சிவ சீவ ஐக்கியம் - மெய்ப்பொருள் இரகசியம் - 02

சிவஞானசித்தியாரிற்கு மாதவச் சிவ ஞானயோகிகள் எழுதிய உரைப்பாயிரத்தில் "சிவ சீவ சம்பந்தத்திற்கான 13 உவமைகளை இங்கு எளிய தமிழில் காண்போம்:

அடுத்து அறியப்படும் நிலை பற்றிய உவமைகள்.... 

எள்ளாகிய சீவனின் சிவம் நெய்யாக இருக்கிறது என்று எண்ணி சீவனிற்குள் சிவம் இருக்கிறது என்று எண்ணி மயங்கிவிடக்கூடாது என்று அடுத்த உவமானம் தீ இரும்பு சொல்லப்படுகிறது. 

இங்கு தீ சிவம், இரும்பு சீவன்; எப்படி தீ இரும்பை உருக்கி தனது ஆற்றலை வெளிப்படுத்தி இரும்பைச் சுத்திக்கிறதோ அப்படி சிவம் உயிரிற்குள் இருந்தாலும் மலங்களை நீக்க வல்ல அக்கினி தத்துவமாய் இருக்கிறது. சிவத்தை சீவனுக்குள் உணரத்தொடங்கும் போது அது தீயாக ஒருவனில் வெளிப்படுகிறது. இரும்பை உருக்கும் போது அதனில் தீ வெளிப்பட்டாலும் அதைத் தனியாக உணர முடியாது. 

இதனால் உயிராகிய சீவன் இல்லாமல் சிவம் இல்லையா என்றால் அதற்கு உவமானம் "பாணியுப்பு" நீரில் கலந்த உப்பு! உப்பில்லாமல் நீர் தனித்து இருக்கும்! அதுபோல் சீவன் இல்லாமல் சிவம் இருக்கும் ஆனால் சிவத்தில் கலந்தால்தான் அது சீவன்! 

இப்படி உவமானம் சொன்னால் உப்புக்கலக்காத நீர் இருப்பதால் உயிர் சிவத்தின் தொடர்பில்லாத நிலை ஏதும் இருக்கிறதா என்றால் அப்படியொரு நிலை இல்லை என்பதற்கு உவமானமாக "விண்ண நிலம்" என்ற உவமானம் தரப்பட்டிருக்கிறது. காற்று எப்படி ஆகாயத்தைவிட்டு நீங்காமல் ஆகாயம் இடம் கொடுப்பதால் அசைகிறதோ அதுபோல் உயிரின் அசைவு என்பது சிவத்திற்குள்ளேயே இருக்கிறது. 

அடுத்த உவமானம் உடல் உயிர்; உடலை உயிர் எப்படிச் செலுத்துகிறதோ அப்படி உயிரை சிவம் அசைவிக்கிறது. உடல் இயங்குவதற்கு ஆதாரம் உயிர்; உயிர் இயங்குவதற்கு ஆதாரம் சிவம். உயிர் விழிப்பு நிலையில் ஸ்தூல உடலையும், கனவு நிலையில் சூக்கும உடலையும், சுழுத்தியில் காரண உடலையும் இயக்குவது போல் சிவமாகிய இறைவன் வெவ்வேறு நிலைகளில் உயிரை இயக்குவானோ என்ற கேள்விக்கு எக்காலத்திலிரும் நீரைவிட்டுப் பிரியாத நிழல் போன்று நீர் நிழல் உவமானம் கூறப்பட்டது; உடலை இயக்கும் உயிர் அவத்தை மாறுபடுவதற்கு ஏற்ப மாறுவது போல் உயிரை இயக்கும் சிவம் மாறுபாடுகளை அடைவதில்லை. 

உயிரை இயக்கும் சிவம் எக்காலத்திலாவது உயிரை விட்டு பிரிந்து நிற்குமா என்ற கேள்வி எழுந்தால் இல்லை அது நீருடன் நிழல் இருப்பது போல் பிரியாதது என்ற உவமை சொல்கிறார். இங்கு நீர் ஆன்மா நிழல் சிவம். 

நீரானது தனக்குள் உவர்ப்பு, கைப்பு முதலிய சுவைகளைச் சேர்த்துக்கொள்வதற்கு எப்படி நிழலைத் துணைகொள்வதில்லையோ அப்படி சீவன் தான் புலன் களால் செய்யும் கலப்பிற்கு இறைவன் உதவி தேவைப்படுவதில்லை. 

இப்படி கலப்பிற்கு இறைவனாகிய நிழலின் உதவி தேவைப்படாவிட்டாலும் அனுபவத்தை அறிவதற்கு இறைவனது உதவி தேவை என்பதை உச்சிப் பளிங்கு என்ற உவமையால் சொல்லுகிறார். சூரியனின் ஒளி அருகில் இருக்கும் போது பளிங்கு தன்னுள் ஏற்று தெறிப்படையச் செய்து பல வண்ணங்களை உருவாக்கி, சூரியன் உச்சியில் இருக்கும் போது சிதறல் இல்லாத எதையும் பற்றாத வெள்ளை ஒளி உருவாகுவது போல் சீவனுள் சிவம் புலன் களால் அனுபவத்தைப் பெற்று இயக்கும் போது சிதறுகின்ற வண்ண ஒளி போலவும், முக்திக்காலத்தில் இறைவனோடு உயிர் கலந்து வேறுபாடு அற்ற நிலையை அடையும் என்பதை உச்சிப் பளிங்கு என்ற உவமையால் கூறுகிறார். 

உச்சிப்பளிங்கு என்ற நிலையில் பளிங்கு தனது நிலையை இழப்பதில்லை; அப்படியென்றால் முக்தி நிலையில் சீவன் சிவத்தினுள் அடங்குவதில்லையா? என்ற கேள்விக்கு முக்திக்காலத்தில் சீவனுக்கு தான் என்ற தனித்த அறிவு நிலை இல்லாமல் போய் சிவத்துள் மறையும் என்பதற்கு உவமானமாக பகல் விளக்கு என்ற உவமை தரப்பட்டுள்ளது. பகலில் விளக்கேற்றினாலும் அது சூரிய ஒளி இருப்பதால் பிரயோசனம் இல்லாதது போல் முக்தி நிலை அடைந்த சீவனது தனித்த நிலை புலப்படாது. 

அப்படியென்றால் பகல் காலத்து விளக்கு பயனற்றது போல் முக்தி அடைந்துவிட்டால் உயிருக்கு இன்ப அனுபவம் எதுவும் இல்லையா என்ற கேள்விக்கு பதிலாக பால் நீர் என்ற உவமை தரப்படுகிறது. எப்படி பால் நீரை தனக்குள் எடுத்துக்கொண்டு நீரிற்கு பாற்ச் சுவையைத் தருகிறதோ அப்படி சிவம் சீவனைத் தன்னுள் அடக்கி சிவமாக்கி விடுகிறது. 

இப்படிச் முக்தியனுபவத்தில் சிவமாகி அனுபவிப்பதால் சிவத்திற்கு நிகராக ஒளியுடையதா உயிர் என்று எண்ணி மயங்கி விடாமல் இருக்க, எப்படி கண் வெளியில் சூரியனதும் புற ஒளி இன்றியும் பிரகாசிக்காதோ அப்படி உயிரிற்கு சிவமின்றி ஒளியில்லை! ஆகவே கண்ணிரவி உவமை குறிப்பிடப்பட்டது. 

கண்ணொளியும் சூரியனொளியும் கலந்து நின்றாலும் கண்ணும் சூரியனும் வெவ்வேறு இடத்தில் இருப்பதால் உயிரின் அறிவும் சிவத்தின் அறிவும் கலந்தாலும் இரண்டும் வேறு வேறாக இருக்குமோ என்ற சந்தேகம் தோன்றுபவர்களுக்கு கண்ணுக்குள் உண்மையில் இருந்து பார்ப்பது உணர்வும் அதிலிருந்து வரும் ஒளி என்ற உண்மையை உணர உணர்வொளி என்ற உவமானம் சொல்லப்பட்டது; இறைவன் உயிரிற்குள் உணர்வு ஒளியாய் நிற்பதால்தான் கண்ணால் பார்க்க முடிகிறது என்று கூறினார். 

உடல் உயிர்

நீர் நிழல்

உச்சிப் பளிங்கு

பகல் விளக்கு

பால் நீர்

கண்ணிரவ் 

உணர்வொளி

ஆகிய ஏழு உவமைகளும் சிவமும் சீவனும் உடனாய் நிற்றலை விளக்குபவை.