யோகாசனம்

யோகாசனம் பயில வேண்டும் என்று விசாரித்த "எதிர் கால" மாணவர் ஒருவர் கேட்ட கேள்வி; 

எவ்வளவு காலத்தில் எத்தனை ஆசனங்கள் சொல்லித் தருவீர்கள் என்று? 

நான் திருப்பிக் கேட்டேன்; நிறைய ஆசனம் கற்க வேண்டும் என்று ஏன் நினைக்கிறீர்கள்? 

கேள்விக்கு பதில் இல்லை! அதிகமாகச் சாப்பிட்டால் தான் ஆரோக்கியம் என்று மூடத்தனமாக நம்புவதுபோல் அதிக ஆசனங்கள் படித்து உடலை வளைத்துக் காட்டுவதுதான் ஆசனம் என்று பலரும் நம்புகிறார்கள். 

இன்று பலரும் யோகாசனம் கற்பிக்கிறோம் என்று உடலை வைத்து வளைத்து பலவிதமாக வித்தை காட்டுவதை ஆசன சித்தி என்று காட்டுகிறார்கள். 

ஆசன சித்தி என்று மூன்று விடயத்தை பதஞ்சலி குறிப்பிடுகிறார்;

1. மூச்சு ஸ்திரமாகி உடல் சுகமாக ஆனந்தமாக இருக்க வேண்டும். 

2. மனம் அமைதியுற்று இறைவனிடம் ஒடுங்கக் கூடிய அளவிற்கு மனச் சலனம் குறைய வேண்டும். 

3. நீண்டகாலப் பயிற்சியின் பின்னர் வெளி உலகத்தில் ஏற்படும் குளிர், சுடு, வெப்பம், கால நிலை மாற்றங்களால் உடலில் நோய் எதுவும் வரக்கூடாது. 

இந்த மூன்றையும் அடைவதற்கு சிலருக்கு 20 ஆசனங்கள் பலவருடம் பயிற்சி செய்ய வேண்டியிருக்கும்; சிலருக்கு பத்து ஆசனம் சில மாதங்கள் செய்ய வேண்டியிருக்கும்; சிலருக்கு மூன்று ஆசனம் போதுமானது. 

மனதை கட்டுப்பாட்டிற்குள் வைத்திருக்கும் யோகிக்கு பத்மாசனம் மாத்திரமே போதுமானது. 

ஒவ்வொருவரும் தமது மன, உடல் பழக்க வழக்கங்களால் பிராண முடிச்சுக்களை ஏற்படுத்திக்கொள்கிறார்கள்; சிக்கல் பட்ட இந்த பிராண முடிச்சை அவிழ்ப்பதே ஆசனம்! எப்படி இடியாப்பச் சிக்கலாகிய நூல் பந்தை சிக்கெடுப்பதுபோல்! ஒவ்வொரு இடியாப்பமும் ஒரேபோல் சிக்காக இருக்காது! 

தம்பி, நேரே வாருங்கள்! உங்களுக்கு உடல் மன பிராண நிலைக்கு எத்தனை ஆசனங்கள் எவ்வளவு காலத்தில் படிக்கலாம் என்பதை நாம் உரையாடுவோம் என்று பதில் கூறினேன். 

நாம் செய்யும் செயலின் நோக்கம் என்ன? சரியாகச் செய்தால் விளைவு என்ன? விளைவை அடைய நாம் செய்யவேண்டியது என்ன? 

இதுவே எனது கற்பித்தல் முறை! 

வகுப்பிற்கு கட்டாயம் வருவார் என்று நம்புகிறேன்!