தலைப்பு இல்லை

 

இன்று கிரியா யோகம் என்பது பிரபலமான சொல்! பலரும் கிரியா யோக தீட்சை பெற்றுள்ளோம் என்றெல்லாம் சொல்வதைக் கேட்கிறோம்.

பதஞ்சலி, கிரியா யோகத்தை அனைத்து யோக சாதனைக்கும் உரிய ஒரு முழுமையான படிமுறையாக வரைவிலக்கணப்படுத்துகிறார்.

மனம், வாக்கு, உடல் எனப்படும் திரிகரணங்களினால் செய்யப்படும் எந்தவொரு செயலும் பதஞ்சலி மகரிஷி சொல்லும் இந்த நான்கு விஷயங்களைக் கடைப்பிடிப்பதால் கிரியா யோகமாக மாற்றலாம்.

|| தப: ஸ்வாத்யாய - ஈஸ்வர - ப்ரணிதானானி க்ரியா யோக: ||

1. தவம்

2. படிப்பு

3. செயல்

4. செயலின் பலனை இறைவனுக்கு அர்ப்பணித்தல் ஆகிய நான்கும் கொண்டது கிரியாயோகம் என்கிறார்.

இங்கு தவம் என்றால் காட்டிற்கு போய் கண்களை மூடி தாடி வளர்த்து, சடை வளர்ப்பதல்ல;

தபஸ் அல்லது தவம் என்றால் ஒரு இலக்கை எடுத்துக்கொண்டு அதை நோக்கி மனதைச் செலுத்தினால் எமது  ஐம்புலன்களில் இருந்து வரும் தூண்டுதல்களால் எந்த குழப்பமும் மனதிற்கு வராமல் வைத்திருக்கும் வைராக்கியத்துடன் கூடிய பயிற்சி. தவம் பழகுவதற்கு இறைவன் போன்ற உயர்ந்த தத்துவங்களை ஆரம்பத்தில் எடுக்காமல் சிறிய மனதிற்கு பிடித்த விஷயங்களில் கூட இதைச் செய்து பழகலாம். சிறப்பாக காப்பி போடுவதைக் கூட தபஸாக மாற்றலாம்.

எப்படி தவம் பழகலாம் என்பதை சரியாக, முறையாக கற்றுக்கொள்ளும் செயலுக்கு ஸ்வாத்யாயம் என்று பெயர்.    

இதை செயலுக்கு கொண்டுவந்து செயற்படுத்துவது மூன்றாவது நிலை. இப்படிச் செயற்படும் போது, நாம் இதை செய்து முடிக்கிறோம் என்ற அகங்காரம் வரும் போது எம்மால் அதற்கு மேல் மனதை ஆர்வத்துடன் செலுத்த முடியாமல் போய்விடும். ஆகவே செய்யும் செயலால் வரும் அனைத்துப் பலன்களையும் இறைவனுக்கு அர்ப்பணிப்பதால் அகங்காரம் உருவாகி எமது ஆற்றல் தடைப்படுவது தடுக்கப்படுகிறது.

மேற்குறித்த பண்புகளுடன் செய்யப்படும் எந்த செயல்களும் எமது சித்தத்தில் ஆழமாகப் பதிந்து விருத்திகளை ஏற்படுத்தும் நிலையை உருவாக்காது! ஆகவே சாதகன் வெகுவிரைவில் சித்த சுத்தி பெறுவான்!

இந்தப் பண்புடன் செய்யப்படும் பிராணாயாமங்களையே கிரியா பிராணாயாமம் என்று சொல்கிறோம்.

மகாவதார் பாபாஜி தன்னுடைய யோகத்தினை கிரியா பிராணாயாமம், கிரியா ஆசனம், கிரியா தியானம் என்று பெயரிட்டதன் காரணம் ஆசனம், பிராணாயாமம், தியானம் செய்யும் போது மேற்குறித்த நான்கு பண்புகளும் இருக்க வேண்டும் என்பதாலேயே!

ஆசனம் செய்யும் போது செய்யப்படும் ஆசனத்தின் உடல் நிலையின் மீது முழுக்கவனத்துடன் சுவாசத்தை இணைத்தல் தவம்.

அதைச் சரியாக செய்வது எப்படி என்று ஆசிரியரிடம் கற்றல் ஸ்வாத்யாயம்.

அதைப் பயிற்சித்தல் கிரியா.

இறுதியாக பயிற்சி முடிவில் குருவினதும், இறைவனது அருளினாலும் நான் எனது பயிற்சியை செம்மையாக முடித்து அதன் பலனை இறைவனுக்கு அர்ப்பணிக்கிறேன் என்று எண்ணுவது ஈஸ்வரப்ரணிதானம்.

இப்படிச் செய்தால் இது சித்த சுத்தி தரும் கிரியா யோகம்!

இப்படி காய்கறி வெட்டுவது, பயிர் செய்வது, கற்பது, தொழில் செய்வது என்று வாழ்வில் உள்ள அத்தனை செய்கையையும் கிரியா யோகமாக மாற்றும் வரைவிலக்கணத்தை பதஞ்சலி மகரிஷி விளக்குகிறார்.

வாழ்வே யோகம்.