சிந்தாந்தி ஒருவருக்கு நான் எழுதிய பதில்

ஒரு கடும் சிந்தாந்தி ஒருவருக்கு நான் எழுதிய பதில்: அதை அவருக்கு நேரே பதிலிட்டால் வாதம் தொடர்ந்து பித்தமாகி, தொந்தமாகி, ரோகமாகி எனது நேரம் வீணாகி விடும் என்பதாலும் எல்லா கடும் சிந்தாந்திகளுகும் இந்தக் கருத்தை தெரிவிக்க விரும்புவதாலும் இங்கு பதிவிடுகிறேன்:   

"உங்கள் உரையாடலில் சைவசித்தாந்ததைப் பற்றி நீயெல்லாம் உரையாடுவதற்கு என்ன தகுதி இருக்கிறது? என்ற மமதையும், நான் ஏதோ சைவசித்தாந்ததைக் கெடுக்க வந்த மாற்று மதத்தவன் என்று சந்தேகமும் முன்துணிபும், உங்களுக்கு மாத்திரமே சைவ சித்தாந்தம் எழுதிக்கொடுக்கப்பட்ட சொத்து என்ற நினைப்பு இருக்கிறது; இப்படியொரு நிலையில் நாம் சுமூகமாக உரையாட முடியாது; எனக்குத்தான் அதிகாரம் இருக்கிறது நான் சொல்வதை நீ கேள் என்ற நிலையில்தான் நீங்கள் உரையாடுகிறீர்கள்; இப்படியான நிலையில் நான் பெரிதா நீ பெரிதா என்று மாத்திரம்தான் வாதிட முடியும்; நான் இப்படியான வாதங்களைச் செய்ய விரும்பவில்லை! ஆன்ம அனுபவத்திற்குரிய ஒரு ஞானத்தை - சித்தாந்ததை வெறுமனே மலங்கள் நிறைந்த புத்தியாலும் மனதாலும் தர்க்கிப்பதில் என்ன பயன்?

சித்தாந்தம் என்ற உயர்ந்த ஞானம் அனைவருக்கும் கிடைக்க வேண்டும் என்றால் பழந்தமிழில் இப்போது உள்ள எவரும் படிக்க முடியாமல் இருக்கும் சிவ ஞான சித்தியார் அறுவர் உரையை எளிமையாக்கி அனைவரும் புரியும் படி தினசரி பதிவிடுங்கள்! 

வாலையானந்தர் நூறு வருடங்களுக்கு முன்னர் concept diagram மூலம் சித்தாந்த பட விளக்கம் என்று ஒரு நூல் மூலம் முயற்சித்தார்; இன்று நவீன animation ஐ பயன்படுத்தி எவ்வளவோ அருமையாக சைவ சித்தாந்தக் கோட்பாட்டினை மக்களின் மனதிற்கு கொண்டுபோய்ச் சேர்க்கலாம்! 

யாழ்ப்பாணத்துப் பல்கலைக்கழகத்தில் சைவசித்தாந்த பீடம் இருக்கிறது; தற்கால மக்களின் மனதிற்குப் புரியுமாறு எளிமையாகச் சித்தாந்ததை எடுத்துரைப்பது என்ற ஒரு ஆய்வும் இல்லை! யாருக்கும் விளங்காத பழைய பண்டிதரின் கனைப்புக் குரலில் ஒருவருக்கும் விளங்காமல் பேசினால் எப்படி இளைஞர்களுக்குப் போய்ச் சேரும். 

அதைவிடுத்துவிட்டு ஸமர்த்தர்களை எதிர்க்கிறேன், சாய்பாபாவை எதிர்க்கிறேன் என்று எப்போது பார்த்தாலும் குரோதமும், குழப்பமும், எதிர்ப்பேச்சும் பேசி ஒரு உயர் ஞானமரபினை குழாயடிச் சண்டை ஆக்குவதிலேயே குறியாய் இருக்கிறார்கள். 

சிவ ஞானசித்தியாரிற்கு மாதவச் சிவ ஞான யோகிகள் எழுதிய உரைப்பாயிரத்தில் "சிவ சீவ சம்பந்தத்திற்கான 13 உவமைகளையும் படித்து சிந்தித்தால் இன்றைய குவாண்டம் இயற்பியலில் கோட்பாட்டுக் கூறுகள் இருப்பதை உணரலாம். இப்படி உயர் ஞானத்தை அனுபவித்து உணர்ந்து மற்றவர்களும் உணரக்கூடிய வகையில் நாம் சுவையாக பரிமாற வேண்டும்; தூண்ட வேண்டும். இப்படி இந்த ஞானம் அனைவருக்கும் சென்றடையும் போது தான் இது எல்லோராலும் ஏற்றுக்கொள்ளப்படும்.