பயணம்

நேற்று கண்டி நகரை கால் நடையாக வலம் வந்தாயிற்று! 

மகளுடன் ஸ்ரீ தலதா மாளிகைக்குச் சென்றேன். மகளின் நண்பர்கள் எல்லோரும் சென்று விட்டார்களாம். அப்பா இந்தியாவில் உள்ள எத்தனை கோயில்களுக்கும், இடங்களுக்கும் போய் வந்த நான் பக்கத்தில் கண்டியில் இருக்கும் தலதா மாளிகைக்கு இன்னும் செல்லவில்லை. இந்த விடுமுறைக்கு கட்டாயம் செல்ல வேண்டும் என்று உறுதியாக நின்று ஒரு மாதிரி சாத்தியமாகிற்று!

இருவரும் புனித தந்தத்திற்கு நீலோற்பல மலர் சமர்ப்பித்தோம். இந்த மலர் இரவில் மூடி தினசரி காலையில் திறக்கும் இயல்பு உடையது. எமது விழிப்புணர்வும் இத்தகையது! பகலில் விழிப்புணர்வுடன் இருந்து இரவில் விழிப்புணர்வை தூக்கத்தில் இழந்து விடுகிறோம்! நாம் எம்மை மலராக எண்ணி அதை புத்தரின் பாதத்தில் சமர்ப்பித்தால் எமக்கு பூரண விழிப்புணர்வு உண்டாக வேண்டும் என்று வேண்டுகிறோம் என்பது இதன் பொருள். இதை யோகத்தில் துரிய நிலை என்றும் தாயுமானார் தூங்காமல் தூங்கி சுகம் பெறுவது எக்காலம் என்று கூறுகிறார். 

இங்கு மூன்று அருங்காட்சியகங்கள் உண்டு:

ஒன்று தலதா மாளிகையின் வரலாற்று அருங்காட்சியகம் 

இரண்டாவது சர்வதேச பௌத்த அருங்காட்சியகம் - தெற்கு, கிழக்கு ஆசியாவின் பௌத்த வரலாற்றினை கலாச்சாரத்தினை எடுத்துக் கூறுவது. 

மூன்றாவது தொல்லியல் துறையின் கண்டி மன்னர் அரண்மனை அருங்காட்சியகம். இது அரசன் வாழ்ந்த அரண்மனையினது தொல்லியல் சின்னங்களைக் கொண்டிருக்கிறது. 

இலங்கையில் பௌத்தம் மகாவிகாரை, அபயகிரி, ஜேதவனராம ஆகிய மூன்று பாரம்பரியங்களைக் கொண்டதும் இதில் அபயகிரி, ஜேதவனராம ஆகிய இரண்டும் மகாயான மரபிற்குரியது என்பதும் சிறப்புச் செய்திகள்: Thanam Vettivelu ஐயா அவர்கள் அடிக்கடி மகாயானம் பற்றி பல செய்திகள் பதிவிடுவது ஞாபகம் வந்தது. 

பௌத்த கலாச்சாரம், இலங்கை பௌத்த வரலாறு ஆகியவற்றை அறிய விரும்புவர்கள் ஒரு நாள் அமைதியாக கற்கும் எண்ணத்துடன் இந்த அருங்காட்சியகங்களைப் பார்வையிட வேண்டும். இது முழுமையானதா என்பதை இன்னும் ஆராய வேண்டும்.

தொல்லியல் துறையின் வெளியீடுகள் சிலதையும் பார்த்தாயிற்று! சோழர்கால சிவ, பார்வதி, விஷணு ரூபங்களையும் தொகுத்து வைத்திருக்கிறார்கள். 

இங்கு பலரும் யாழ் நூலகத்தை அழித்தார்கள் என்று பொங்கிக் கொண்டிருப்பதைப் போல் அவர்களும் எமது மாளிகைக்கு குண்டு வைத்தான் பார் என்று அருங்காட்சியகத்தில் படம் எடுத்து மாட்டி வைத்திருக்கிறார்கள்: இரண்டையும் எண்ணும் போது எல்லா மனிதர்களும் அடிப்படை மனித இயல்பு குரோதமும், ஒருவரை ஒருவர் அழிக்கும் எண்ணம் உள்ளது என்றே எண்ணத் தோன்றியது. 

நாம் வரலாறுகளை கவனமாகப் படித்து அவற்றைக் குரோதம் வளர்க்காமல் ஒற்றுமையை நோக்கிச் செல்வது எப்படி என்று பலம் பெறவேண்டும்.

#பயணம்