அகத்தியர் வைத்திய காவியம் - 1500 அறிமுகம்

இந்த நூல் 1500 பாடல் கொண்ட வைத்திய முறைகளை கூறும் நூலாகும்.

காப்புச் செய்யுளில் இரண்டு லட்சம் பாடல்களில் இருந்த வைத்திய காவியத்தை படிக்க இலகுவாகச் சுருக்கி ஆயிரத்து ஐந்நூறு பாடல்களாக பாடி வைத்ததாக கூறுகிறார். நூலின் அமைப்பில் பல்வேறு வாகடச் சுவடிகளைத் தொகுத்து பார்த்து, உலகில் ஏற்படும் நோய்கள் அனைத்திற்கும் நல் மருந்து சொல்வதாக புலத்தியர் என்ற சீடனுக்கு கூறுவதாக நூல் ஆரம்பமாகிறது. 

இந்த அறிமுகத்தில் முதல் ஐந்து பாடல்களின் அமைப்பு பற்றி ஓர் அறிமுகம் பார்ப்போம். இது வைத்தியர்களுக்கு சில அடிப்படைகளைத் தெளிவிக்கும். 

முதல் அடிப்படை நாடிகளின் தோற்றமும் வகையினையும் அது உடலில் இருக்கும் நிலை பற்றியும் அறிதல், மொத்த நாடி எழுபத்தியீராயிரம், அவற்றில் தெரியக் கூடியது பத்து, அவற்றில் வாத, பித்த கபம் படர்வதை தெளிவாக அறியக் கூடியது மூன்று அழகாக system ஆகச் சொல்லுகிறார். 

அடுத்த அடிப்படை இடகலை, பிங்கலை, சுழுமுனை ஆகிய மூன்றிலும் எப்படி வாத, பித்த, கபம் சேர்கிறது என்பதும் வாத பித்த கபம் ஸ்தூல உடலில் எங்கு இருக்கிறது என்பது பற்றியும் விபரிக்கிறார். 

வாதம் மலத்திலும், சிறு நீரில் பித்தமும், விந்தில் ஐயமும் சேரும் என்று குறிப்பிடுகிறார். 

அடுத்து இடகலை, பிங்கலை, சுழுமுனை ஆகிய மூன்று நாடிகளும் உடலில் எங்கு தோற்றம் பெற்று எங்கு முடிகிறது என்று கூறுகிறார். 

ஆக வைத்தியன் அறிய 

வேண்டிய முதல் அடிப்படை

1. நாடிகள் எத்தனை?

2. அறியக் கூடிய நாடிகள் எவை?

3. அவை எப்படி வாத பித்த கபத்துடன் தொடர்பு படுகிறது?

4. வாத பித்த கபம் ஸ்தூல உடலில் எதில் உறைகிறது? 

5.இடகலை, பிங்கலை, சுழுமுனை நாடிகள் உடலில் எங்கிருந்து எங்குவரை பரவுகிறது?