இன்று Dr. Hegde இன் உரைகளைக் கேட்கும் போது அவர் சொல்லுவதையெல்லாம் அகத்திய மகரிஷி தனது வைத்திய காவிய 2000 இல் வைத்தியன் இலக்கணத்தில் கூறியுள்ளார். இது பற்றி நான் எழுதிய பாடலின் உரை வருமாறு;
அகத்தியர் வைத்திய காவியப்படி
வைத்தியன் இலக்கணம்
***********************************
பார்தனில் வேதந்தன்னை பார்த்ததில் பெரியோன் சொன்ன
சீர்பெரு வாகடத்தை செய்பவர் குணங்கள் கேளாய்
நேருரை மாறானாகில் நினைவுதன் மனைவியன்றி
யாரையு முடன் பிறப்பா மென்றவை யவன் வல்லானே
பொய்யது பேசானாகப் புகழறிவுடையோனாக
மெய்யது சொல்வோனாக வினங்குகுரு மறவோனாக
தொய்யவே தாட்சியுண்டாய் சொல்மன தீர்க்கமுண்டாய்
நைவினைப் பாவமின்றி நன்மையில் நடப்போன்றானே (௧௩)
நீதியாய் வாகடத்தை நெறியுடன் திங்கள் தோறும்
ஓதிய பொருள் கடன்னை யுசாவியே யிருப்பானாகில்
தீதிலா னவைக ளுள்ளான் செகமதி லிருக்க மட்டு
மேதினி யதனில்காலன் விதியல்லால் வியாதியுண்டோ
சினவெறி யேறு போலத் திடமுள்ளான் மனதுமுள்ளான்
கனமென வுயிரைக் காக்குங் கருணையான் கதித்தசீரில்
இனமுள்ளா னேத்தமுள்ளா னேற்கையால் தோற்ற முள்ளான்
மனமதில் தயவுள்ளான் வைத்தியனாகு மென்றே (௧௪)
பொருள்: அகத்தியர் வைத்திய காவியத்தில் வைத்தியன் ஒருவன் எப்படி இருக்க வேண்டும் என்ற இலட்சணம் கூறப்படுகிறது.
தான் சொன்ன சொல் மாறக் கூடாது.
தன் மனைவி தவிர்ந்த வேறு பெண்களை தன் உடன் பிறந்தவளாக கருதவேண்டும்.
பொய் பேசக்கூடாது
யாவரும் புகழக்கூடிய அறிவினை பெற்றிருத்தல் வேண்டும்
உண்மை பேசுவோனாக இருத்தல் வேண்டும்
குருவை மறவாதவனாக இருத்தல் வேண்டும்
மனதில் இரக்க குணமும் தாட்சண்யமும் நிறைந்தவனாக இருத்தல் வேண்டும்
மனதில் தீர்க்கமான தெளிவுடையவனாய்,
செய்யும் செயல்களில் பாவம் செய்யாதவனாக நன்மையினை நாடியே தனது செயல்களை செய்வோனாக
வைத்திய சாத்திரத்தை நன்றாக கற்று மாதம் தோறும் அதனை மீண்டும் தனது அறிவினை செப்பனிட்டவனான, அதில் கூறிய விடயங்களின் பொருளை தெளிவாக அறிந்தவனாக
தீமைகளை அகற்றியவனாக இருக்கும் வைத்தியனுக்கு காலனால் விதிக்கப்பட்ட ஆயுள் காலம் வரை நிம்மதியாக வாழ்ந்து உயிர் நீக்குவானே அன்றி வியாதிகளால் உயிர் பிரியாது.
மனதிலும் உடலிலும் சினம் கொண்ட சிங்கம்போல் வலிமையுடன் திடசித்தமாக இருப்பவனாக
நோயுற்ற உயிரை கருணையுடன் காப்பவனாக
நல்லொழுக்கம் உடைய குடும்பத்தில் பிறந்தவனாக
நல்ல வசீகரிக்கும் தோற்றம் உள்ளவனாக
மனதில் தயை உடையவனாக ஒரு வைத்தியன் இருக்க வேண்டும்.
No comments:
Post a Comment
எமது பதிவுகளை FaceBook இல் பகிர விரும்புவவர்கள் தகுந்த இணைப்புடன் பகிரவும். தமது தனிப்பட்ட வலைத்தளங்களில் பகிர விரும்புவபர்கள் தனிப்பட்ட மின்னஞ்சல் மூலம் அனுமதி பெற்று பகிரவும். எழுந்தமானமாக பிரதி செய்து பகிர்வது முறையான செய்கையாக கருதப்படமாட்டாது.