இசை

இன்று ஒரு மகிழ்ச்சியான செய்தி! 

எனக்கு கற்றலில் பற்பல ஆசைகள் உண்டு; அதிலும் புராதன ஞானமாக இருந்தால் அதில் தீராக் காதல் உண்டு; 

கந்தர்வ வேதம் எனும் இசை எல்லோர் மனதினையும் மயக்குவது; இதைக் கற்க வேண்டும் என்று நான் நினைத்த போது எனது தர்க்க புத்தி மனதிற்கு பதில் தரக்கூடிய ஆசிரியர்கள் எவரும் வாய்க்கவில்லை! அவர்கள் எல்லோரும் தம்மளவில் வித்வானாகவே இருந்தார்கள்; எனக்கு எனது பக்குவத்திற்கு தக்க பரிமாறும் ஆசிரியர் எனக்கு வாய்க்கவில்லை; அன்னையின் அருளால் அத்தகைய இசையின் நுணுக்கங்களை தர்க்க மனதிற்கு விளக்கி, பின்னர் மனதை பயிற்சிமூலம் பதப்படுத்தி, குரலில் ஸ்வரத்தைக் கொண்டு வந்து இசை வருவிக்கும் திறனுடையவர் ஆசானாக வாய்த்தார். 

ஒரு வருடம், வாரத்தில் ஐந்து நாட்கள் வேணு எனப்படும் புல்லாங்குழலும், குரலிசையும் முறைப்படி கர்நாடக சங்கீதத்தில் குருவின் வழிகாட்டலில் பயிற்சி செய்தேன். 

ஒவ்வொரு வருடமும் புதிது புதிதாக எதையாவது கற்று மூளையை இளமையாக வைத்திருப்பது என்ற எனது கோட்பாட்டிற்கமைய 2022 இலக்குகள். 

1) குரலிசை கற்றல்

2) வேணு எனும் புல்லாங்குழல் கற்றல்

நிறைவேறியது. இன்று காலை கந்தர்வ வேத இசைக்குரு நாதர் அழைத்து நீ பூர்த்திச் செய்த இசைப்பயிற்சிக்கு சான்றிதழ் அனுப்பியிருக்கிறேன், மின்னஞ்சலைத் திறந்து பார் என்றும் பிறந்த நாள் ஆசியும் கூறினார். 

எந்த வித்தை கற்றாலும் குருவின் அன்புக்கு பாத்திரமான மாணவனாக இருக்கும் பாக்கியம் அன்னையின் அருளால் வாய்ப்பது! 

இசையும் நாத சக்தியும் உன்னை விட்டு விலகாமல் எப்போது உன்னுள் இசை கற்கும் உத்வேகத்தைத் தூண்டிக் கொண்டிருக்கட்டும் என்று ஆசி கூறினார். 

எனது இசைக் கற்கும் நோக்கம் இசையை இரசிக்க அதன் இலக்கணம் தேவை என்பதும், நாத ஆற்றலை எப்படியெல்லாம் மனதிற்கு இன்பமாகப் பயன்படுத்தாலாம் என்பது! 

வீணை, மிருதங்கம், தாண்டவம் கற்க வேண்டும் என்பது ஆசை! அன்னை இன்னுமொரு சுற்றில் இவற்றிற்கெல்லாம் வாய்ப்புத் தருவாள் என நம்புகிறேன். 

பரத சாஸ்த்ரத்தின் அபிநய தர்ப்பணம், அபி நவபாரதி பற்றியெல்லாம், யோக தாந்திரீக நுணுக்கங்கள் உரையாடியிருக்கிறோம். 

எனது கந்தர்வ வேத குருநாதர் ஸ்ரீ நாட்டியாச்சார்யா ஸ்ரீ பாலச்சந்த்ர ராஜு அவர்கள்! 34 இசைக் கருவிகள் வாசிக்கும் ஆற்றலும், மற்றவர்களுக்கு கற்பிக்கும் ஆற்றலும் உள்ளவர். இவரது இராக பாவார்த்தம் என்ற நூலே பிரபலமான ருத்திர வீணைத் தொடரின் முதல் பகுதியில் ராகங்களின் ஆற்றல் பற்றி வரும் குறிப்பாகும்!

வெறும் முதல் வகுப்புத் தான் சித்தியடைந்திருந்தாலும் இன்றைய நாளில் இந்த ஆசி கிடைத்திருப்பது அன்னையின் ஆசியே!