், மனைவியும், வீடும் தான் குளிச்சியான பரமபதம் என்று அறியாமையில் மகிழ்ந்து விடாமல்

உன் மென்மலர் போன்ற பாதங்களை பாட வழு இல்லாத தமிழ் அறிவினைத் தந்தருள்வாய்!

பூதங்களும் பிசாசுகளையும் விரட்டியோட்டும் தண்டாயுதனே

சீர்காழிப் பதி உறையும் ஆபத்துத்தாரண பைரவரே

உம்மை நான் தியானிக்கிறேன்!

{ஸ்ரீலஸ்ரீ சிவஞான தேசிக சுவாமிகள் அருளிச் செய்த ஆபதுத்தாரண மாலை பாடல் 15}

இன்றைய காசிகாபுராதி நாத காலபைரவரின் மங்கள அலங்காரம் அனைவரது தரிசனத்திற்காகவும்!

வரியும் இலங்கை மக்கள் சோம்பேறிச் சிந்தனையும்

அரசாங்கம் எல்லோரும் வரிகட்டச் சொன்னவுடன் ஒவ்வொருவரும் எதோ சொத்தைப் பிடுங்கிறான் என்றவகையில் பெரிய பட்டம் பெற்ற புத்திஜீவிகள், அரச ஊழியர்கள் அனைவரும் சிந்தித்து நாட்டில் பதட்டப்படுவதைப் பார்க்கும் போது உழைக்கச் சோம்பேறிகள் மிகுந்த இந்த நாட்டில் பொருளாதாரம் எப்படி வளரும்?

நான் சிறுவயதில் குடும்ப பொருளாதாரம் அளவாக இருக்கும் போது அம்மா சொல்லுவார் எள்ளென்றாலும் ஏழாக பகிர்ந்து உண்ண வேண்டும் என்று! அதற்கு எதிர்ப்பேச்சு மனதில் ஓடும்! அம்மாவிற்கு திருப்பி வாயடித்தால் அடிவிழும் என்பதால் நான் எனக்குள்ளே சொல்லிக்கொள்வேன் ஏழுபேருக்கு தேவையான அளவு கிடைக்கும் வகையில் நாம் உழைக்க வேண்டும் என்று!

நாம் ஒவ்வொருவரும் பொருளாதாரத்தை உருவாக்கும் சிந்தனையும் பணச்சுழற்சி ஏற்படுத்தும் சிறப்புத் திறனும் பெறவேண்டும்! அதிகமாக உழைத்து உபரியை மற்றவர்கள் வாழ்க்கையை மேம்படச் செய்யவேண்டும் என்று முயற்சிக்க வேண்டும்! இலங்கையைப் பொறுத்தவரையில் அதிகமாக உழைத்து வெளி நாட்டில் பதுக்க வேண்டும் என்பதே அரசியல்வியாதிகளுடைய சிந்தனை! படித்தவன் இந்த நாட்டில் ஒன்றும் செய்ய முடியாது; வெளி நாடுதான் தன்னுடைய படிப்பிற்கு சிறந்தது என்று சிந்தனை! எம் ஒருவருடைய சிந்தனையின் கூட்டு விளைவுதான் எமது நாடு என்ற தெளிவு இல்லை!

அண்மையில் ஐக்கிய இராச்சியத்தில் இருக்கும் தொழில் அதிபராகிய ஒரு நண்பனுடன் உரையாடும் போது நான் பல்தேசியக் கம்பனியில் வேலைச் செய்துவிட்டு இப்போது ஊருடன் எனது அலுவலகத்தை செயற்படுத்துகிறேன்; அதே தரத்துடன் எமது ஊர்ப் பிள்ளைகள் கொழும்புக்கு வேலைக்குப் போகாமல் இங்கு ஊரிலேயே நாம் அலுவலகம் அமைக்க சிந்திக்கிறேன்; உங்கள் முதலீடுகளை திட்டங்களை இங்கும் செயற்படுத்த நான் உதவுகிறேன், உங்கள் சிந்தனைக்கு என்று சொன்னேன்! எனினும் தகுதியான தொழில் நுட்ப மூளைகள் உடியய மனித வளம் தேவையான அளவு இருக்கிறதா? என்ற சந்தேகத்தைக் கேட்டார்! உண்மையில் அது மிகவும் சவாலான விடயம்தான்! ஆனால் இன்று இல்லாவிட்டாலும் இன்னும் சிலவருடங்களில் அந்தச் சூழ் நிலையை நாம் உருவாக்கப் பாடுபட வேண்டும்.

வரி என்பது செலவழிக்காமல் உபரியாக இருக்கும் பணத்தை அரசு எடுத்து மற்றவர்களுக்காகச் செலவழிக்கும் ஒரு வழி! உங்களிடம் அதிகமாகப் பணம் இருந்தால் அதை எங்காவது நீங்களே முதலிட்டு பலருக்கு தொழில் வாய்ப்பினை உருவாக்கலாம்! அப்போது அது செலவுக்கணக்காக வரும்! இப்படி உங்களுக்குச் செலவழிக்கத் தெரியவில்லை என்றால் அரசாங்கம் அதை நான் செலவழிக்கிறேன் என்று சொல்வதுதான் வரி!

ஆகவே வீண்பதட்டம் இல்லாமல் பொருளியலும், நிதியியலும் படிக்க ஆரம்பியுங்கள்; இந்த நாட்டில் பட்டதாரிகள் கடிவாளம் கட்டிய குதிரை மாதிரி தாம் பெற்ற பட்டத்தினைத் தாண்டி சிந்திக்கத் தெரியாத பொருளாதாரம், நிதியியல் தெரியாத மூடர்களாக காலையில் இருந்து மாலை வரை எங்காவது பக்குவமாக வேலை செய்துவிட்டு வீட்டில் வந்து நிம்மதியாகத் தூங்க வேண்டும் என்று நினைக்கும் சோம்பேறிக் கூட்டம் இருப்பதாலேயே இப்படி வீண் பயம் எல்லாம்!