வளி மாசடைதல் எனும் ஞானி

மனிதனின் தன்னைத் தாண்டி தான் செய்யும் செயல் மற்றவனையும் பாதிக்கும் என்பதை புரியவைக்கும் ஞானகுருவே வளிமாசடைதல். 

நீங்கள் அனுபவிக்கும் வளி மாசிற்கு நீங்களே காரணமாக இருக்க வேண்டியதில்லை என்பதே உண்மை! காரணம் எங்கோ இருக்கும் பலரின் கூட்டு விளைவாக இருக்கும். 

இதை trans-boundary effect என்பார்கள். மனிதன் பகுத்து வைத்த எனது நாடு, உனது நாடு என்ற வேற்றுமை இல்லாமல் எங்கும் எங்கு ஊடுருவும் வல்லமை உள்ளது நீரும், வளியும் ஆகாயமும். 

நேற்று இரவு கொழும்பில் வளிமாசடைந்துள்ளது, பாவப்பட்ட கொழும்புச் சனங்கள் என்று கூறி தூங்கி எழுந்தால் காலையில் கண்டியிலும், மாத்தளையிலும் புகை மண்டலம்! பனி என்று நினைத்தால் வழமையான குளிர் இல்லை. 

சரி என்று யாழ்ப்பாணத்திலிருக்கும் நண்பருக்கு அழைத்தால் யாழ்ப்பாணமும், வன்னியும் அதே நிலமை தானாம்!

ஆக இலங்கை முழுமைக்கும் வளிமாசடைதல் நிகழ்ந்துள்ளது. 

பஞ்ச பூதங்களில் நிலத்தை மட்டும்தான் மனிதன் மேலோட்டமாக தனக்கு என்று உரிமை கொண்டாட முடியும், மற்றவை எல்லாம் அசைந்து மனிதன் கட்டுப்பாடு இல்லாமல் ஓடுபவை. இவற்றைச் சீண்டும் போது அது தனது பங்கிற்கு நாம் தருவதை மீண்டும் பல பங்காக தந்துவிட்டுப் போகும். 

ஆக மனிதன் தன்னை இலங்கையன், இந்தியன், சீனன், அமெரிக்கன் என்று கற்பனை செய்து கொண்டாலும் இயற்கைக்கு அவனும் புழுவும், மண்ணும், பாம்பும் எல்லாம் ஒன்று தான்! அவன் செய்யும் செயல்களை சேர்த்து வட்டியும் முதலுமாக பெருக்கிக் கொடுக்கும்!