தந்திரசாஸ்திரத்தில் பசுபலி - விலங்குகளைப் பலியிடுதலும் யாழ்ப்பாணத்து வேள்வியும்

ஒரு அறிவிலி இரகசியமாக பாரம்பரியமாகச் செய்ய வேண்டிய சடங்கினை தனது பிரபலத்திற்காக முக நூலில் பதிய அது இப்போது பேசுபொருளாகியிருக்கிறது. இதைப்போல் KFC slaughter house வீடியோ வெளியாகியவுடன் உருக்கமாக KFC ஐ மூடச்சொல்லி போராடுவார்கள் என்று நம்புவோம். 

யாழ்ப்பாணத்து மரபில் கிடாய் - சேவல் பலியிடுதல் வேள்வி என்று சொல்லப்படும். 

பலியிடுதல் என்பது தொன்று தொட்டு மனிதகுலத்தில் இருந்து வரும் மரபு.

பலி என்பதன் அடிச் சொல்; பலம் என்பதாகும்; ஒருவன் தான் உண்மையான பலத்தைப் பெற எல்லையற்ற பலமுடைய இறைவனுக்கு தன்னை அர்ப்பணிக்க வேண்டும் என்று யோக தந்திர சாஸ்திரம் கூறுகிறது; எம்மிடம் இருக்கும் உயர்ந்த ஒன்றை ஈஸ்வரனுக்கு அர்ப்பணிப்பதன் மூலம் நாம் பலத்தைப் பெறலாம் என்பதே அடிப்படைக் கோட்பாடு. 

இந்த பலியிட்டு படைத்தல் என்பது இந்த அடிப்படையில்.. 

பலியிடுதல் பைரவ - சக்தி வாமாச்சார தந்திர முறையினைச் சார்ந்தது; இது மிகவும் procedural ஆக எப்படிச் செய்ய வேண்டும் என்ற விதி இருக்கிறது. காளிகா புராணம் எப்படி முறைப்படி மகிஷ (எருமை) பலி தேவிக்குத் தருவது என்பதைப் பற்றி விபரிக்கிறது. 

ஒரு மகிஷ பலியின் கட்கம் - வாள் மந்திரங்களால் சுத்திகரிக்கப்பட வேண்டும். வெட்டப்படும் மகிஷத்தின் முதல் இரத்தம் ஒரு துளியும் தரையில் சிந்தக்கூடாது; நைவேத்திய பாத்திரத்தில் பிடித்து தேவியின் கர்ப க்ரஹத்தில் எடுத்துச் சென்று தகுந்த மந்த்ரம், முத்திரைகளுடன் அர்ப்பணிக்க வேண்டும். பலிதருபவன், பூசாரி, அனைவரது தகுதிகள் ஒவ்வொன்றும் விரிவாக விபரிக்கப்பட்டுள்ளது. 

யாழ்ப்பாணத்தின் அனேக கோயில்கள் வேள்வி எனப்படும் அஜ - ஆட்டுக் கிடாய், குக்குட - சேவல் பலி என்று தந்திர சாஸ்திர மரபு இருந்திருக்கிறது. குறிப்பாக வைரவர் கோயில்களிலும், அம்மன் கோயில்களிலும். இருந்தவை ஆறுமுக நாவலர் காலத்தில் ஆகம முறைப்படி வைதீக முறைகள் புகுத்தப்பட்டன. 

முற்காலத்தில் போர்க்குணம் பெறுவதற்கும் தன்னை தற்காத்துக்கொள்வதற்கு குறித்த ஒரு வீர பாவத்திற்கு தனது மனதைப் பழக்கும் ஒரு சடங்காக நாம் இதை கருதலாம். 

காளிகா புராணம் அரசர்களுக்கே உரியதான நரபலி பற்றிக் கூறுகிறது. இதன் அடிப்படை களத்தில் உணர்ச்சிகளற்று எதிரியைக் கொல்ல மனவலிமையைப் பெறுவதற்கான ஒன்றாகும். 

ஒன்றை எதிர்த்து வெல்லும் போர்க்குணம் பெற பலி அவசியம், இப்படி இல்லாவிட்டால் அந்த சமூகம் வத்தையும் சொத்தையுமாக ஆற்றல் அற்று அடிமைப்பட்டு விலங்குகளாக இருப்பார்கள் என்று சொல்கிறது தந்திர சாஸ்திரம்; 

நாம் பரிணாம முன்னேற்றத்தில் புத்தியின் ஆற்றல் பெருகும் போது இப்படி பலியிட்டு பலம் பெறத்தேவையில்லை என்று அறிந்துகொண்டதால் யோக ஞான மார்க்கங்கள் உருவாகியது.